¹ .Mumbonerengeku, nka nje nimbonera oku Kristo. ² . Mbatendereza olwakubba munyizukira omu byoona byoona, erate mugumya bye mwaweweibwe nka ni nabibawaire. ³ . Baitu nkwendya nywe mu mmanye nka omutwe gwa buli musaiza niye Kristo; n'omutwe gwa mukali niye musaiza; no mutwe gwa Kristo niye oKanca. ⁴ . Buli musaiza naramya obate nabuulira omutwe gwaamwe nka guswekeibweku, aswaaza omutwe gwaamwe. ⁵ . Baitu buli mukali naramya obate nabuulira nka omutwe gwaamwe tiguswekeibweku, aswaaza omutwe gwaamwe, olwakubba abba nka agembebweku. ⁶ . Omukali nabba takwandya kusweeka ku mutwe gwaamwe, ale agembebwengeku eisoke lyaamwe: baitu obate nka kya nsooni omukali okugembebwaku eisooke obate obate okusayiirya, aswekebwengeku. ⁷ . Olwakubba omusaiza tikimugwanire kuswekebwanga ku mutwe gwamwe, olwakubba oyo niye kiisani n’ekitinisya kya Kanca: Baitu omukali niye kitinisya kya musaiza. ⁸ . Olwakubba, omusaiza tiyazwiire mukali; wazira omukali niye yazwiire omusaiza. ⁹ . Erate olwakubba omusaiza tiyatondeibwe kuzwa mu mukali, wazira omukali niye yazwiire omu musaiza. ¹⁰ . Nikyo kizwa kisaanira omukali okubbangaku akabonesio oku mutwe gwaamwe, okulanga nka ali ansi wa buyinza n’olwa bantumwa. ¹¹ . Baitu kyonkai, omu Mukama waiswe, omukali tabbaawo awataali musaiza, erate no musaiza awataali mukali. ¹² . Olwakubba omukali nka niyazwiire omu musaiza, erate omusaiza nimwo atyo abyalibwa mukali; baitu byoona byoona bizwa edi oKanca. ¹³ . Ale nyweena musalewo, kisanira omukali okuramya oKanca nka taswekere ku mutwe? ¹⁴ . Obubyaale bwonkai tibubegesya nka omusaiza nakulya eisoke rimuswaaza? ¹⁵ . Baitu omukali nakulya eisooke, nikyo kitinisya jaali; olwakubba yaweweibwe eisoke lyaamwe omu kifo kya kizwaalo. ¹⁶ . Baitu omuntu yeena yeena nayendya okuleeta empaka, iswe tetuliina mpisa zindi okusinga zinu, gonze ama’Iramyo ga kanca . ¹⁷ . Baitu omu byenkubalagira, timulimu kya kubatendereza, olwakubba, nimwesororya ebizwaamu bibba bibbi tibisai. ¹⁸ . Olwakuba ekisookera kimwe, ni mwesororya omw’Iramyo, mpuura nka walowo okweyatyaamu omunywe, erate nkiikirizaamu. ¹⁹ . Olwakubba,erate n'okweyatyaamu kusanira okubbaawo, abasiimibwa leke baboneke omu nywe. ²⁰ . Ale ni mukubananga amwe tikisoboka kulya mmere ya Mukama waiswe: ²¹ . Olwakubba nimubba mu kulya, buli muntu asooka omwiramwe okutoola emere ye yenkai; n’owondi alumwa enzala ,n’owondi atamiira. ²² . Kiki ekyo? Temuliina nnyumba zimuyinza okulirangamu n’okunywerangamu? obate munyooma mbbe e’Iramyo lya Kanca, nimuswaaza abataalina kintu? Nabakobere ntyai? nabatendereza olw’ekyo? timbbatendereza. ²³ . Olwakubba Omukama kiyampaire, nikyo mbegesya, nka Omukama waiswe oYesu, omu kiro kidi kiyaliribwemu olukwe, yatoire omugaati; ²⁴ . Niyebalya, naguwendamu nakoba ati, mutoole mulye; guni nigwo omubiri gwange ogu webwaayo oku lwanywe, mukolenga mutyo olw'akunyizukiranga nje. ²⁵ . Erate n'oku kikompe atyo, nibamaare okulya, nakoba ati,ekikompe kinu niyo endagaano ejiyaaka omwisagama lyaange, erate, mukolenge mutyo buli nimwanywangaku okunyizukiranga nje. ²⁶ . Olwakubba buli nimwalyangaku oku mugaati gunu ne bwe mwanyanga oku kikompe, mwalanga okufa kwa Mukama waiswe paka naliira. ²⁷ . Nikyo yazwanga airya omusango ogw’amubiri n’eisagama lya Mukama waiswe, buli eyalyanga oku mugaati obate buli eyanywanga oku kikompe kya Mukama waiswe nka tasaniire. ²⁸ . Baitu omuntu y'ekeberenge yenkai leke alye oku mugaati atyo, erate anywe n’oku kikompe. ²⁹ . Olwakubba buli alya erate anywa nka tawaire mubiri gwa Kristi kitinisya,alya erate anywa musango gwaamwe ye. ³⁰ . Omu nywe nikyo muzwiire mubbaamu abanaki abaiinji, n’abalwaire, erate baiingi abafiire. ³¹ . baitu nitwesaara omusango iswenkai, titwandisaliirwe musango. ³² . Baitu Omukama natusaara omusango, atukangavula leke tuleme kusiingibwa musango amwe nensi. ³³ . Ale baganda bange, nimu kumbananga okulya, muliindenganenge. . ³⁴ Omuntu niya lumwanga enzala, alyenge eka; okukumbaana kwanywe kulemenge okubba kwansobi, nebindi ndibirongoosa, wendiizira woona woona.