¹ . Ni bakumbanira waali Abafalisaayo nabawandiiki abazwire e Yerusaalemi. ² . Era ababoine abegereswa bamwe abandi ne balya emmere yaabwe n'engalo ezibbi, nizo ezitanabibwe. ³ . Kubbanga Abafalisaayo, n'Abayudaaya boona ne bataanabire muno mu ngalo zaabwe, tibalya, kubbanga bakwata emikiirokiiro ejabakaire. ⁴ . Era nibazwire omu katale, ne batanabire, tibaliire era walowo n'ebindi bingi bibabawaire okukwata, okunaabya ekikompe; n'ebibya, ne sepiki ezabikomo. ⁵ . Abafalisaayo na bawandiiki ni bamubulya bati; kiki abeegereswa baamu ekibagaana okutambuura mu mikiirokiiro ejabakaire, baitu bamala galya emmere n'engalo zibbi? ⁶ . Nabakoba nti; o Isaaya yalagwire kusai oku nnywe aba kiweweita, nka ne kyawendikiibwe kiti; Abantu banu bantaamu ekitinisya kya kumunwa, baitu emyoyo zaabwe zindi alai. ⁷ . Baitu bandamirya bwereere, ne bakwegesya amateeka g'abantu nga nibyo abyakukwata. ⁸ . Muleka eiteeka erya Kanca,ne mukwata emikiirikiiro j'abantu. ⁹ . Nabakoba ati muganira kimwe kusai eiteeka erya Kanca, era mukwata emikiirokiiro zaanywe. ¹⁰ . Kubbanga o'Musa yasimoire ati; otaanga ekitinisya omwi iteewo n'o maawo; era ati azumanga oitaamwe oba omaamwe, bamwitengembe. ¹¹ . Baitu nnywe musimoola muti; omuntu nakoba oitaamwe oba omaamwe nti kyoona kinandikuwaire okukugasa niye kolubaani, ekitegeeza kiti '' ekitoni'' kya Kanca. ¹² . Timuganyanga kukoora kintu oitaaywe oba omaanywe; ¹³ . Mudibya ekigambo kya Kanca olwa mikiirokiiro zaanywe, ne mwayegeserye; era mukola ebigambo ebindi bingi nk'ebyo. ¹⁴ Ate nayeta ebibbuura, nabakoba ati; mumpuliirye nyweena- nyweena muneteje; ¹⁵ . Ndoowo kintu ekiri enzai wa muntu ne kingiria omu ye, ekiyinza okumusiisa, baitu ebintu ebizwa omu muntu, ebyo nibyo bisiisa omuntu. ¹⁶ . Buli alina amatwi aga kuwuura. awuure. ¹⁷ . Awo nibaingiire omu nnyumba ng'azwiire omu kibbuura, abegereswa baamwe ne bamubuulya olufumo olwo. ¹⁸ . Nabakoba nti; kityo nyweena temulina magezi? Temweteja nga kyoona ekiri enzai ne kingira omu muntu, tekiyinza kumusiisa. ¹⁹ . Kubbanga tekingira mu mwoyo gwamwe, baitu munda yaamwe, ne kyakala ne kyaaba omu kiyigo? Yasimoire atyo nakulongoosa ebiriibwa byoona- byoona. ²⁰ . Nabakoba ati; Ekizwa omu muntu, nikyo kimusiisa. ²¹ . Kubbanga omunda omu myoyo gya bantu, mulugamu ebirowoozo ebibbi, obukaba, ²² . Okwiibba, okwiitta, obwenzi, okwegomba; obubbi, obukuyikuyi, okululunkana, eriiso eribbi, okuvvoola, amalala, obusiru; ²³ . Ebibbi ebyo byoona-byoona bizwa munda ne bisiisa omuntu: ²⁴ . Naimuka, nazwayo nayaba oku mbibi za Twulo ne Sidoni. Naingira omu nnyumba natendya muntu kumweteja, ate natayinza kwekweeka. ²⁵ . Baitu amangu ago omukali eyalina omwala wamwe eyakuku odaimooni, niyamuwuliire naiza nafukamira okumagulu gamwe. ²⁶ . Omukali yaali muyonaani eiggwanga lyamwe musulofoyiniiki namwegayiira okugoba o daimooni oku mwaala wamwe. ²⁷ . Namukoba ati; leka abaana bamale okwikuta kubanga tikisai kukasukira emmere y'abaana embweene. ²⁸ . Yeena nairamu namukoba ati; wewaawo, mukama wange; nembweene ziriira ansi wa mmenza obukunkumuki bwa baana. ²⁹ . Namukoba ati; olwa kigambo kyamu ekyo, weirireyo; odaimooni azwire oku mwaala waamu. ³⁰ . Nairayo omu nnyumba yaamwe, nasanga omwaala nabasirye oku kitanda, n'odaimooni nga amuzwireku. ³¹ Ate nazwa omu mbibi eza Ttuulo, naiza, nayakala omu Sidoni n'akati wa mbibi eza Dekapoli naika oku nnyanja eya Galiraaya. ³² .Ne bamuleetera okigara, atasimoola kusai, ne bamwesengerya okumutaaku emikono gwamwe. ³³ . Namwiiya omu kibiina kasirise, namutaaku engalo okumatwi gamwe,Nacwa amalusu namuta oku lulimi; ³⁴ . Naloleera aiguru omwiguru, natinda namukoba ati; Efasa, nikwo okukoba nti bonia. ³⁵ . Amatwi gamwe ni gaiguka, nekikolo kya lulimi lwamwe nikisindabuka nasimoola kusai. ³⁶ . N'abakuutira baleme okukoberaku muntu; baitu nka niyeyongeire omuno okubakalatira, nebeyongera muno okukimanyisya. ³⁷ . Ni bawuninkkiira muno amaano nga bakukoba bati ba akoore kusai; aigula abaigali b'amatwi, era abazisya abakibbubu.