¹ Nilwakire omunaku ezo, ebibuura bya bantu ni bya kaliirya obwingi ate, nibatalya emmere, nayetta abaegereswa bamwe, nabakoba ati. ² . Nkusaasira ebibuura, lwakubba olwaleero zikire enaku isaatu nga bali nangye, ate nga tibatunga mmere; ³ . Nimbasibula anu okwiirayo nga basiibire: nzala, bakwaba kukabira mu nzira; nabamwe bazwa alai. ⁴ . Abegereswa bamwe nibamwiramu bati omuntu yasbola atyai okwikutisya, abantu banu emigaati anu omwiirungu? ⁵ . Nababulya ati mutaa nemigaati imeikai? nibamukoba baati ziri musanju. ⁶ . Nadduumira ebibbuura byoona okwiikala ansi; nakwata emigaati omusanju, niyeebalya, nawendamu, nawerya abegereswa bamwe, okugita mumaisso gaabwe; nibazitta omu smaiso ga kibuura kyabantu. ⁷ . Era baabayire no bunage budyooli; nabwebalya, nadduumira bwoona okubuta o)mu maiso gaabwe. ⁸ . Abantu nibalya ni bayikuta,banirya obukunkumuki obwasigalirewo ebisira musanju. ⁹ . Abantu babaire nga abakwika enkumi inai; nabasibula. ¹⁰ . Amaangu ago nayambuka omulyato nabegereswa bamwe, nayiinza kumbaju zanyanja eza dalumanusa. ¹¹ . Abafalisaayo nibawuluka nibaiza, ni batandika okumubulya, nga bakuswagana oku ye akabonero akazwa omwiguru, nga bakumwoyerwa. ¹² . Nalumwa muno omu mwoyo gwamwe, nakoba ati, abamunnyumba ginu bakuswaganiryaki akabonero? ¹³ . Nabaleka awo, nayambuka omulyato nayaba enseeri wa nyanja edi. ¹⁴ . Awo ni berabira okutwala emigaati, ate nga tigyalumu omulyato wabula mwalumu gumwe gwonkai. ¹⁵ . Nabakuutira nabakoba ati, mwegumye, mwekuume okutumbisibwa kwabafalisaayo nekitumbisiya kya kerode. ¹⁶ . Nebebuulya bonkai nabonkai, nibakoba bati tibataa namigaati. ¹⁷ . OYesu niyeteje nabakoba ati kiki ekikubebulisyangana olwabutabba na migaati? Mukyali kubona, timutegeera? Emyoyo gyanywe zikakanyali? ¹⁸ . Mulina amaiso, timubona? mulina amatwi, timuwuura? ¹⁹ . Ni nawendeire enkumi eitaanu emigaati etaanu, ebibbo bimekai ebyaizwire obukunkumuki? ne bamukoba ikumi na bibiri. ²⁰ . Erate ni nawendeire omusanju oku nkumi einai, mwakumbanirye ebisira bimekai ebyaizwire obukunkumuki? Ni mukoba nti musanju. ²¹ . Nabakoba ati mukyali kwetejja? ²² . Ni baiza nibaika omu Besusayida ni bamuletera omulibbi wa maiso, nibamwegayira amukwateku. ²³ . Nakwata omulibbi wamaiso oku mukono, namuwulukya enzai wakigango; awo neyacwantira amalusu okumaiso gamwe, namutaku engalo, namubulya ati oluku kyokubona? ²⁴ . Naloleera aiguru nakoba ati nkubona nkubona abantu, lwakubba nkubona nga bakwisana emisaale nga bakutambula. ²⁵ Ate namuta engalo okumaiso gamwe nakundula amaiso okubona,nawona, nabona byoona-byoona kusai. ²⁶ . Namukoba ayabe ewamwei, era namukoba tongiranga mumbuga muni. ²⁷ . OYesu naimuka nayaba nabegereswa bamwe omumbuga zekayisaliiya ekya Firipo. Ni baikire omunzira nabuulya abagereswa bamwe nababuulya ati abantu banyeta naani? ²⁸ . Ni bamukoba bati Yokaana omubatizza ; Abandi bati Eriya; ate abandi omwe okubanabbi. ²⁹ . Ye nababuulya ati nywe munyetta naani? Opeetero nairamu namukoba ati niiwe Kristo. ³⁰ . Nabakuutira baleme okukobera omuntu ebigambo byamwe. ³¹ . Natandika okubegesya ati kimugwanire omwana wa muntu okubonyabyonyezebwa okwingi, nokuganibwa abakaire, na bakabona abakulu, nabawandiiki, no kwiitibwa, nokwakalaku enaku eisaatu okuzuukira. ³² . Nasimoola ekigambo ekyo mulwatu. OPeetero namutwala, natandika okumunenya. ³³ . Yeena nakyuka, nabona abegereswa bamwe, nanenya Opeetero, nakoba ati ira enyuuma wange, setaani; lwakuba tolowozere bya Kanca , wabula ebyabantu. ³⁴ . Nayetta ebibuura byabantu nabegereswa bamwe, nabakoba ati omuntu nattaka okunsegerya, yeefiirize yenkai, yeetikke omusalaba gwamwe, ansengeerye. ³⁵ . Lwakubba buli ayendya okulokola obwoomi bwamwe alibubulya; nabuli alibubulya obwoomi bwamwe kulwange nolwanjiri alibulokola. ³⁶ . Lwakubba kirimugasaki omuntu okulya ensi zoona, nafeerwa obwoomi bwamwe. ³⁷ . Lwakubba omuntu yandiwaireyo kiki okunula obwoomi bwamwe. ³⁸ . Lwakubba buli ankwatirwa ensoni ku nje nebigambo byange omumulembe guni ogwa kibbi, nomwana wamuntu alimukwatirwa ensoni oyo lwalizira omukitinisya kyaitamwei ne malaikka zamwe ezikiirire.