¹ Paulusi, mupostoli waKristusi Jesusi mumahimeno ghaNyambi, kwawanu haNyambi hokupongoka muEfesiusi homatawero mwaKristusi Jesusi. ² Thinyeke kukwenu no thiraro kutunda kwaNyambi ghowihetu na Fumu Jesusi Kristusi. ³ Ninge Nyambi no wiha Fumu Jesusi Kristus ghapwe kushogherera, oyu ghatukandadheka no makandadhekero ghopamupepo mumango ghomudiwiru mwaKristusi. ⁴ Nyambi ghatutorora mumwendi kutunda kumatangero ghokaye, eshi tukare twapongoki nokupira murandu mumeho ghendi nomuruhakitho rwendi ⁵ Muruhakitho Nyambi ghatupakire twe. Poghatutambwera twahana kupitera mwaJesusi Kristusi, mukukutha kumahimeno ghendi gho mawa. ⁶ Matambwero ghetu ghareta mashogherero ghofumwa thineke pakutapa nyaranyara oyu gha haka. ⁷ MwaJesusi Kristusi twapwire kushutuka kupitera pamanyinga ghendi, no mathigherero gho maghuyi, mukukutha muthinyeke thendi. ⁸ Gha wedherire thinyeke thendi kukwetu noghunyanyami no matjwathaneno. ⁹ Nyambu ghatuyarekere thitetu thoyihima yendi, kukutha koyi yamuroghere, nokuneghedha mwaKristusi, ¹⁰ no mukukengurura no kuturapo mukuyarithera ruvedhe,mukureta yinu yoyihe pofotji, yoyihe mudiwiru no yopamuve mughupiterithi wamunu ghofotji Jesusi Kristusi. ¹¹ MwaKristusi twapwa kutorora, twahengi ghatupakere po kutwara kudighano dyoyu gharughanine yoyihe mukutwara muthitambo thoyihima yendi. ¹² Nyambi ghatutorora twe eshi twa yori podighoshi atwe, tukare twakamakurupero hokutanga mwaKristusi, yikare makughero mufumwa dhendi. ¹³ MwaKristusi, namwe karo, opa mwayuvire nando dhoghushemwa, mbudhi dhomakomweneno, ghenu mwatawire mumwendi no hamutanaritha kumatoyedhero ghamupepo ghokupongoka, ¹⁴ oyu gha tapa ghushemwa gho kuyiyora kate mashutukero gho mapingero, mukukugha kughufumu wendi. ¹⁵ Pathitambo thi, kutunda opa nayuva yo kuhatera kumatawero ghenu gho mwaFumu Jesusi Kristusi no yoruhakitho kohanu wa ha kushuka mwaNyambi, ¹⁶ mbadi nashayekire kutapa matumero kwaNyambi gho kukwenu thika kenge di nayimutongwere mumandapero. ¹⁷ Nakumuraperera eshi Nyambi ghoFumu wetu mwaJesusi Kristusi, Wiha ghoghuFumu , ghana kumupa mupepo gho ghunyanyami no yihokora mughudimuki wendi. ¹⁸ Naraperera eshi meho ghomutjima dhenu ghukare ghuna yandhuruka, podighoshi mudimuke makurupero ogha gha mwithire no ghutungi ghoghufumu wendi gho ghuyori mukatji kohanu hokupongoka waNyambi ¹⁹ Mumandapero ghange nepuranga podighoshi mudimuke yinu yokudhira kurikanyitha ghukuru ghongcamu dhendi kukwetu twe twatawi, mukukutha kuyiruwana yendi yo ngcamu dhendi. ²⁰ Edhi ne dho ngcamu dhofotji dhaNyambi ghatapire mwaKristusi pakumupindutha mukufa, no ghana hungumana ye kurudyo ghomango gho muwiru. ²¹ Aye ghana hungumeka Kristusi kokayenda noharaghuri wahe nomatawedhero nongcamu no kutakamitha, no kehe dino dina hata. Kristusi mboghana raghura, mbadi ghuye ghuno ngenyu, ene no ghuye oghu mbowiya. ²² Nyambi ghaturire yinu yoyiheya kwishi dho mapadhi ghaKristusi no ghamupire kungirishe eshi mutwi ghoyinu yoyihe. ²³ Ngirishe ne yirama yendi, mayeranero gho mumwendi gharikanyitha wahe.