¹ . Abakama ba bairu, mwakalye nga mubwenkanya banywe nga nanywe muli no mukama waanywe omu iguru. ² . Mwekalangulenga omu kusaba, nga mulindiira n'okwebalya; ³ . Era naiswe mutusabire, OKanca atwiguurewo olwigi lwa kigambo, okutegeeza ekigambo kya Kristo, n'okusibibwa kyenasibiirwe. ⁴ . Leke nkitegeeze kusai nga ni kinsaniire ⁵ . Mutambuurenga omu magezi eri abo aba nzai nga mukolesya kusai ekiseera kye muli nakyo. ⁶ . Ebigambo byanywe bibbenga ne kisa ennaku zona zona nga binoga omunyu leke mumanye ni kibasaniire okwanukulanga buli muntu yena yena ⁷ . OTukiko, owa luganda, owa mukago era omuweereza omwesigwa era omwiru mwiraiswe omu mukama waiswe alibategeeza byona byona ebinfaaku. ⁸ . Nikyo nzwa mutuma gye muli olwa nsonga eyo, leke mutegeere ebifa gye tuli era asanyuse emyoyo gyanywe; ⁹ . Amwe n'onnessimo, owa luganda omwesigwa owa mukago owe waanywe. Balibategeeza byona byona ebifa ¹⁰ . Alisutaluuko, omusibe omwirange, no Makko, omwiwa wa balunabba, gwe babakobeireku akwiza gye muli mumwanirizanga. ¹¹ . N'OYesu ayetebwa OKristo abalamukirye abo nibo ab'omubataire bonkai, abakozi abairange omubukama bwa Kanca abanyiryamu eissuubi. ¹² . Epafula, owa wanywe, omwiru wa Kristo Yesu, abalamukirye, yekamba ennaku zona zona okubasabira omu kusaba kwanywe, leke mwemeerenga nga muli baikiriiri era nga mutegeereranga kimwe omu byona byona OKanca byataka. ¹³ . Kubba muwa obujulizi nga niyekamba omuno oku lwanywe n'ab'omu lawodikiya, n'ab'omu kiyerapoli. ¹⁴ . Lukka, omusawo owamukago, n'ODema ¹⁵ . Mulamukye aba Luganda ab'omu Lawodikiya, ne Nunfa, n'ekkanisa ey'omunnyumba yaabwe. ¹⁶ . Era ebbluwa enu n'emalanga okubasomerwa nywe, mubone nga esomerwa n'ab'ekkanisa y'omu Lawodikiya; era nanywe musome erizwa e Lawodikiya. ¹⁷ . Era mukobe alukipo nti, "Bona nga oikiirya okuweereza kwamwe waweebeibwe mu mukama waiswe" ¹⁸ . Ninje Paulo, ninje mpandiikire okulamukya kunu n'omukono gwange. Mwizukirenga okusibibwa kwange. Ekisa kibbe nanywe.