¹ Ndani kukwenu, mwafire mukureya muragho nomaharwero. ² Omu pakutanga mwayendire mughuye ghokano kaye. Mwaparire kukutha kughuraghuri ghomatawedhero gho mumupepo, mupepo ghoghu ghuna kuruwana mo hana hoghuthiko. ³ Pakutanga twa tungire mukatji kohanu wa kukumithamo yirumbera yonyama noyo maghano. Atwe twakarire panyama hana hoghukenya, yira hanu wahe. ⁴ Ene Nyambi ne mutungi muthineke pamurandu gho ghukuru ghoruhakitho ghoru ghatuhakire twe. ⁵ Oku shime twafera mumatjorero, aye ghatuparithe pofotji mwaKristusi pathineke namwe mwapwa kushutura. ⁶ Nyambi ghatumuna pofotji naKristusi, ndani Nyambi ghatutenda tuhungumane mumango ghomudiwiru mwaKristusi Jesusi, ⁷ podigho eshi mughuye ghuna kwiya ghakatuneghedhe kupira mametero ghoghukuru ghoghutungi ghothineke thendi ethi ghaneghedhire mughunongo kukwetu mwaKristusi Jesusi. ⁸ Pathineke mwapire kushutura kupitera pamatawero, ndani oyi mbadi yeya kutunderera kukwenu, atho ne thitapera thaNyambi, ⁹ mbadi kutundera kuyiruwana, podigho eshi noyofotji temba shogha kununeke. ¹⁰ Atwe ne twarughani waNyambi, twapwa kuvateka mwaKristusi Jesusi mukuruwana yiruwana yoyiwa eyi ghaturoyithere Nyambi ghuye ghuna kupita, podiyo eshi tuyende mumwayo. ¹¹ Podiyo eshi muvuruke pakutanga mwakarire mwahayidena panyama. Hamwithire eshi mbadi hamukena, kowa hethire eshi hawakena panyama muyiruwana yonyara dhawanu. ¹² Podhiya nako mwayakunukire kwaKristusi, mwamutundakure gho kakoghatji kaIsraeli, mwanu maghana kughundambo ghomakuruperitho, kupira makuruperitho ndani kupira ko Nyambi mu kaye. ¹³ Ene pano mwaKristusi Jesusi kukwenu mwe mwayakunukire kwaNyambi hamuhenyitha pepi pamanyinga ghaKristusi. ¹⁴ Aye ne yo thiraro thetu. Ghatenda hawadi hakare yofotji. Panyama ghahanyaghurire dikuma dyokupira ghushere edi dya tuyakunuthire. ¹⁵ Aye ghatundithirepo muragho gho marawero ndani nomayendithitho podiyo eshi ghaturithepo katughuru ghomupya mumwendi, ndani kuturithapo thiraro. ¹⁶ Kristusi ghashemwathanithire hanu wahe muthirama thofotji kwaNyambi kupitera pathikurushe, ghapayirepo thinyenganyi. ¹⁷ Jesusi gheyire nokuna yuvitha mbudhi dhodhiwa dhothiraro kukwenu mwe mwakarire kayenda nothiraro kowa hakarire pepi. ¹⁸ Kupitera mwaJesusi twahe twawana matawedhero mwamupepo ghofotji kwawihetu. ¹⁹ Yodiyo, mwahayidena mbadi mudi karo hamutundakure. Mudi keho hahakwa hokakoghatji kohanu waNyambi hokupongoka ndani hahati homundhugho dhaNyambi. ²⁰ Amwe ne kwamutendera pakashemandhugho kwaApostoli nawaporofita, naJesusi thinda ne yodiwe dyopadishonga. ²¹ Mumwendi ghatanarera matungo ghomahe ndani makurero ngirishe ghokupongoka mwafumu. ²² Mumwendi karo hamumbera pofotji eshi mutunge mudyango dyaNyambi mwamupepo.