¹ Ni baali abainji abatandikire okuwandiika amakuru aga bigambo ebyaikiriire omwiswe, ² nka nibatubikobeire abo abekereire okuzwa oku kwekeera okubba abajuurwa, erate abawereza ba kigambo. ³ Awo ninaswaganirirye ekimwe oku byoona byoona okuzwa oku olukwekeera, erate njeena naboine nka kisai okukuwandikira we oTeefiro omusai omuno, nka ni byaliraine; ⁴ olyooke omanye amazuma agabigambo bi wayegeseibwe. ⁵ Awo omu miijo ja Kerode omukama wa Buyudaaya waalowo okabona eibara lyaamwe Zaakaliya,owa mululyo lwa Abiya: erate yaali yaalina omukali owa mu baala ba Alooni eibara lyaamwe, Erizabesi. ⁶ Boona bakali babiri baali baikiriri omu maiso ga Kanca nka batambuura omu biragiro byoona byoona n’omu bya bwikiriri ebya Kanca nka tibaliku kabbi. ⁷ Erate tibaalina mwaana, olwakubba Erizabeesi yaali mugumba boona bakali babiri baali bakairikire omu myaaka jaabwe. ⁸ Awo olwakire ni yaali akukola omulumo ogwa bwa kabona omu maiso ga Kanca nk’olubu lwaamwe ni lwaliraine, ⁹ ale akalulu ni kamugwaaku nk’empisa eza bwakabona ni zaali okwiingira omwiramyo ya Kanca okwoteza obubbaani. ¹⁰ Ale ekibuura kyoona kyoona ekya bantu kyaali nka kikusabira nzai omu kiseera ekya koterezaamu. ¹¹ Ale ontumwa wa Kanca namubonekera nka ayemereire oku lwiigi olwa guryo olwa kyooto ekya kwoterezaaku. ¹² Ale oZaakaliya ni ya muboine ni yeralikiira, natiina . ¹³ Baitu ontumwa namukoba ati Totiina Zaakaliya, olwakubba okwegayiira kwaamu kuwuliirwe omukali waamu Erizabesi alikubyaara omwaana wabwoojo, olimwalika eibara Yokaana ¹⁴ Olisemeera,erate olisagamba,erate baiinji abalisemeerwa olwa kubyaalibwa kwamwei ¹⁵ Olwakubba, alibba mukulu omu maiso ga Kancca, erate talinywa mwenge gonze ekitamiirya; erate alizzulibwa omwooyo ogwikiiri okuzwa omunda ya maamwe. ¹⁶ Erate baiinji omu baana ba isirael alibairya eddi Omukama Kanca waabwe. ¹⁷ Alikulembera omu maiso gaamwe omu mwooyo namaani ga Eriya okwiirya emyooyo ja baizeizza eddi abaana, nabatawuuranga okutambuura omu magezi gabakiriri; okutegekera oKanca abantu abatekeibwetekeibwe. ¹⁸ Ale ozakaliya nakoba ontumwa ati Nakimanya ntyai ekyo? olwakubba nje ndi mukaire no mukali wange akairikire omu myaaka zaamwe ¹⁹ Ale Ontumwa nairamu namukoba ati ; ninje Gabulyeri ayemeera omu maiso ga Kanca, erate natumibwe okusumola naawe okukukobera ebigambo ebyo ebisai. ²⁰ Ale, bona, olisirika erate nka tokusobola kusimoola okwiica oku kiro lwe biribbaawo ebyo; olwakubba toikiriza bigambo byange ebirikiriira omu biro byaabyo. ²¹ Ale abantu baali balindirirye oZakaliya, nibewuunya nalwiire omwiramyo. ²² Ale niyawulikire natasobole kusimola nabo; nibeteja nka aboine okwolesebwa omwiramyo: nalwaawo nka akubawenya na mukono nka akyasiruwaire. ²³ Ale olwaikire, Ebiro ebyakuweereza kwaamwe nibyaweireku nairayo eka ewaamwe. ²⁴ Ale ebiro ebyo nibyayakairewo omukali waamwe Erizabesi nabba enda: niyekwekera emyeezi etaanu nk’akukoba ati, ²⁵ nimwo atyo oKanca nankoore omu biro bi yandoleleiremu okunyiyaku ensoni omu bantu. ²⁶ Ale omu mweezi ogwa mukaaga ontumwa oGabulyeri natumwa oKanca omu kibuga ekya Galiraaya eibara lyaakyo Nazaleesi, ²⁷ edi omwaala atamaite musaiza eyakakwanibwa omusaiza eibara lyaamwe Yusuufu owa mu nnyumba ya Daudi; neibara lya mwaala Malyaamu. ²⁸ Ale naingira omwaamwe, nakoba ati mirembe we aweweibwe omuno ekisa ,Omukama ali naawe. ²⁹ Baitu, ye ni yeeralikiira ekigambo ekyo, nalowooza okulamuca okwo nikuli. ³⁰ Ale ontumwa wa Kanca namukoba ati Totiina Malyamu; olwakubba, oboine ekisa eddi oKanca. ³¹ Erate, bona, olibba ekida olibyaala omwaana wa bwoojo, olimwaalika eibara oYesu. ³² Oyo alibba mukulu, alyeetebwa mwaana wooyo ali aigguru omuno. Erate Omukama oKanca alimuweerya entebe ya Daudi ozeizza waamwe: ³³ erate yafuganga ennyumba ya Yakobo emirembe seregenyi, erate Obukama bwaamwe tebuliwaawo. ³⁴ Ale oMalyamu nakoba ontumwa ati kiribba kityai ekyo olwakubba timaite musaiza? ³⁵ Nontumwa nairamu namukoba ati omwooyo omwikiiri alikwiizira namaani gooyo ali aigguru omuno galikuswekeerya, erate ekyo ekiri byaalibwa nikyo kirizwa kyeetebwa ekikiiri, Omwana wa Kanca. ³⁶ 36 Bona, Erizabesi omuganda waamu erate, yeena ali nda ya mwaana wa bwoojo omu bukaire bwaamwe; guni nigwo mweezi gwaamwe ogwa mukaaga eyayetebwanga omugumba. ³⁷ Olwakubba, ndoowo kigambo ekirizwa edi oKanca ekitalibba namaani. ³⁸ OMalyamu nakoba ati, bona nje ndi muzaana wa Kanca; kibbe oku nje nka nonkobera. Ale Ontumwa naazwa waali ³⁹ Ale omu biro ebyo oMalyamu naimuka nayaba maangu omu nsi yansozi,omu kibuga kya oYuda; ⁴⁰ naiingira omu nnyumba ya Zaakaliya nalamuca Erizabesi. ⁴¹ Awo olwakire Erizabesi niyawuliire okulamuca kwa Malyamu, omwaana nagulukaguluka omunda yaamwe; Erizabesi naizulibwa omwooyo omwikiiri; ⁴² Nabazira aigguru neiraka erikooto nakoba ati oweweibwe omukisa we omu bakali, nekibala ekya munda yaamu kiweweibwe omukisa. ⁴³ Nanje ni, ekigambo kinu kizwiire Lukka ayi, omaama wa Mukama wange okwiiza jendi. ⁴⁴ Olwakubba bona, eiraka lyakulamuca kwaamu niringiire omu matwi gange, omwaana nagulukaguluka omu nda yange olwaisanu. ⁴⁵ aweweibwe omukisa eyaikiriize, olwakubba birikiriira ebyo bi wakobeibwe oKanca. ⁴⁶ OMalyamu nakoba ati Emeeme yange etendereze OMukama, ⁴⁷ N’omwooyo gusanyukire oKanca omuccunguri wange. ⁴⁸ Olwakubba abweine obunaku bwa muzaana waamwe; olwakubba, bona, okwekeera olwa leero aba miijo joona joona banyetanga aweweibwe omukisa. ⁴⁹ Olwakubba, omuyinza ankoleire ebikulu; neibara lyaamwe rikiiri. ⁵⁰ Nekisa kyaamwe kiri mu bamutiina Emirembe seregenyi. ⁵¹ Alangire amaani nomukono gwaamwe; assansanye abaliina amalala omu kutereera kwa mwooyo gwaabwe. ⁵² Agobere abafugi abeekulumbalya oku ntebe zaabwe, Atumbiirye abetowaaza ⁵³ Abaliina enzala abaikutisirye ebisai; nabaguuda abairukirye nka tibalina kintu. ⁵⁴ Ayambire oIsraeri omwiru waamwe aizukire ekisa kyaamwe, ⁵⁵ Nka niyakobere abaizeiza baiswe, edi oIbulaimu neibyaire lyaamwe emijjo joona joona. ⁵⁶ Ale oMalyamu namalayo emyeezi nk’eisatu naira ewaamwe. ⁵⁷ Ale omu biro bya Erizabesi nibiika okubyaala, nabyaala omwaana wa bwoojo. ⁵⁸ Abalirwana baamwe nabakika kyaamwe ni bawuura nka oKanca abaire wa kisa jaali ni basemeerwa amwe naye. ⁵⁹ Ale olwaikire oku kiro kya munaanai ni baiza okukomola omwaana; baali bakwendya okumwalika eibara lya Itaamwe oZaakaliya. ⁶⁰ Omaamwe nairamu nakoba ati bbe, baitu yayalikibwa oYokaana. ⁶¹ Nibamukoba bati ndoowo wa mu kika kyaamu ayetebwa eibara eryo. ⁶² Nibawenya oitaamwe bamanye nakwendya okumwalika. ⁶³ Nayendya ekipandde ekya ku wandiikaku, nawandiika nakoba ati eibara lyaamwe oYokaana ni bewuunya byoona byoona. ⁶⁴ Ammangu ago akanwa kaamwe ni kaiguka n’olulimi lwaamwe nilusindabuka nasimoola nka akwebalya oKanca. ⁶⁵ Boona boona abaali balirainewo ni batiina. Nebigamao ebyo byoona byoona nibibuna omu nsi yoona yoona eya Buyudaaya. ⁶⁶ Boona boona abawuliire ni babiita omu myooyo jaabwe, ni bakoba bati ale omwana oyo alibba atyai? olwakubba omukono gwa Kanca gwaali amwe naye. ⁶⁷ Oitaamwe oZaakaliya naizulibwa Omwooyo Omwikiiri, nalagula, nk’akukoba ati; ⁶⁸ Ayangirizibwe Omukama oKancca wa israeri; olwakubba accaliire abantu baamwe erate, abacungwire. ⁶⁹ Erate atwimukiirye eyembe erya bucunguri omu nnyumba ya mwiiru waamwe oDaudi. ⁷⁰ Nka niyasimoleire omu kanwa ka baranji baamwe abakiiri abalowo okuzwa ensi niyabbairewo. ⁷¹ okuccungrwa omu bananzugu baiswe n’omu mikono jaabo boona boona abatucaawa; ⁷² Okwikiirya ekisa kiyasubiize abaizeiza baiswe, N’okwizukira endagaano yaamwe Lukka ejikiiri. ⁷³ Okwikiirya ekirayiro kiyalairiire oizeiza waiswe oIbulayimu, ⁷⁴ okukiweerya iswe; iswe ni tucungurwa omu mikono ja bananzigu baiswe, leke tumuwerezenge nka tituluku ki tutiina. ⁷⁵ Omu bwikiiri n’omu bwikiriri omu maiso gaamwe ebiro byaiswe byoona byoona. ⁷⁶ Naawe, omwaana, olyetebwa muranji wooyo ali aigguru omuno: Okwakubba alikulembera oKanca okusairya amazira gaamwe; ⁷⁷ Okumanyisya abantu baamwe obuccunguri, ebibbi byaabwe bibatolebweeku. ⁷⁸ Olwa kisa kya oKancca waiswe ekisai, emmambya nikyo ezwiire etusaara ezwa omwigguru, ⁷⁹ Okwaakira abaikala omu ndikiirya n’omu kisikirize ekya lumbbe, okulungamya amagulu gaiswe omu nzira eya mirembe. ⁸⁰ Omwaana nakula, nayongerwaaku amaani omu mwooyo, nabba omu marungu okwiica oku kiro lwe yalangiibwe edi oIsraeri.