¹ ''Ghufumu gho diwiru ne yira thinda shadyango oyu ghayendire mathikuthiku ghakashane harughani muthinyamo thendi. ² Kunyima dhokukuyuva no harughani ku denari ghofotji mudiyuwa, ghawatumine munyamo. ³ Ghayendire karo muviri dhoghuhatu no kamona harughani hanemana mudyango dyokughurithera. ⁴ Kukwagho ghaghambire,'Namwe karo, muyende munyamo, no keheyino yamuroghera nnakumupa.' Podiyo hayendire hakarughane. ⁵ Karo ghayendire muviri dhoghukwoko nodhofotji no karo dhoghukwoko noghune, no karughana kemo. ⁶ Rofotji muviri dhodikumi nodhofotji ghayendire karo no ghakawanine hamwe hanemana. Ghaghambire kukwagho,'Nye munemanena pano diyuwa dyodihe?' ⁷ ''Hamuhuthire,'Pamurandu kadiko yu ghana tushimbi twe.' ''Ghaghambire kukwagho, 'Namwe muyende munyamo.' ⁸ Apa runguro rweyire, thinda sha nyamo ghaghambire kwamuyendithi wendi,'Withe harughani wahe nowatamburithe ndjambi dhagho, kutangera kughuhura kate kogho kutamekera.' ⁹ Apa heyire harughani awa ghakashimbire muviri dhodikumi nodhofotji, wahe hawanine madenari ghawo. ¹⁰ Apa hakakutanga harughani heyire, haghayarire eshi nanyi hawane yoyingi, ene nagho hawanine denari yofotji. ¹¹ Apa hawanine ndjambi dhagho, haghambirekuhatera thinda sha nyamo. ¹² Haghambire,''Awa harughani hokuhurera hananarughana ngenyi viri dhofotji, ene ghuna warikanyitha netu, atwe tuna pu kughuremu gho diyuwa no kukihera kughupyu.' ¹³ ''Ene thinda ghahuthire no kughamba kwaghofotji ghopapagho,'Mushere, kadi nakutenda yoyimango. Kadi ghuna kuyuvu nange yo denari ghofotji? ¹⁴ Shimbe eyi yidi eshi yoye no yende ndhira dhoye. Natorora mukutapa yi kowa hanahurera harughanipofotji yira we. ¹⁵ Nakara no ngcamu mukurughana eyi nashana koyi yakara kwange? Endi muna pata pamurandu ame ne mughushemwa?' ¹⁶ Podiyo hakaghuhura ghombohakara hakakutanga, no hakakutanga ghhura.'' ¹⁷ Oku Jesusi kuna kuyenda kuJerusalema, ghashimbire dikumi no hawadi kumutara, no mundhira ghaghambire kukwagho, ¹⁸ ''Kenge, kuna kuenda kate kuJerusalema, no Mwana Munu nanyi hakamutape kwamupristeri shokuru nawakamarukwaro. Nanyi hakamuhete no kamupagha ¹⁹ no kamutapa kwaGentile podigho haheke, kumupumura,no kumupamarera. Ene mudiyuwa dyoghuhatu nanyi ghaka vumbuke.'' ²⁰ Podigho nyina wahana Zebedee gheyire kwaJesusi no hanendi. Ghanyongamene kughutho wendi no kumwipura yimwe kukwendi. ²¹ Jesusi ghaghambire kukwendi, ''Nye ghuna himi?'' Ghaghambire kukwendi,''Rawere wahanange hawadi hahungumane, ghofotji kurudyo no ghofotji kudyokodyoye dyorumoho, mughufumu ghoye.'' ²² Ene Jesusi ghawahuthire no kughamba,''Kadi muna dimuka eyi munakuromba. Kukona munwe kopi yu nakushana kunwa?'' Haghambire kukwendi,''Kukona.'' ²³ Ghaghambire kukwagho,''Kopi wange nanyi mwakunwe. Ene mukuhungumana ku dyoko dyange dyorudyo no kudyoko dyange dyorumoho ne adi dyange dyo kutapa, ene dyowa gha royithera Tate.'' ²⁴ Apa hayiyuvire hakathishongero wendi dikumi, hapatire no hakurwagho hawadi. ²⁵ Ene Jesusi ghawethire kukwendi no kughamba,''Mwadimuka hapiterithi ho Gentiles hawapitakana wo, no hanu homudyo hana rughanithanga muragho papagho. ²⁶ Ene, keheyuno ghahima kukara mukuru mukatji kenu ghakona kukara mupika, ²⁷ no keheyu ghahima kukara mukakutanga ghakona kukara mupika wenu, ²⁸ thika Mwana Munu kadi gheyire mukuna murughanena, ene mukuna ghamwena, no kuna tapa yipara yendi yikarethomononitho thawengi.'' ²⁹ Thikadi hatundire muJericho, mbunga dhodhikuru dhawakuthire. ³⁰ Hakarire hatutughuru hohakunga hanahungumana kuthitavura. Apa hayuvire eshi Jesusine kuna kupita, hakugherere,''Fumu,Mwana David. tufere nyeke.'' ³¹ Mbunga dhawashwenine wo, ghuwatongwera haporere, ene hadirire ghukuyerera,''Fumu, Mwana David, tufere nyeke.'' ³² Podiyo Jesusi ghemanine tete no kwitha no kughamba,''Nye muna himi ey sho nimutendere?'' ³³ Haghambire kukwendi,''Fumu, meho ghetu ghayandhuruke.'' ³⁴ Na Jesusi, ghayendire no neke, ghakwatire meho ghawo. Popo hawanine kumona no hamukuthire.