¹ Ale oluzwanyuma olwebyo Mukama waiswe nalonda abandi nsanju, nabatuma babiri babira omu maiso gaamwei okwaaba omu buli kibuga no mu buli kifo jakwaaba okwiiza. ² nabakoba ati okukungula kwaamwe kwinji, baitu abakunguli nibo badooli: ale musabe oKanca wa kukungula atume abakunguli omukukungula kwamwei. ³ Mwaabe: bona, nkubatuma nywe nka abaana bantaama akati omu misege. ⁴ Timutwaala nsawo, gonze olukobba, gonze enkaito; baitu timulamukya muntu yeena yeena omunzira. ⁵ Na buli nnyumba jimwangirangamu, mwekere mukobe muti emirembe jibbe omu nnyumba munu. ⁶ Obate nka mulumu omwaana owa mirembe, emirembe zaanywe jabanga omwo. Baitu, obate nka tinikyo, zairanga jimuli. ⁷ Mubbenge omu nnyumba omwo nka mukulya ,nka mukunywa ebyawaabwe, olwakubba omukoli wa murumo asanira empera yaamwe ye. Timuzwanga mu nnyumba emwei ni mwingira omu jindi. ⁸ Nabuli kibuga kimwaikangamu ni babasemberya mulyenge buli bye batanga omu maiso gaanywe; ⁹ mutambenge abalwaire abalumu, mubakoberenge muti Obukama bwa Kanca bubasembereire ampi. ¹⁰ Baitu, buli kibuga ki mwaikangamu ni batabasemberya, mwawulukanga omu nzira zaakyo, mukobenge muti ¹¹ nocuucu wa mu kibuga kyaanywe, atwiizwire oku magulu, tujibakubbaigura nywe; Baitu mweteje nka Obukama bwa Kanca busembeire. ¹² Nkubakoba nnywe nti oSodomu eribba nokuwarailibwa okuliguminkirizika oku kiro kidi okusinga ekibuga ekyo. ¹³ Zikwajirye, oKolazini! Zikwajirye,Besusayida! olwakubba eby’amaani eby’akoleibwe ewaanywe, siinga by’akoleirwe Ttuulo no Sidoni, siinga bayendekere emyoyo irai nka baikaire omu bikekera neikoke. ¹⁴ Baitu oTtuulo no Sidoni biribba no kuwaralibwa okuliguminkirizaika oku kiro eky’amisango,okusiinga nywe. ¹⁵ Naawe oKaperunawumu, olitumbizibwa okwiika omwigguru? olyanulibwa okwiika omu magombe. ¹⁶ Awuura nywe, nk’awuura ninje; erate anyooma nywe, abba anyoomere ninje; n’oyo anyooma nje abba anyoomere eya ntumire. ¹⁷ Ale abo ensanju ni baira neisanu, nka bakukoba bati Mukama waiswe na badaimooni batuwuura omw’ibara lyaamwe. ¹⁸ Nabakoba ati naboine oSetaani nka akuzwa omw’igguru okugwa nk’okuserya. ¹⁹ Bona, mbbawaire obuyinza obwa kweema oku njoka nenjaba eza busagwa n’amaani goona goona aga munanzigu: erate, ndoowo kintu eky’abakolanga okubbi nakadooli. ²⁰ Baitu ekyo timukisanyukira, olwakubba abadaimooni babawuura, baitu musemeerwe, olwakubba amabara ganywe gawandikiibwe omw’igguru. ²¹ Ale omu saawa eyo nasemeerwa omu mwooyo omwikiiri, nakoba ati nkukwebalya, Itange Omukama waigguru n’ensi, olwakubba binu wabikweekere abagezi nabakabukikabuki, n’obiswekuura abaana abato: nimwo mbbe, Itange,olwakubba nimwo kyasimiibwe kityo omu maiso gaamu. ²² Byoona byoona byampeweibwe Itange; ndoowo muntu amaite omwaana nali,wazira Oitaiswe; gonze Oitaiswe nali,wazira omwaana, n’oyo omwaana gwa yendya okumuswekuura. ²³ naindukira abeegereswa baamwe nabakoba omu kyaama ati galiina omukisa amaiso agabonia bi mubona: ²⁴ Olwakubba nkubakoba nti baranji baiinji na bakama bayendyanga okubona bi mukubona ni batabibone; nokuwuura bimukuwuura ni batabiwuura. ²⁵ Ale, bona, omwegesya wa mateeka nayemeera nk’akumoyera nk’akukoba ati omwegesya nkole ntyai okusikira obwoomi obutawaawo? ²⁶ oYesu namukoba ati kyawandikiibwe kityai omu mateeka? osoma otyai? ²⁷ Nairamu namukoba ati yendyanga oKanca waamu no mwooyo gwaamu goona goona n’emeeme yaamu yoona yoona, n’amaani gaamu goona goona’ na magezi gaamu goona goona; no mulirwaana waamu nka we ni weyendya wenkai. ²⁸ oYesu namukoba ati oiremu kusai, kola otyo wabbanga n’obwoomi. ²⁹ Baitu ye obutayendya kuwangula, nakoba oYesu ati omulirwaana wange niye naani? ³⁰ OYesu nairamu namukoba ati waalowo omuntu eyaali akuzwa eYerusaalemi nka akwikiira eYeriko; nagwa omu bazigu, ni bamwambula, ni bamukubba emiigo, ni nibaaba nibamuleka nk’alampi okufa. ³¹ Ale Okabona yaali akwikiira omu nzira eyo nka tamanyirire; ale niyamuboine namukengeita nayakalawo. ³² No Muleevi atyo niyaikire omu kifo ekyo namubona namukengeita nayakalawo. ³³ Baitu, oMusamaliya niyaali nka akutambula, naizza waali: niyamuboine namukwatirwa ekisa, ³⁴ namusembeera, namusiba ebirwaire byamwei, nk’akusukamu amafuta, no mwenge; namuta oku kisolo kyaamwe namuleeta omu kisulo eky’abageni namulabiira. ³⁵ Ale ni bwakeire emambya natoola eddinaali ibiri naziwa Omukama wa nnyumba namukoba nti mulabiire, ne kintu kyoona kyoona kyoliwaayo okusiingawo, nindiira ndi kusasula. ³⁶ Ale okulowooza otyai, alai okwaabo abasatu eyaali omulirwaana w’oyo eyagwiire omu bazigu? ³⁷ nakoba ati odi eya mukoleire ebya kisa. OYesu namukoba ati naawe yaba okole otyo. ³⁸ Ale nibaali bakwaba naingira omu kyaalo: Omukali eibara lyaamwei Maliza namusemberya omu nnyumba yaamwe. ³⁹ Baitu yaliina omuganda waamwei ayetebwa oMalyamu, eyakalanga awali amgulu ga mukama waiswe, nawuuranga ekigambo kyaamwei. ⁴⁰ Baitu, oMaliza yabbanga ne mitawaana eza kuweereza ziingi, naiza waali oYesu namukoba ati Mukama wange tofiireyo nka omuganda wange andekere okuwereza njenkai, ale mukobe anyambe. ⁴¹ Baitu, Omukama waise nairamu Lukka namukoba ati Maliza, weralikiira, oliina emitawaana ja bigambo ziinji. ⁴² Baitu ekikwendyebwa kiri kimwei: olwakubanga oMalyamu alonderewo omugabo ogwo ogusai, ogutalimutolebwaku.