¹ Ndani munyima dhomamyaka dikumi nomane,nahukire karo kuJerusalema naBaranabasi,kupitura naTitusi.'' ² Nayendire pamurandu ghoyihokora ndani mukutura mbudhi dhodhiwa paghutho dhagho edhi nayaghurire mwawa hayidena. Naghambire mughudhindo kowa hamonekire eshi mudyo,mukunomena eshi mbadi natjira- endi nitjire munyara-nyara. ³ Ngambi Titus naye yu nakarire nendi ndani yene muhirika, hamuthinenekire kumukena. ⁴ Hamina hombango heyire mughudhindo mukuna kara ghuhende kuhoro edhi twatawa mwaKristusi. Awo hashanine kututenda twapika, ⁵ ene mbadi twakutapire mumwagho mukapupi,podiyo eshi ghushemwa ghombudhi dhodhiwa dhikare nenu. ⁶ Ene awa hamonekire mudyo,(mbadi ni na kuwakudhekera me,Nyambi ne mbadi ghaneghedha makutjakero) kowa, nakughamba hamonekire mudyo mbadiko eyi hana wedherera kukwange. ⁷ Kumutara ghumwe, hamonine eshi hanipa mbudhi dhodhiwa kowa hadhira kukena. ⁸ Nanyambi ghoyu gharughanine mwaPetrusi muApostoli kwawa hapwa kukena, yodiye gharughana mumwange kwawa hayidena. ⁹ Apa Jakobusi,Cephasi naJohanesi hamonekire maghundhi, hadimukithire thineke ethi hanipa, hatapire dyoko dyorudyo mukukuyarekera naBarnabasi ndani name. Hayitawire eshi tuyende kohahayidena ndani wa hayende kowa hapwa kukena. ¹⁰ Hatukumbere eshi tuvuruke hahepwe, thinu ethi nathotere kurughana. ¹¹ Ene apa gheyire Cephasi kuAntiochi, namukananine kughutho wendi pamurandu shi ghemanine mumakutjakero. ¹² Kughutho ghokwiya hatutughuru hamwe kutunda Jacobusi,Cephasi ye ne kuna kudya nawa hayidena. Ene apa heyire hatutughuru wa,ghashayekire no ghayakunukire kwawa hayidena. Aye ghayapire awa hakondjere maneno. ¹³ Kemo wingi wawayuda hakuhamithere mudifurumeko. Ngambi Baranabasi ghayongarire no difurumeko dyagho. ¹⁴ Ene apa hamonine mi dhawo mbadi hakuthire ghushemwa ghombudhi dhodhiwa,naghaghambire naCephasi kughutho wagho wahe.''Ngeshi ghomuJuda ene ghoghuna kupara yira muhayedena,mbadi yira muJuda,ngepi edi sho thineneke hahayidena hapare yira haJuda?'' ¹⁵ Ghaywe ne twaJuda pamushamurukero no mbadi twahayidena hoyiharuri. ¹⁶ Ene twadimuka eshi noyofotji temba hahungeka payirughana yomuragho ene pamatawero mwaKristusi Jesusi. Natwe karo twatawa mwaJesusi,podiyo eshi tupe kuhungeka pamatawero mwaJesusi ndani mbadi payirughana yomuragho. Yirughana yomuragho ne noyofotji temba yahungekitha. ¹⁷ Ene ngeshi omu tuna kushana kuhungama mwaKristusi,natwe karo hatuwanine twayiharuri,Kristusi keho ne menesiteri (muruwani) ghodiharwero ndi? Mbadi kemo! ¹⁸ Ngeshi ghani tendurura eyi nayungurire, ¹⁹ nakuneghedha eshi nomukakuregha muragho, nafire kumuragho,podigho eshi nipare mwaNyambi. ²⁰ Ame ne napwire kupamarera naKristusi. Yodiyo eshi mbadi yame keho nakupara ene Kristusi ghana kupara mumwange. Yipara eyi ninakuparitha panyama ne pamatawero mwa mwana Nyambi,ghoyu ghanihakire noghakutapere thinda kukwange. ²¹ Mbadi shoni turere kumbadi thineke thaNyambi, ngeshi ghuhungami kwaghuwanine kupitera mumuragho. ngo Kristus ne nyara-nyara ghaferere.