¹ Apa Jesusi no hakathishongero wendi hakokere Jerusalem no kwaiya kuBethphage, ku dirundu dyaOlives, podiyo Jesusi ghatumine hakathishongero wendi hawadi, ² ghughamba kukwagho,''Muyende kumukunda gho kurandako, nanyi mukawane thidongi hanaghangera, no kakambeghana. Kayishuture no kayirete kukwange. ³ Ngeshi kehe yuno ghakaghambe keheyino kuhaterayo, kaghambe,''Fumu ghana yinyanda,' no munu yo popo nanyi ghakakutume nayo.'' ⁴ No yi yeyire moyi ghaghambire kupitera mwawaporofeta yikume mo. Ghaghambire, ⁵ ''Tongwere mwana Zion,'Kenge,Fumu ghoye kuna kwiya kukoye, Kukumbirupitha no noghudhina padongi-no kakambeghaana,myero gho dongi.'' ⁶ No hakathishongero wendi hayendire nokurughana thikadighawarawere Jesusi. ⁷ Haretire thidongi no kakambe ghana nokuyitura mangugho papagho, naJesusi ghahungumane pamangugho. ⁸ Thingi thawanu haturire mangugho ghawo kumbadi dhothitavura, hamwe hatetire mite kuyitondo no kuyiyara muthitavura. ⁹ Mbunga dhi dhayendire kughutho waJesusi no awa hamukuthire hakugherere,''Hosanna kwa mwana David! Ghokukandadheka ne yoya ghokwiya mudina dya Fumu! Hosannane yoghapiterera!'' ¹⁰ Apa gheyire Jesusi muJerusalem, doropa dhodhihe dharorere nokughamba,''Dye yu?'' ¹¹ Mbunga dhahuthire,''Oyu ne Jesusi muporofeta gho Nazareth muGalilee.'' ¹² Jesusi ghengenine mu tembeli. Gha tjidhire wahe wa haghurire no kughuritha mutembeli, no ghawithire matishi ghomasherenyi gho kutjindja no yipura yowo haghurithire maputukuwa. ¹³ Ghaghambire kukwagho,''Hayitjanga,'Ndhugho dhange nanyi hakudhithe eshi ndhugho dhomandapero,'ene muna tendi dyango dyo hedhi.'' ¹⁴ Podigho hakunga no harema heyire kukwendi mutembeli, no ghawerure. ¹⁵ Ene apa mukuru wapristeri no hakamarukwaro apa hayimonine yitetukitha yi ghatendire,no apa hayuvire hanuke hana kukuyerera mutembeli nokughamba,''Hosanna mwana David,''ha patire thkuma. ¹⁶ Haghambire kukwendi,''Eyi ghuyuva eyi hana kughamba?'' Jesusi ghawahuthire,''Kemo! Ene kadi mwatoya,'Kutunda mukanwa kohanuke hohambiru no kukunga tumbututu mwaroyithera ruhaho'?'' ¹⁷ Jesusi podiyo ghawathighireno ghayendire panunda dhodoropakuBethany no ghakakarireko ghuthiku ghofotji. ¹⁸ Pamathikuthiku apa ghakahukire kudoropa, ghafire ndhara. ¹⁹ Ghamonine thitondo kuthitavura, ghayendire kukwatho nokadiko yighakawanineko kutundithako mahako. Ghaghambire kukwatho,''Ngowakukare eshi kadiko mbuyo kuroruheyakaro,'' no popo thitondo thi thakukutire. ²⁰ Apa hayimoninehakathishongero yi,hahafire no kughamba,''Ngepi ethi thitondo thina kukuta kare?'' ²¹ Jesusi ghawahuthire no kughamba,''Ghushemwa nakughamba kukwenu, ngeshi mukare no matawero no kadiko matamanyi, kadi mwakutenda yi natendi kuthitondo ngenyu, ene nanyi mwakughambe kumarundu,'Kughashimba no kaghavukumena mudikuruviya,' no nanyi yakuhokoke. ²² Keheyino muna kuromba mumandapero, nanyi mwakuyiwane.'' ²³ Apa Jesusi gheyire mutembeli, mukuruwaprisiteri nohakuru wahanu heyire kukwendi oku yene pakuhonga no kughamba,''No ngcamu munye ghuna kurughana yiynu yi?'' ²⁴ Jesusi ghawahuthire no kughamba kukwagho,''Name kuna kumwipura dipwero dyofotji. Ngeshi munitongwere me, nanyi nimutongwere mwe eshi no ngcamu munye nakurughana yinu yi. ²⁵ Diyoghero dyaJohanesi-kupi dyatunda? Kudiwiru endi kwahanu?'' Hakuvurekire mukatji kagho, ghughamba,''Ngeshi tughambe,'Kutunda kudiwiru,'nanyi ghaghambe kukwetu,'Nye twadhirire kumutawa?' ²⁶ Ene ngeshi tughambe,'Kwa hanu,' tuna yapa mbunga, yoyishi wahe hamonine Johanesi yira muporofita.'' ²⁷ Podiyo hahuthire Jesusi nokughamba,''Kadi tuna dimuka.'' Naye ghaghambire kukwagho,''Name mbadi shonimutongwere eshi nongcamu munye narughananga yinu yi. ²⁸ Ene nye mwakughayara? Katughuru ghakarire nohana hawadi. Ghayendire kwaghokutanga nokughamba,'Mwanange, yende ghukarughane dyarero mumandjembere.' ²⁹ ''Mwanendi ghamuhuthire no kughamba,'Kadi sho ni yitende,' ene kunyima ghakutjindjire maghano ghendi no ghayendire. ³⁰ "Nakatughuru ghayendire kwamwanendi ghoghuwadi no kaghamba yinu yofotji. Ghakamuhuthire no kughamba,'Nanyi niyende, ghodikuto,' ene kadi ghayendire. ³¹ Yipi pakatji kohana hawadi ghatendire yihima yawihe?'' Haghambire,''Gho kutanga.'' Jesusi ghaghambire kukwagho,''Ghushemwa nakughamba kukwenu, haketethi no hakakukughuritha nanyihangene mughufumu wa Nyambi kughutho wenu. ³² Johanesi gheyire kukwenu mundhira dhoghuhunga, ene kadi mwamutawire. Ene haketethi no hakakukughuritha hamutawire. Ene mwe, ngambi pamwamonine yi, kadi mwapirukire kunyima no kumutawa. ³³ "Mutegherere kumatadhi ghamwe. Pakarire katughuru,thinda shadyango. Ghakunine mandjembere, no kutenda thiginditho, ghathimine mo, ghatendire pokukengerera, no ghathihirithire kohakuni mandjembere. No ghayendire muditungadimweya. ³⁴ Apa rwakuminemo ruvedhe rokukesha mbuyo, ghatumine hapika koha kuni mandjembere mukashimba mbuyo. ³⁵ Ene hakuni wa hashimbire hapika wendi, kupumura ghofotji,kupagha ghumwe, no kukuyipitha ghumwe. ³⁶ Karo,thinda ghatumine hapika hamwe, hengi kupitakana hokutanga, ene hakuni wahatendire thikawaya hokutanga. ³⁷ Kunyima dhoyiya, thinda ghatumine mwanendi kukwagho, ghughamba,'Nanyi hakakukutekere mwanange.' ³⁸ "Ene hakuni wa apa hamonine mwanendi, haghambire kukwagho hathinda,'Oyu ne yo mupingi. Mwiye, ninge tumupaghe no kushimba yoyihe yipinga.' ³⁹ Podiyo hamushimbire, hamuvukumine panunda dho thinyamo no kumupagha. ⁴⁰ Apa thinda mukathinyamo shagheye, nye shana tende kowa hakuni?'' ⁴¹ Haghambire kukwendi,''Nanyi ghakuwa dhongonone hanu hohayi mundhira dhodhiyi, no nanyi ghakuthihirithe thinyamo kohakuni hamwe, hanu wahakumupa yiyangura yagho yimwe paruvedhe romuyangu.'' ⁴² Jesusi ghaghambire kukwagho,''Kadi mwatoya mumatjangwa,'Diwe di mukakutenda ghashwenine hana ditendi dyopadishonga. Eyi kwatundire kwa Fumu, no yiwa mumeho ghetu'? ⁴³ Podiyo nakughamba kukwenu, ghufumu waNyambi nanyi hakughushimbe kukwenu no nanyi ghakughutape kuditunga edi dyakureta mbuyo dhapo. ⁴⁴ Kehe yu ghakuwera padiwe pa nanyi hakumutjoraghure muyipindhi. Ene keheyuno apa dyakuwera nanyi dyakumudjame.'' ⁴⁵ Apa mupristeri shokuru no haPharisee hayuvire matadhi, hatjwathane ghaghambire kuhatera wo. ⁴⁶ Kushana kumukwata, hayapire mbunga, yoyishi hanu hamushimbire wo eshi muporofeta.