¹ . Ale oYesu ni yabyaliibwe omu Beserekemu omu Buyudaaya omu miijo za Kerode omukama, bona, abakabukikabuki ni bazwa ebuluwuka isana ni baiza e Yerusalemi, ² nka bakukoba bati; alai oyo eyabyaalibwe Omukama wa Bayudaya? twaboine enyenyenzi ebuwuluka isana nitwiza oku mulrmya. ³ . OKerode omukama, niyawuliire natuntura amwei n.abamu Yerusalemi boona boona, ⁴ . Nnakumbbaania abaliisya abakulu boona boona amwei n’abawandiiki b'abantu nababuulya nti oKristo alibyalibwa ayi? ⁵ . Boona nibamukoba bati; omu Beserekemu omu Bayudaaya: Olwakubba nimwo kyawandikiibwe kityo omurangi. ⁶ . Weena oBeserekemu, ensi ya Yuda, toli mudooli omu balangira ba Yuda: olwakubba afuga alizwa mu niiwe. Aliriisya abantu bange oIsiraeri ⁷ . Ale oKerode nayeta abakabukikabuki mu kyaama nababuuliirya muno ebiro enyenyenzi bye maare nka ekuboneka. ⁸ Nabatuma e Beserekemu, nabakoba ati; mwaabe mutoolye kusai, mu bone, omwaana nayayana, nimwabba mu muboine mwiize munkobere nanje leke nyize muramye. ⁹ . Nibawuliire omukama, nibaaba; bona, enyenyenzi eyo jibaaboine ebuwuluka isana nebeekulembera, neiza neyemeera aigguru wa mwaana waali ¹⁰ . Nibaboine enyenyenzi nibasemeerwa muno. ¹¹ Nibaingira omu nnyumba nibabona omwaana n’oMalyamu omaamwe, nibainama nibaramya omwaana; nibasindabula ensawo zaabwe nibamuweeryo ebisiimo ebya zaabu, n'obubaani n'omusutai. ¹² . OKanca niyabalabuliire omu kirooto, baleme kwirayo eddi oKerode, nibairayo ewaabwe omu nzira ejindi. ¹³ . Bona, nibamaare baaireyo, ontumwa wa Mukama nabonekera oYusufu omu kirooto, nka akumukoba ati; imukka otwaale omwaana n’omaamwe, oirukire e Misiri, obbe eyo okwiica nje ninalikukoba; olwakubba oKerode akwiiza okutoolya omwaana oku mwitta. ¹⁴ . Yeena naimuka natwaala omwaana n'omaamwe obwiire nayaba e Misiri. ¹⁵ . nabba eyo, okwiica oKerode niyafiire; ekigambo kiikiire Omukama ki yasimoleire omu muranji; nk’akukoba ati; Nayetere omwaana wange okuzwa omu Misiri. ¹⁶ . Ale oKerode niyaboine nka abalaguli bamwinaize, nagongera muno, natuma okwitta abaana ba bwoojo boona boona abaali e Beserekemu, n'oku nsaro zaamwe zoona zoona, abakwiica emyaaka eibiri n’abacaali kujiica nk’ebiro bi yabuliriirye omuno abalaguli nibyaali. ¹⁷ . Ale ekigambo kya muranji oYeremiya kye yasimoire ni kiryooka nikikiira nka niyakobere. ¹⁸ . Eiraka lya wuliirwe omu Laama, okukunga n'okuwoloma okwinji, oLaakeeri nk’akukungiira abaana baamwe; olwakubba teyatakire kusaasirwa, olwakubba tiwacaali. ¹⁹ . Baitu, oKerode niyamaare okufa, bona, Ontumwa wa Mukama nabonekera oYusufu omu kirooto e Misiri. ²⁰ . Nka akumukoba ati; imukka, otwaale omwaana n’o maamwe, oyabe omu nsi ya Isiraeri: olwakubba abaali bakutoolya omwaana oku mwitta bafiire. ²¹ Naimuka, natwaala omwaana n’omaamwe, naiza omu nsi ya Isiraeri. ²² Baitu niyawuliire ati Alukerawo niye mukama wa Bayudaaya nka agwetere oitaamwe oKerode, natiina okwiirayo. Baitu oKanca niyamulabwiire omu kirooto, nakimbyakimbya nayakala oku lubaju lwa Ggaliraaya. ²³ Naiza n'abba omu kyaalo, eibara lyaakyo Nazaaleesi; ekigambo omuranji kiyakobere kiikiire kiti alyetebwa Munazaalayo.