¹ Baitu niwabbaawo okukubagizibwa kwoona kwoona omu Kristo,gonze okusikiriza kwoona kwoona okwakwendya,gonze okwiisa ekimwe kwoona kwoona omu mwooyo,gonze okusaasira ne kisa . ² mwikiriirye eisanyu lyange, mulowoozenge bumwei, nka mubba n'okwendya kumwei, n'omwooyo gumwei nka mubba n'okulowooza kumwei. ³ . Timukolanga kintu kyoona kyoona olwa kwetakisya nnywenkai na nnywenkai, gonze omu bukuusa, wazira omu buculeeri buli muntu agulumizenge omwiiramwe okusinga ni yegulumiza. ⁴ Buli muntu ataloleeranga byaamwe yenkai, baitu bulyoomwe nka akufaayo muno noku byabandi. ⁵ Nnywe mubbeemu okulowooza okwo, okwali omu Kristo oYesu. ⁶ . Gonze nka yabbaire omu kisani kya Kanca, tiyerowoozere kwiikirana na Kanca. ⁷ Baitu yetweireku ekitiinisya, ni yeetwaire omu ngeri y'omwiru, n'abyaalibwa nk'omuntu. ⁸ . Erate niyabonekeire omu kisani kya buntu, ni yeculeerya, nka mugoondu okwiica okufa, erate okufa okwakumusaalaba. ⁹ .N’oKanca nikyo yazwiire amugulumiza muno n'amuweerya eibara lidi erisiinga amabara goona goona . ¹⁰ Aati olwa ibara lya Yesu, na buli kujwi kufukaiirenge, edi abo ababba mwigulu nabba okunsi nabba ansi wansi. ¹¹ . Erate nabuli lulimi lwatulenge Oyesu Kristo nka niye mukama waiswe, Okanca oitaiswe aweebwe ekitinisya. ¹² . Ale bairange, nka ni mubuire abawuurye buliizo nka ndi naanywe, nayenga tindowo, mweyongere okuba abawuurye, mwiikiryenge obulokozi bwaanywe bwenyenere n'okutya n'okukankana. ¹³ olwakuba OKanca akoora mu niinywe, yabendeserye erate nabasolesya, n'okukola byayendya. ¹⁴ . Mukolenge byoona awatali kw'emulugunya n'empaka. ¹⁵ Mulemenge kubbaaku ki munenyezebwa gonze eituma, abaana ba Kanca abataluku nziro aakati w'emigyo ezakyamire ezikakanyali, zemubonekeramu ng'eitaala mu nsi, ¹⁶ Nka mugumirye ekigambo kyaboomi, ndyooke mbe n’okwenyumiriza oku lunaku lwa Kristo, okulanga nti tinairukire bwereere, gonze okufubira obwereere. ¹⁷ . Baitu gonze nka nsukibwa okusadaaka no kuwereeza okwa kwikiriza kwanywe, nnsanyuka, erate nisanyukira amwe nanywe nyweena. ¹⁸ . Erate nwyeena mutyo musanyuke; muwanyukire amwe nanje. ¹⁹ . Baitu nkusuubira omu Mukama waiswe OYesu, okubatumira amangu Otimoseewo, njeena nsobole okuguma omwooyo, nindimala okweteja ebikufa ji muli. ²⁰ . Olwakubba tindina muntu wundi alina omwoyo, jemuli omazuma. ²¹ olwakubba abo boona baswagana byabwe kubyaabwe, ebitali bya Yesu Kristo. ²² . Baitu Otimoseewo ekimumanyisya nasaaniire, kubbanga yaweerenzanga amwe nanje alwanjiri, nk'omwaana eddi oitaamwe. ²³ Ale oyo niye gwenkusuubira okutumira mangu nka nkulozl leera nibwaba jendi. ²⁴ Baitu njeena nkusuubira omu Mukama waiswe nti ndi ndiiza mangu. ²⁵ . Erate mboine nka kisaanaire okubatumira epafuluddito omuganda wange, erate omukozi mwiirange, erate omulwaani mwiirange, baitu ni ye mutume waanywe erate omuweeraza w'abintu byenkwendya. ²⁶ . Olwakubba omwooyo gubbaire gumuluma muno, baitu niyetegyerye, nti mwawulire nka mulwaire ²⁷ Ddula n'okulwaala yalwaire e yabaire kumpi n'okufa, baitu Okanca namusaasira, erate tiniye yenkai, baitu nanje, enaku ereke okweyongera okunaku jendi najjo . ²⁸ . Nikyo ninzwa,ninyendya omuno okumutuma nimulimubona nimulyoka nimusanyuka, njeena ennaku yange nekendera. ²⁹ Ale mu mwaanirize Omu mukama waiswe namasanyu gaigi, baitu abakwisana nkoyo, mubatengemu ekitinisya. ³⁰ Olwakubba yawonere kadyooli okufa olwa mulumo gwa Kristo, niyawaireyo obwomi bwamwe mukukola ebyo bye byemwandikoleire singamwabaire nanje.