¹ . Nebasomoka nebaika omu nsi Y'abagerasene. ² . Nga yakazwa omu lyato, omuntu eyaliiku odaimooni eyazwire omu magombe namutangarana. ³ . Eyabbasyanga omu magombe; erate nga ndoowo muntu asobola kumubbuwa, no lujegere. ⁴ . Kubbanga emirundi ejikusinga yateebwangaku omumasamba no kunjegere, baitu enjegere nazikutula, namasamba nagawendawenda newatabaawo muntu wa maani akumusobola. ⁵ . Baitu buliizo, obwiire nemisana, yakungiranga omu magombe no kusonzi,ne yesalanga namabbaale. ⁶ . neyalengeire oYesu nga akyaali alai, nairuka namuramya; nakunga neiraka erikooto. ⁷ . Nga akukoba ati okunjunaniaki, Yesu omwana wa Kanca. ali aiguru omuno? laira omwibara lya Kanca nti tiwambonereize. ⁸ . Kubbanga yamukobere ati zzwa okumuntu oyo? we odaimooni. ⁹ . Namubuulya ati eibara lyamu niiwe naani? namwiramu nti ninje Liijoni, kubbanga tuli bainggi. ¹⁰ . Namwegayira muno aleme okumwirukya omu nsi omwo ¹¹ . Awo okulusozi waaliwo eiggana lya mberege nga zikulya. ¹² . Namwegayira, nga akumukoba ati tusindike omumberege tuzingiremu. ¹³ . Namwiikiriza, odaimooni namuzzwamu, naigira omumberege; eiggana ne riruka neriserengeta akabbanga pakka mumaizi, zaali ekummi ibiri, ne zifiira omu maizi. ¹⁴ . Awo abaali bakuziriisya nebairuka, nebakobera abamubibuga na bamubyaalo, nebaiza okubona ebibbairewo ni biri. ¹⁵ . Ni baika awali oYesu ni babona eyaaliku odaimooni nga aikaire,nga azwaire, nga alina namagezzi oyo eyaaliku elijoni; nibatiina. ¹⁶ . Ababwoine nebabanyonyola ebimubaireku oyo ayaaliku odaimooni, eratte nebya mberege. ¹⁷ . Nebatanula, okumwegengeerya okuzwa omunsaro zaabwe. ¹⁸ . Awo niyaali nga akusomoka omu lyato, oyo eyaaliku odaimooni, namwegayiira abbe naye. ¹⁹ . Natamwikiiriza, baitu yamukobere ati, yaaba ekka omu bantu baamu, obakobere ni biri ebikulu oKanca byakukoleire, ne bwakusasiire. ²⁰ . Nayaba, natanula okubakobera omu Dekapooli ni biri ebikulu OYesu byeyamukoleire. ²¹ . Awo OYesu neyasomokere ate omu lyato naikka oku lukalu ebibbuura bingi ne bikumbanira waali: Ye nga ali ku lukalu lwa nyanja. ²² . Omwe okubakulu baikungaaniro, eibara lyamwe Yayiro, naiza; niyamubwoine nainama okumagulu gaamwe. ²³ . Namwegayiira muno nga akumukoba ati, omwaala wange omuto aliampi okufa, nkweigayirerembe izza omuteeku emikono gyaamu, aire omumbeera yaamwe, ayimbooke. ²⁴ . Nayaba naye; ekibiina kikooto ne kimusengeerya, nebamuniggiirya. ²⁵ . Awo omukkali eyaali alwaire ekikulukutto kya musaayi emyaka ikumi naibiri, ²⁶ . Eyayabanga omuno okubassawo abaiggi, naweryangayo biyalinabyo byoona-byoona, erate natagasibwa, baitu ne yeeyongera kulwaala. ²⁷ . Ni yawuliire ebigambo bya Yesu, naizira enyuma wa kibiina nakoma okukyambalo kyamwe. ²⁸ . Kubbanga yakobere nti, ninakwatakumbe okyambalo kyamwe, nawona. ²⁹ . Amangu ago ensulo yamusaayi nekala, namanya omumubiri gwamwe nga awonere obujune bwamwe. ³⁰ . Amangu ago oYesu neyetejerye omuye nti amaani gamuzwiremu, nayinduka omukibiina nakoba nti naani akwaite okukyambalo kyange? ³¹ . Abeegereswa bamwe ne bamukoba bati, okubona ekibiina nekikumigiriirye, nakoba ati naani ankwaiteku? ³² . Niyetoololya amaiso okubona oyo akoore ekigambo ekyo. ³³ . Baitu omukali nga akutiina, nga akukankana, nga amaite kyabbaire, naiza nafukamira omumaiso gaamwe, namukobera ebya mazima byoona-byoona. ³⁴ . Namukoba nti, mwaala, okwiikiriza kwamu kukuwoonerye weyabire mirembe. ³⁵ . Awo niyaali nga akyasimoola, abaazwiire awa mukulu weikunganiro ne baiza, nga bakukoba nti, omwaala waamu afiire, okusumbuwiraki omwegesya. ³⁶ . Baitu OYesu natateeyo mwoyo ku kigambo ekikobeibwe, nakoba omukulu waikumbaaniro nti, totiina, ikkiriza mbe. ³⁷ . Nataikkiriza muntu kwaaba naye okwiyaku oPeetero, no Yakobo, no Yokaana,omuganda wa Yakobo. ³⁸ . Ni baika oku nyumba yamukulu waikumbaaniro, nabona okwaziirana, no kukubba ebiboobe ebingi. ³⁹ . Awo neyaigirire nabakoba kiki ekikubaaziiranya ne kikubakunja? omwana tafiire, naye abasiryembe. ⁴⁰ . Ni bamusekeere muno, baitu ni yabawulukirye boona-boona, natwala oitaamwe wa mwaala no maamwe naabo abaali naye, naigira omwaala mwi yaali. ⁴¹ . Awo nakwaata omukono gwa mwaala, namukoba ati talusa kumi ekitegeeza; mwaala nkukukoba imuka. ⁴² . Amangu ago omwaala naimuka, natambula; kubbanga yaali yakamala emyaka ikumi naibiri. Amangu ago ni bawuniinkiira okuwuniinkiira okukooto. ⁴³ . Nabakuutira muno buli muntu yeena- yeena obutamanyisya wundi: Nalagira bamuwe ekyakulya.