¹ Mutasalanga musango, muleme okusaarwa ² Olwakubba omusango gwe musala nnywena gulibasaarwa, era ekipimo kye mupimiramu, ekyo kyemulipimirwa nnywena. ³ Ekikukuloleerya kiki akantu akali oku riiso ly’o mugandewaamu, baitu notofeyo ku bineni abiri omu maiso gaamu we? ⁴ Oba olimukoba otyai omuganda waamu nti leka nkutooleku akantu akali oku riiso lyamu, baitu bona ebineni ebicaali oku riiso lyaamwe ⁵ Kiweweitawe, sooka otooleku ebineeni ku riiso lyamu we, leke obone kusai okutoolaku akantu akali oku riiso lya mugandawaamu. ⁶ Timuwanga mbweene kintu kiikiiri, era temunaganga ''eikura'' lyaanywe mu maiso ga mberege, zireme okuziniiniira namagulu gaazo, nizibayindukira okubanena. ⁷ Musabe muliweebwa, muswagane, mulibona, mweyanjule, muli iguurwawo. ⁸ Kubbanga buli muntu asaba aweebwa, aswaaga, abona, eyeyanjula, aiguurwawo. ⁹ Oba muntu ki okiuniinywe, omwana wanwei nalimusaba emere alimuweerya eibbaale. ¹⁰ Oba nalimusaba oncwi, alimuweerya enjoka? ¹¹ Ale nnywe, ababbi, nka nimumaite okuweerya abaana banywe ebintu ebisai oitaanywe ali omwiguru talikiicaawo muno okubaweerya ebisai abamusaba? ¹² Ale byona bye mutaka abantu okubakooraanga nywe, nanywe mubakoorenge bo mutyo kubanga ekyo nigo amateeka na bannabbi. ¹³ Mwingire omumulyango ogufundi, kubanga omulyango ogugazi, n'enzira eira omu kuwerekeera jikooto, nabo abalyakalamu baingi. ¹⁴ Kubanga omulyango ogufundi n'enzira eira omubwoomi lya kwemigiirya, n'abo abalibona badooli. ¹⁵ Mwekuume aba nnabbi ababubeyegi, abaizira omu bizwalo byantaama mudi, baitu nkaomunda ''nigyo misege.'' ¹⁶ Mulibeetejerya kubibala byabwe. Abantu bonokola batyai ezabbibbu oku kagaando, oba omutiini oku kajumbura? ¹⁷ Nakityo omusaale ogusai gwerya ebibala ebisai, baitu omusaale ogubbi gwerya bibala bibbi. ¹⁸ Omusaale ogusai tigwerya bibala bibbi, erate n'omusaale ogubbi tigusobola kwera bibala bisai. ¹⁹ Buli musaale oguteera kibala kisai bagutema nibagunaga omu muuro. ²⁰ Ale mulibetejerya ku bibala byaabwe. ²¹ Buli muntu ankoba aati, 'mukama wanje, tiniye alingira omubukama obwa mwiguru, wabula akola oitange ali mwiguru byataka. ²² Bangi balinkoba okulunaku ludi bati, 'mukama waiswe, mukama waiswe, titwalaguuraanga mwibara nyamu, titwapekaanga emizimu mwibara lyamu, titwakolanga ebyamaamo ebingi mwibara lyamu? ²³ Aale nimbatuura nti timbamanyangaku nnywe: Muzwe wendi nnywena abakoore byabukakanyali. ²⁴ Buli muntu awuura ebigambo byange ebyo, n'amala nabikola, nimwo alizwa n'aisanisibwa n'omusaiza ow'awangezi eyayombokere enyubba yaamwe okulwaazi. ²⁵ Oikendi natoonya, ekinyeeri nikikulukuta, ekimpuungwo nikiwunga, nibikubba ennyumba eyo, baitu n'etagwe, olwakubba yayombokeibwe kulwazi. ²⁶ Nabuli muntu nawuura ebigambo byange ebyo natabikole, alisanisibwa nk'omusaiza onambula magezi, eyayombokere enyubba yaamwe okumusenyi. ²⁷ Oikendi nagwa ekinyeeri nikikulukuta, ekimpangwe nikiwunga nibikubba ennyubba eyo, n'eggwa, n'okuggwa kwayo nikubba kukooto. ²⁸ Olwaikire Oyesu niyamaare ebigambo ebyo, ebibbuura nibyewuunya okwegesya okwamwe. ²⁹ Kubbanga yabegeserye nka omukama wa buyinza, baitu tinka abawandiki babwe.