¹ Nywe Abagaalatiya abasurusu naani eya balogere, atenga mwalangibwe mu lwatu Oyesu Kristo eyakomererwe? ² Kini nikyo Conkai kyenkweendya okubabulya mwa weereibwe omwoyo lwabikolwa bya mateeka obba lwakuura kwa kwekiririza? ³ Mutyo nimwo mutalina magezi abasookeire omu mwoyo, aatubuni mukumaaliirya mumubiri? ⁴ Mwabweinebweine okwenkana awo kwabwereere? atenga tikwa bwereere. ⁵ Abaweerya omwoyo, akolo eby'amani omunywe, akola lwa mateeka obba lwa kuwuura kwa kwikiriiza? ⁶ Mubone Ibulagimu '' yaikireeze Okanca, nabaarwa okuba omwikiiriri.'' ⁷ Ale mweetejje nti abantu abaikiriza nibo baana ba Ibulahimu. ⁸ Ne kyawandikibwe, kyabweine irai nti Okanca aliwa abanamawanga obwikiiri lwa kwikiriza, enjiri nesoka okukoberwa Ibulayimu nti mu wwe amawanga goona goona nimwo galiweerwa omukisa.'' ⁹ Nimo kiri abbo abali omukuikiriza baweirebwe omukisa Ibulahimu gwe yaweirebwe ni yaikiirize. ¹⁰ Kubba boona boona abesigama Kubanga byamateeka bali ansi wakikolimo, kubba kyawandikibwe nti akolimirwe buli ataikiryeenge kukola byona, byona ebya wandiikibwe omu kitabo kyamateeka. ¹¹ Erate atibuni kimanyiibwa nti ndoowo Kanca gwawa obwikiiri olwakukuuma amateeka kubba,''oyo ali omukweikiriza niye mwikiriiri, naye alibba mwomi.'' ¹² Baitu amateeka ago tigesigama ku kukwiikiriza,''naye nti omuntu agakola ya banga mwomi omugo.'' ¹³ Kristo yatucungwiire okuzwa omucikolimo eky'amateeka, niya fuukiire ekikolimo ku lwaiswa kubba kyawandiiibwe nti Akolimirwe buli awanikibwa okumusaale. ¹⁴ Ale atibunni mu Kristo Yesu omukisa gwa Ibulahimu guika eddi abanamawanga, tusobole okuweebwa ekyasubiziibwe ekyamwoyo olwa kwikiriza. ¹⁵ Ab'aluganda nkusumoola mu buntu endagaano gonze nka ya muntu buntu n'emala okukakasibwa, ndoowo ajitoolawo gonze ajongeraku. ¹⁶ Atibuni ebyo ebyasubiziibwe byakobeirwe Ibulahimu n'omwaana waamwe. Baitu tukisumoola nti ''erate abaana baamwe nka baingi,'' baitu eddi omwee ''nka niye mwana,'' oyo niye Kristo. ¹⁷ Kini nikyo nkuteegeza amateeka gaizzirre nka wakairewo emyaka binai mwa asatu tigatolawo ndagaano OKanca jeeyali amaare okukakasa, okusoobola okudubbya ekyasubiziibwe. ¹⁸ Ale oba nka obusika buzwa mumateeka, buba tibukyaali bwa kusubiza Baitu Okanca yabuwaire Ibulahimu olwokusubiza. ¹⁹ Ale lwaki gateekebwawo? Gatebwaawo lwa kusisa, okwiikya nka omwana gwa basubiize ekisuubizo, erate galagiirwe bamalaika okwakaara mwoyo atugaitaganya. ²⁰ Erate atugaitangganya kitegeeza kwakala mwomwe, baitu Okanca alli omwe. ²¹ Ale olwo amateeka gawakana n'ebisubizo bya Kanca? tinimwo kiri kiba singa amateeka gawereibwa nka nigo gasobola okuleta obwoomi, ddala gasobola obwikiriiri bwendibaire mumateka. ²² Baitu ebyawandikibwa bitta ebintu byoona byoona kukibbi, olwa ekyo ekyasubizibwe. Olwa kwekiriza Okristo Yesu kisoobole kiweebwe ebbo abaikirrizza ²³ Baitu okwekirizanga nka kukyali kwiza twakumirwanga mu bugge bwa mateeka nka olwakwikiriza okwaali kukwaba okutusweekurwa. ²⁴ Kityo amateeka gatukuuma okwiica Okristo niyaliiza, tusobole okuwebwa obwikiiriri olwa kwikiriiza. ²⁵ Baitu atibuni okwikiiza nka kumaare okwiiza tetukyaali ansi wa mukuumi. ²⁶ Olwo kubba mu kristo Yesu nnyweena nyweena ababatizibwe muli baana bakanca. ²⁷ Olwakuba nnywena ababaatizibwe okwingira omu Kristo. Mwazwaire Okristo. ²⁸ Ndoowo muyudaaya, gonze omuyonaani, ndoowo musaiza gonze mukali; olwa kubba nywena nywena muli omwee mukristo Yesu. ²⁹ Erate nnywe nimwaali aba kristo. kale muli lubyaalo lwo ibulayimu. Erate muli basika ngo okusubiza nikwaali.