¹ Ale olwaikire omu nnaku ezo eiteeka ni rizwa edi oKaisaali Augusito ab’ansi zoona zoona okuwandiikibwa. ² Okwo nikwo kuwandiikibwa okwekereire okubbaawo oKuleniyo niyaali nka akufuga Obusuuli. ³ Boona boona ni baaba okwewandiika buli muntu omu kibuga kyewaabwe ⁴ No oYusufu nazwa e Nazaleesi omu kibuga kya Ggaliraaya naniina e Buyudaaya okwaaba omu kibuga kya Daudi ekyetebwa oBesirekemu, olwakubba yaali wa mu nnyumba erate wa mu kika kya Daudi. ⁵ yewandiike no Malyamu gwe yaali ayogereza nka alinda. ⁶ Ale olwaikire baali bakyaali eyo, ennaku zaamwe eza kubyaala niziika. ⁷ Nabyaala omwaana waamwe akwekeera namusweka omu ngoye eza bwaana obutto namubasisya omu luggo lwa nte, olwakubba tibaboine ibbanga omu kisulo kyabagenyi . ⁸ Waalowo abaliisya omu nsi eyo abaikalanga okwiitale nka bakukuuma ekisibo kyaabwe obwiire omu mpalo ⁹ Awo Ontumwa wa wa Mukama nayemeera we baali nekitinisya kya Mukama nikibetoloola nka kikunyerengeta ni batiina muno. ¹⁰ Ontumwa nabakoba ati mutatiina olwakubba, bona, mbaleteire ebigambo ebisai ebyaisanu erinji eriribba edi abantu boona boona. ¹¹ Olwakubba olwa leero abyaliibwe ji muli omucunguri omu kibuga kya Daudi niye oKristo Omukama waiswe. ¹² Kani niko kabonesyo ji muli; mwaabona omwaana enkerembe nka aswekeibwe omu bugoye nka bamubasisirye omu kisibo. ¹³ Ale ammangu ago walowo Ontumwa oyo amwe nabandi bainji aba mujje rya mwigguru nka bakuyangiriza oKanca nka bakukoba bati ¹⁴ Ekitinisya kibbe edi oKanca waiguru omuno, no mu nsi emirembe gibbe omu bantu abasiimibwa. ¹⁵ Ale olwaikire, abantumwa nibazwiire jibabbaire okwaaba omwigguru, abaliisya nibakobangana bati, ale twaabe e Beserekemu tubone ekigambo kinu ekibbairewo, Omukama kyatutegezere. ¹⁶ Ni baiza maangu ,ni babona oMalyamu no Yusufu n’omwaana onkerembe nka bamubasisirye omu kisibo. ¹⁷ Ale abasumba ni bamuboine, ni bategeeza ekigambo kibakobeibwe oku mwaana oyo. ¹⁸ Boona boona abawuliire ni bewunya ebyo abasumba bye babakobeire. ¹⁹ Baitu oMalyamu niyekumiranga ebigambo ebyo byoona byoona nka akubirowozaaku omu mitima gwamwe. ²⁰ Awo abaliisya ni bairayo nka bakugulumiza n’okwangiriza oKanca olwa bigambo byoona byoona bye bawuliire, bye babwoine, nka nibakobeibwe. ²¹ Awo ennaku omunaanai ni zaikire ezakukomorwaaamu, nayalikibwa eibara lyaamwe Yesu, lidi elyabaziibwe ontumwa nka akyaali kubba mu kidda. ²² Awo ennaku nizaikire eza kulongooka kwaabwe nka amateeka ga Musa ni gali, ni bamutwaala ni bamuniinisya e Yerusaalemi okumwanjuura Omukama ²³ nka ni kyawandikiibwe omu mateeka ga Mukama nti buli kisaiza ekiigulanda kyayetebwanga kikiiri edi Omukama, ²⁴ n’okuwaayo essadaaka nka ni kyabaziibwe omu mateeka ga Mukama, obukaamukukulu bubiri obate enkayuba ezito ibiri. ²⁵ Erate bona, waalowo omuntu omu Yerusaalemi eibara lyaamwe Simyoni, omuntu oyo yaali mwikiriri, erate nka atiina oKanca, nka alindiira okusanyusibwa kwa israeri, erate omwooyo omwikiiri yaali kuye. ²⁶ Oyo yaswekuliirwe omwooyo omwikiiri nti talibona kufa nka akyaali kubona ku Kristo wa Mukama. ²⁷ Naizira omwooyo omu yekaalu: abakaire baamwe nibaingiirye omwaana oYesu okumukola nka neeri empisa ya mateka, ²⁸ ale ye namukwaata omu mikono jaamwe niyebalya oKanca nakoba ati ²⁹ Mukama wange aati osiibule omwiiru waamu emirembe nka ekigambo kyaamu ni kyaali; ³⁰ Olwakubba amaiso gange gaboine obucunguri bwammu. ³¹ Buwatekeretekere omu maiso ga bantu boona boona: ³² Okubba eisana eryakumulisa amaanga, N’okubba ekitinisya kya bantu baamu oIsraeri. ³³ Oitaamwe no maamwe ni bewuunyanga ebigambo ebyo ebyamusimoirweeku. ³⁴ Ale oSimyoni nabasabira omukisa, nakoba oMalyamu omaamwe nti boona, oni aterebwewo bainji omu Isiraeri bagwenge, bayemerenge, no kubba akabonesyo akakuzumibwa; ³⁵ Erate we empirima erikusumuta omu meeme; ebirowoozo ebya myooyo eziinji biryooke biswekulwe. ³⁶ Ale waalowo omuranji omukali omuwaara wa Fanweri owa mu kika kya Aseri yali yakamala emyaka minji, yabbaire noibaamwe emyaaka musanju nafa. ³⁷ Baitu yaali namwandu nka yakamala emyaaka kinanai nenai, tiyazwanga mu yekaalu, nka aramya oKnca no kusiibanga no kwegayiranga emisaana n’obwiire. ³⁸ Oyo ni yaizire omu kiseera ekyo ni yebalya oKanca nakobanga ebigambo baamwe edi boona boona abaali balindirirye okucungulibwa kwa Lukka Yerusaalemi. ³⁹ Ale ni bamaare okwikiirya byoona byoona ebiri omu mateeka ga Mukama, ni bairayo e Ggaliraaya omu kibuga kya waabwe e Nazaalesi. ⁴⁰ Ale omwaana nakula, nayongerwaaku amaani, naizulibwa amagezi: ekisa kya Kanca nikibba okuye. ⁴¹ Ale abakaire baamwe bayabanga e Yerusaalemi buli mwaaka okumbaga yakwakalaku. ⁴² Ale ni yaali yakamala emyaaka eikumi neibiri, nabayambuka nka neeri empisa ya mbaga: ⁴³ ale ni baikirye ennaku zaabwe, baali nka bakwirayo, omwaana oYesu nasigala omu Yerusaalemi, na bakaire baamwe ni bateteja: ⁴⁴ Baitu ni balowooza nka ali mukibuura kyaabwe ni batambula olugendo lwa lunaku lumwei, ni bamutoolya omu baganda baabwe no mu mikwaano zaabwe. ⁴⁵ Ni batambula ni bairayo eYerusaalemi nka bakumutoolya. ⁴⁶ Ale olwaikire ni wayakaire ennaku issatu nibamwajja omu omwiramyo nka aikaire akati omu begesya nka bakuwuliirya nka akubabuulya: ⁴⁷ Boona boona abamuwuliire ni bawuninkiira olwa magezi gaamwe nokwiramu kwamwe. ⁴⁸ Ale ni bamuboine ni basamaliira: Omaamwe namukoba ati mwaana wange kiki ekitukukoleserye kityo? Bona, oiteewo nanje twakutoirye nka titukubona. ⁴⁹ Nabakoba ati mwantoleirye ki? timwamaite nka kinsaniire okubba omu bigambo byaitange? ⁵⁰ Nibateteja kigambo ekyo kiyabakobere. ⁵¹ Naikiira nabo naiza eNazaalesi nabagonderanga: Omaamwe ni yekuumanga ebigambo ebyo byoona byoona omu mwooyo gwaamwe. ⁵² Ale oYesu ni yeyongerangaku amagezi no kukula, no mu kisa edi oKanca nedi abantu.