¹ Nabetera amwei abeegereswa baamwei eikumi nababiri nabawa amaani no buyiinza oku badaimooni boona boona n’okutamba endwaire. ² Nabatuma okukoba obukama bwa Kanca n’okutamba abalwaire. ³ Nabakoba ati timutwaala kintu kya munzira, gonze omwiigo, gonze olukobba, gonze emmere, gonze effeeza; erate timubba na kanzu ibiri. ⁴ Nabuli nnyumba ji mwangiranga, mubbe omwo, erate nimwo mubbe muzwenge. ⁵ Erate boona booona abatabaikirizenge, ni mubba nka mukuzwa omu kibuga ekyo, ocucu wa magulu ganywe mu mukunkumulenge abbe omujuurwa jibali. ⁶ Ale ni baaba nibetoolola omu bibuga byoona byoona nka bakukoba enjiri, nka bakutamba abantu omu buli kifo. ⁷ Ale omukama oKerode owaisaza nawuura byoona byoona ebyakoleibwe; nabitankana muno olwakubba abantu bakobera bati oYokana ayimbookere omu bafu. ⁸ Abandi bati Eriya abonekere; n’abandi bati abaranji abairai omwei aku bo ayimbookere. ⁹ OKerode nakoba ati oYokana ninje namutemereku omutwei: baitu naani oyo gwe nkuwuuraku ebigambo ebikwenkana awo? nayendya oku mubona. ¹⁰ Ale abakwenda ni bamaare okwiira, ni bamukoba byoona byoona bi bakoore. Nabatwaala niyayawula nayaba nabo mu kyaama omu kibuga ekyetebwa Besusayida. ¹¹ Baitu ebibbuura ni betejere ni bamusengeerya: na baaniriza, nabaza nabo ebigambo eby’abukama bwa oKanca, nabaali bakwendya okutambibwa ni batambibwa. ¹² Ale eisana lyaali likugwa, abo eikuni nababiri nibaiza jaali ni bamukoba bati siibula ekibbuura baabe omu mbuga n’omu byaalo bya ampi babbasye, baswaage eby’akulya; olwakubba ani tuli mu mutala gwereere. ¹³ Nabakoba ati nywe mu bawe eby’akulya.Ni bamukoba bati Titulina kintu okwiyaku emigaati eitaanu ne binagge ebibiri; kyonkai twaabe tubaguure eby’akulya abantu banu boona boona? ¹⁴ Olwakubba baali abasaiza nk’enkumi itaanu. Nakoba abeegereswa baamwei ati mubaikalisye abantu ataanu ataanu. ¹⁵ Ni bakola batyo, ni babaikalisya boona boona. ¹⁶ Nairira emigaati eitaanu ne binagge ebibiri, naimula amaiso omwigguru nabyebalya, nabiwendamu, nawa abeegereswa baamwei oku bita omu maiso ga beegereswa. ¹⁷ Ni balya ni baikuta boona boona; nibakumbbania obukunkumuki obwasigaire ebsira ikumi na bibiri. ¹⁸ Ale olwaikire niyaali nka akusaba yenkai, abeegereswa baamwei baali amwei naye. Nababuulya nka akukoba ati ebibbuura binyeta naani? ¹⁹ Ni bairamu nibakoba bati Yokaana omubatiza; baitu abandi bati Eriya; n’abandi bati omwei oku baranji abeirai ayimbookere. ²⁰ Nabakoba ati baitu nywei munyeta naani? OPeetero nairamu namukoba ati niiwe Kristo wa Kanca. ²¹ Baitu nabakalatira nabakoba baleme kukoberaku bantu kigambo eky;. ²² nk’akukoba ati kisaniire omwaana wa muntu okuwaralibwa ebiingi, n’okuganibwa abakaire na bakabona abakulu n’abawandiiki, n’okwittibwa, erate oku lunnaku olwa kasatu okuyimbooka. ²³ Nabakoba boona boona ati omuntu nataka okunsengeerya, yefirize yenkai yetiikenga omusalabba gwaamwei buli lunnaku ansengeerye. ²⁴ Olwakubba ayendya okucungura obwoomi bwaamwei, ali bubulya; baitu buli alibulya obwoomi bwaamwei oku lwange oyo alibucungura. ²⁵ Olwakubba kiri mugasaaki omuntu okulya ensi yoona yoona nka yebuurye, obate nka yetundire? ²⁶ Olwakubba buli ankwatirwa ensoni nje n’ebigambo byange ,oyo n’Omwaana wa muntu ali mukwatirwa ensoni na liizira omu kitinisya kyaamwei n’omu kyaitaamwe n’omu ky’abantumwa abaikiiri. ²⁷ Baitu nkubakoba mazuma nti walowo abemereire anu abatalibona ku kufa okwiica nibalibona obukama bwa Kanca. ²⁸ Ale olwaikire oluzwanyuma oYesu lwa bigambo ebyo nka waakairewo ennaku munaanai, natwaala oPeetero n’oYokana, n’oYakobo,naniina oku lusozi okuramya. ²⁹ Ale niyaali akusaba ekisani kya maiso gaammwe nikibba kindi, ne kizwaalo kyaamwei nikibba kyeru nka kikupirikita. ³⁰ Ale, bona, abantu babiri nibabaza naye, abo baali oMusa n’Eriya. ³¹ Ababonekere nka baliina ekitinisya, nibabaza oku kufa kwa kwaaba okwikiriirya omu Yerusaalemi. ³² Ale oPeetero ne beyaali nabo baali bakwatiibwe otulo, Baitu ni bagalabukire ni babona ekitinisya kyaamwei n’abantu ababiri abemereire waali. ³³ Ale olwaikire ni baali nka bakwaaba okwawukana naye, oPeetero nakoba oYesu nti Mukama wange, kisai iswe okubba anni; tomboke ensisira isatu, emwei yaamu, emwei ya Musa, emwei ya Eriya; nka tamaite kyakubaza. ³⁴ ALe niyaali nka akyabaza ebyo, ekicu nikiiza ni kibasweeka: ni bangiire omu kicu ni batiina. ³⁵ Eiraka ni riwuka omu kicu ni likoba liti oyo niye omwaana wange gwenalondere: Mumuwuure ye. ³⁶ N’eraka eryo niryaizire, oYesu naboneka yenkai. Boona nibasirika mbbe, ennaku ezzo nibatakoberaku muntu kigambo kyoona kyoona okweebyo bibaboine. ³⁷ Ale olwaikire oku lunnaku lwa kabiri ni bazwiire oku lusozi, ekibbuura ekikooto ni kimutangarana. ³⁸ Erate, bona, omuntu owa kibbuura nabazira aigguru nakoba ati omwegesya, nkwegayiriire okubona oku mwaana wange, olwakubba namubyaire omwei: ³⁹ erate, bona, odaimooni amukwaata nakunga amaangu ago; namonola, n’okufekeera ejjovu, erate amuzwaaku lwa maani, amumenyeremenyere muno. ⁴⁰ Nanje neegayiriire abeegereswa baamu oku mumugobaku ni batasobole. ⁴¹ OYesu nairamu nakoba ati nywe abamirembe ezitaikiriza, erate ezakyaamire, ndikyaai okubba nanywe n’okubaguminkiirya? leeta annu omwaana waamu. ⁴² Ale yaali nka Lukka akyaali, odaimooni namunaga namonola muno. Baitu oYesu naboigoora odaimoomni namutamba omwojjo namuweerya edi oitaamwe. ⁴³ Boona boona ni bawuninkiira olw’abukulu bwa Kanca. Baitu boona boona nibaali nka bakwewunya byoona byoona biyakoore, nakoba abeegereswa baamwei nti ⁴⁴ Ebigambo ebyo mubiteeke omu matwi ganywe: olwakubba omwaana wa muntu akawaba kuwebwaayo omu mikono za bantu. ⁴⁵ Baitu bo nibateteja kigambo ekyo, erate kyaali kibakwekeibwe baleme okukyeteja: ni batiina oku mubuulya ekigambo ekyo ni kiri. ⁴⁶ Ale niwabbaawo okuwakana ejibali alibba omukulu omu bo naani? ⁴⁷ Baitu oYesu niyaboine okuwakana omu myooyo zaabwe, natwaala omwaana omuto,namuta ampi naye, ⁴⁸ nabakoba ati buli eyasemberyanga omwaana omuto onu omwibara lyaange, abba asembeirye ninje, na buli eyasemberyanga nje nka asemberye eyantumire: olwakubba asinga obuto omu nywe nyweena oyo niye mukulu. ⁴⁹ OYokaana nairamu nakoba ati Mukama wange, twaboine omuntu nka akugoba odaimooni omwibara lyaammu, nitumugaana, olwakubba tatambula naiswe. ⁵⁰ Baitu oYesu nakoba ati Timumugaana; olwakubba ataali munanzigu wanywe, ali ku lwanywe. ⁵¹ Ale olwaikire ennaku zaamwe eza kutwalibwa aigguru nizaali nka zatera okawiika, nasaarawo kimwei okwaaba e Yerusaalemi, ⁵² natuma abakwenda omu maiso gaamwei; ni baaba nibangira omu mbuga y’Abasamaliya okumutekera. ⁵³ ni batamusemberya, olwakubba amaiso gaamwe gaali galangire kwaaba Yerusaalemi. ⁵⁴ Abeegereswa baamwei oYakobo n’oYakaana ni baboine ni bakoba bati Mukama waise, okwendya tulagire omuuro guzwei omwigguru gubazikiirye, nka Eriya ni yakoore? ⁵⁵ Baitu nayiduka nabanenya nabakoba ati Timumaite omwooyo ni guli gwe muta nagwo.Olwakubba omwaana wa muntu tiyaizire kuzikiirya bwoomi bwa bantu, wazira oku bucungura. ⁵⁶ Ale ni baaba omu mbuga ejindi. ⁵⁷ Ale ni baali nka bakwaaba omunzira, omuntu namukoba ate nakusengeeryanga wewayabanga woona woona. ⁵⁸ OYesu namukoba ati ebibe biriina obwiina, n’ebinyonyi ebibba omwibbanga biriina ebisairo, baitu omwaana wa muntu taalina wata mutwe gwaamwe. ⁵⁹ Nakoba owondi nti Nsegeerya, Baitu ye namukoba ati Mukama wange ndeka mmale okwaaba okuziika oitaange. ⁶⁰ Baitu, namukoba ati lekka abafu baziike abafu abairaabwe, baitu we yaba okobe obukama bwa Kancca. ⁶¹ N’owondi nakoba ati nakusengeerya, Mukama wange; Baitu sooka ondeke mmale okusiibula ab’amu nnyumba yange. ⁶² OYesu namukoba ati Ndoowo muntu akwaata ekyooma ekiruma nalola emabega asaanira obukama bwa Kanca.