¹ . Olwakubba tintaka nywe obuteeteja, ab’aluganda, abaizeizza baiswe boona nibaali ansi owa kigguri, erate boona boona nibayakaire omu nyanja; ² . Erate boona boona nibabatiziibwe edi oMusa omu kigguru n'omu nyanja, ³ . erate boona boona nibalyanga emmere eya mwooyo, erate boona noona nibanywanga ekya kunywa kimwe ekya mwooyo. ⁴ . Olwakubba banywanga omu lwaazi olwa mwooyo olwa basengeryanga: olwazi olwo lwaali Kristo. ⁵ . Baitu baiinji oku obo oKanca tiyabasiimire, olwakubba bazikiririre mwiirungu. ⁶ . Baitu ebyo byaali bya kuboneraku jituli,tulemenge okwegomba ebibbi,erate nka bo nibegombere. ⁷ . Erate timubbanga basinza ba biisani, nka abamwe okwaabo; nka nikyawandikiibwe kiti; abantu nibaikala okulya n'okunywa,nibaimuka okuzeenya. ⁸ . Erate titusiananga, nk'abamwe okwaabo ni basiaine, ni bafa ekiro kimwe abantu emitwaalo ibiri mwenkumi isatu. ⁹ . Erate timwoyeranga mukama waiswe,nk'abantu nibamwoyeire,enzoka ezo nizibaitta. ¹⁰ . Erate timwemulugunyanga, nka abamwe okwaabo nibe nibemulugunyire, ni bazikiirizibwa omuzikiirya. ¹¹ . Baitu ebyo bya babbaireku abo okubbanga eky’akuboneraku; erate byawadikiibwe olwa kutulabulanga iswe abaikirirweeku enkomeero za mirembe. ¹² . Ale alowoozanga nka ayemereire, yeekumenge aleme kuggwa. ¹³ . Ndoowo kyoyera eki babbaaku ekitaali kya bantu; baitu oKanca, mwesigwa, ataabaikirizenge kwoyeera okusukka ni musobola ; baitu amwe n'okwoyeera erate yatangawo owakwirukira, leke musobolenge okuguminkiriza. ¹⁴ . Ale baganda bange, mwirukenge okusinza ebiisani. ¹⁵ . nkubakoba nk'abalina amagezi; mulowooze kye’nkusimoola. ¹⁶ . Ekikompe kya mukisa,nikyo ki tusabira omukisa,ti nikyo okwiisa ekimwe okwaisagama lya Kristo? omugaati gwe tuwendawenda tinigwo kwiisa ekimwe okwa mubiri gwa Kristo? ¹⁷ . Olwakubba iswe abainji tuli mugaati gumwe, omubiri gumwe, olwakubba isweena tubagana omugaati gumwei. ¹⁸ . Mubone oIsiraeri owa mubiri; abalya essadaaka tibaissa kimwe na kyooto. ¹⁹ . Ale nkutegeeza ki? Ekiweebwaayo edi ekisani nka kintu, obate ekisana nka kintu? ²⁰ . Bbe, kinkutegeeza nikyo kini, abapaati bye bawaayo,bawa edi embbandwa, erate ti edi Kanca: njeena tinkwendya nywe okubba abaissa ekimwe n’embbandwa. ²¹ . Timusobola kunywa ku kikompe kya Mukama waiswe n'oku kikompe kyambbandwa. Erate timusobola kubagana oku menza ya Mukama waiswe n'oku menza ya mbbandwa. ²² . Oba twendya kukwatisya Mukama waiswe bwiiya? niiswe tumusiinga amaani? ²³ . Byoona byoona bisai, baitu ebisanira ti byoona byoona. Byoona byoona bisai, baitu ebigassa ti byoona byoona. ²⁴ . Omuntu yeena yeena taswagananga byaamwe yenkai wazira ebya mwiramwe. ²⁵ . Buli kibatundira omu katale, mukiryanga, nka timubwirye kigambo olwa mwooyo; ²⁶ . Olwaubba, ensi ya Kanca waiswe n'okwiizula kwaayo. ²⁷ . Omwei okwaabo abataikiriza nabetanga, nnywena ni mwendyanga okwaaba; kibatanga omu maiso ganywe mukiryanga, nka timubwirye kigambo olwa mwooyo. ²⁸ . Baitu omuntu nabakobanga ati; kinu kyaweweibweyo, okubba essadaaka, timukiryanga oku lw'oyo akobere,n’olwa mwoyo: ²⁹ . Ninsimoola omwooyo, tigwaamu wazira gwa wondi; olwakubba eidembe lyange lwaaki okusaarwa omusango n'omwooyo gwa wondi? ³⁰ . Nje nindya n'okwebalya ekinzumisya, alw'ekyo kinebaarye? ³¹ . Ale obate nka mulya, obate ni munywa, obate nimukola ekigambo kyoona kyoona, mukolenga byoona byoona olwa kitinisya kya Kanca. ³² . Timuletanga ekye nyanyatya Abayudaya, gonze edi Abayonani, gonze edi eramyo lya Kanca: ³³ . Erate njeena ntyo, ngezereku okusemberya boona boona omu byoona byoona binkola, nka tinswaaga magoba gange nje, wazira ag'abaiinji, leke bacunguke.