¹ OYakobo omwiru wa Kanca erate owa Mukama waiswe Oyesu Kristo, edi ebika eikumi nebibiri ebyayawukaine, mbalamukirye. ² Mulowoozenge ebyo byonabyona okuba ebisemerwa, bagandabange, nimwakemebwanga omungeri eteri emwe, ³ Mweteje nka okugezesebwa kwokwikiriza kwanywe kuleeta okuguminkiriza. ⁴ Erate omulumo ogwakuguminkiriza gwikiirenge leke mubbe abaikiriri, abali nabyo, abatawaamu nsai olwakigambo. ⁵ Omuntu omwe okunywe nawebuuka omumagezi, asabenge Okanca ataima agabira bonna atakayuka, erate galimuweebwa. ⁶ Oyo asabenge nokwikiriza, atabusabusa, oyo abusabusa ayaanana ekinyege kyakunyanja ekitwalibwa nka kikwegingaginga n’ompungo. ⁷ Omuntu oyo atasubiira nka aliweebwa ekintu kyonna kyonna okuzwa edi Mukama waiswe. ⁸ Omuntu owa myooyo eibiri, atagumira omumazuma agamazira gamwe. ⁹ Awaluganda omwooro yesimirenge olwabukulu bwamwe, ¹⁰ erate nomugaiga yesimirenge olwa kutoowazibwa kwaame, aliwaawo nke ekimuli kya mukisiiko. ¹¹ eisana lizwayo nokwaaka okwingi niliwotokya ekirime; ne kimuli kyakyo nikigwa, emboneka nebulawo. Kityo nomugaiga nimwo aliwotoka omukutambula kwamwe. ¹² Wa mukisa omuntu aguminkiriza okukemebwa; olwakubba nalimala okusimibwa, aliweebwa engule eyabwoomi, Omukama waiswe jeyasubize abamutaka. ¹³ Omuntu yena yena nakemebwanga, takobanga ati Okanca ankemere, olwakubba Okanca takemebwa na bubbi, erates omweyini takema muntu. ¹⁴ Baitu omuntu akemebwa, nka atutwalibwa okwegomba nokusendebwasendebwa kwamwe. ¹⁵ Okwegomba okwo nikulwoka nikubba endai, nekubyaala okusiisa, nokusiisa okwo nikukula, nikubyaala okufa. ¹⁶ Timwebeyeganga, baganda bange ¹⁷ Buli kisiimo ekisai, nekitone ekikiriri kizwa aiguru nka kikwiika okuzwa ewaitaiswe, owabyaka atainza kubba nakufukafuka gonze nekituuru okuyindukayinduka. ¹⁸ Olwakuteesa kwamwe yatubyaire nekigambo ekyamazuma, tosobole okubba nko omwaka ogwekera ogwabitonde byamwe. benyendya. ¹⁹ Mwetegye kini abaluganda abatakibwa buli muntu abbenge mwangu wakuwuura, baitu alwengewo okusimola, alwengewo okusimoola. ²⁰ Olwakuba obusungu bwamuntu tibukola bwikiriri bwa Kanca. ²¹ Ale mutenge alai obugwagwa bwonna bwonna nobubbi obwakalirirye, mutolenge mobuculeeri ekigambo ekisigibwa ekiinza okucungura obwomi bwanywe. ²² Baitu mubbenge bakoli bakigambbo, okusinga okuwuura mbbe nokwebeyegabeyega. ²³ Olwakubba omuntu naba awuliirya e'kigambo, nka timukozi ayanana nko omuntu eyeebona amaiso gamwe agabubyaare omumbonesio ²⁴ Olwakubba yebona nazwawo, ammangu ago niyerabira nka nakwiisana. ²⁵ Baitu oyo alangasira amateeka agaikiriri agaidembe natagaleke nka tawuriirya mbbe eyerabira baitu mukozi akola, oyo yawebwanga omukisa olwa kukola kwamwe. ²⁶ Omuntu yena yena niyerowooza nka waidiini, nateireku okululimi lwamwe baitu nka akwebeyega omu mwooyo gwamwe, eiddini yoyo ebba tegasa. ²⁷ Eiddini egirongoki atalumu nziro, omumaiso ga Kanca oitaiswe niyo eni, okulambulanga abasunzi n'abanamwandu omu bunaku bwaabwe, nokwekumanga obutaba nanziro eza munsi. Essuula 2