¹ Wunanu niyali nisisikaayeyo endaalo chibiri embaga ya Pasaka eye’migaati echitaasi emibbakhe yoole, bakhawona bakhulutu nabasomesa bamalako bakhenga amakesi kowusirusiru nga lubanadire Yesu mu lukhwe lwokhumwiita muwekisi. ² “Olwokhuba bawoola baati, Sisirayi khu ludaalo lwembaga,” Nga bawoola baati, “abatu banakwemo akheddimo.” ³ Manu nikali nali e Besaniya, mu nyumba ya Simon omukenge nikekhaye nalya, omukhasi kecha nechupa yamafuta akebbeyi nkhongo lukali, akakhawowo. Kaata echupa, amafuta kakachukha khu’mutwe Kwa Yesu. ⁴ Naye aliwo mwabo abaddiriwa ettima bawoola baati, “Lwasina amafuta kakhawowo kanyasiwa kaatyo? ⁵ Olwokhuba amafuta kano kakhanyalire okhusasula omusaara kwo mukhosi omwaka omulamba ne’rubya chayeresewa abaati.” Bamuwalabira ne’tima lya’maani. ⁶ Naye Yesu kawoola ati, “Mumulekhe,” Lwasina mumukhedya? Kankholeeye esikholwa esirayi. ⁷ Olw’okhuba abaati nje bamucha okhuba nabo wuli sikha, munyala okhubayeeda ebikha byoosi bimudakhiramo. Naye esse ebikha byoosi simucha khuba nange. ⁸ Akholire nga lwanyalire. Atangiiye okhuchukha amafuta khu mubiri kwange okhwetekekhera okhunsiikha khwange. ⁹ Mbawoolera amasima, enjiri wuli yiyinawulirwenge mu syalo syosi, nende esyo omukhasi ono syakholire sinalomwalomwengekho, okhumukhewulira.” ¹⁰ Aweene awo Yuda Isukalyoti, owali mulala khu ekhumi na’babiri, kacha eyiri bakhawona bakhulutu okhulya mu Yesu olukhwe. ¹¹ Ne nibawulira, basangaala, bamulaka okhumuwa erubbya. Kakhenga amakesi nga lwanafune esikha okhumuwayo. Esye’ngoloobe Esyo Mwami ¹² Manu khu ludaalo lwamberi olwe mbaga ye’migaati chitaasi mibaakhe, lubeteraangakho amakoondi ka Pasaka, abeeki ba Yesu bamuteeba baati, “Odakha khuche yeena khutekekhe yonaalire Paasaka?” ¹³ Katuma babiri khu beeki baye kabawoola ati, “Muche musiko, munawukanane no’musaacha niketwiikhire esyongo ya’maachi. Mumulonde. ¹⁴ Yosi yoosi yanengire omwene nyumba mu muwoole muuti, “Omweekesa ateeba ati: Esisenge syange siri yeena mundalire Pasaka nabeeki bange?' ¹⁵ Anabekese omwene esisenge esikhongo esya’mukulu, esyale nisitekekhere erala. Mututekekhere omwo.” ¹⁶ Manu abeeki baye, beecha baacha musiko, bawona bakaana ebitu nga Yesu nikabawola. Batekekhera omwo Pasaka. ¹⁷ Manu niweera, Yesu keecha nende ekhumi na’babiri. ¹⁸ Nibali bekhaaye nibalya, Yesu kawoola ati, “Masima mbawoola nti, mulala khwinywe olya nange anandyeemo olukhwe oyo oli okhukhosa nange. ¹⁹ Bachaka okhwewunamira, no’khumuteeba mulala syamulala baati, “Masima siniise?” ²⁰ Kabakowolamo ati, “Ali mulala khu ekhumi na’babiri, oyo okhosa ni nange. ²¹ Omwana wo’mutu alicha nga nisyamuwandiikiwakho. Naye chirimuwukaana oyo olya mu omwana wo’mutu olukhwe! Syakhali sirayi eyiri oyo siinga sikeewulwa.” ²² Nibali nibalya, Yesu kawukula omugaati, manu nikamala okhwebasa, kakukhalachakamo, kabawa nawoola ati; “Muwukule, kuno nje omubiri kwange.” ²³ Kawukula esikombe, manu nikamala okhwebasa kabawa, basinywakho boosi. ²⁴ Kabawoola ati, “Kano nje amabanga kange akendakaano, akedikha olwa bangi.” ²⁵ “Masima mbawoola ati sindinywa lundi khu byaamo khu musabbibu okhwoosa khu ludaalo lula lundinywa omuyakha mu wene’ngo wa Weere.” ²⁶ Manu nibamala okhwemba olwembo, batula bacha khu lugulu olwa Seyituni. Yesu Alakula Khu Khwekaana Khwa Petero ²⁷ Manu Yesu kabawoola ati, “’Mucha okhuntulakho mweesi,” Olwokhuba syawandiikiwa siiti: “’Ndikhubba omwayi, na’makoondi kalisalaana.’ ²⁸ Naye nindimala okhusyukhisiwa, ndibatangiriramo okhucha mu Ggaliraaya.” ²⁹ Naye Petero kalangirira ati, “Nende boosi banakhutulekho, esse bbe.” ³⁰ Yesu kamuwoola ati, “Masima nkhuwoola ati, “Olwa leero__ Eee, esiro sino__ engokho yinabe yitaakholyookha amakhabi kabiri,ewe omwene onabe wunekanire amakhabi kadatu.” ³¹ Naye Petero kemeeda lukali okhwomiisa ati, “Asyakhaba okhufwa ni nawe, sindakhwekaane nawutono.” khandi abandi boosi bawoola baatyo. ³² Manu beecha baacha mu sifwo eriita lyasyo Gedisemani, Yesu kawoola abeeki baye ati, “Mwikhale ano ninja okhwekalikhira.” ³³ Kayira Petero, Yakobo nende Yokana alala naye, kachaka okhuba ne’ngisa nokhwelaliikhirira lukali. ³⁴ Kabawoola ati, “Omwoyo kwange kulikho engisa ngali, chicha okhunjita,” “Mube ano mube moni.” ³⁵ Kakendakho wutono, kafumala kekalikhira nisinyalikha esikha simubitekho. ³⁶ Kawoola ati, “Abba, Bbabba,” “Byoosi binyalikha yooli. Ntusekho esikombe sino. Naye si nga ese lundakha, okhutusakho nga ewe lwo’dakha.” ³⁷ Manu nikakowola eyiri abeeki baye kabawukaana nibakona. Kawoola Petero ati, “Simoni”, “Okona? Syobeeye na’maani akokhumoka ata esaawa ndala yiiti? ³⁸ Mube moni, mwekalikhire mukhaye okhwiingira mu khukhemewa. Omwoyo kudakha, naye omubiri munafu.” ³⁹ Lundi kakowolayo, kekalikhira, nalomaloma emboosi nasirala. ⁴⁰ Kakowola lundi, kabawukana nibakona, olwokhuba emoni chawe chali nsito, sibamanya esyokhumukowolamo. ⁴¹ Kecha ekhabi eryo’khudatu, kabawoola ati, “Musikona nokhuwulukha? Simala! Esikha syolire. Wona, omwana wo’mutu awewayo mu makhono ka’babi. ⁴² Musiingire! Khuche! Wona, onandyeemo olukhwe kolire!” Yesu Adiiriwa. ⁴³ Manu wangu wene, Yesu nikali asilomaloma, Yuda, mulala khu ekhumi na’babiri, keecha. Alala naye kali ne’sidiikha esyali ne’byooki ne’ndawukhi, nga batumirwe nende bakhawona abakhulutu nabawandiisi bamalako na abakhulutu bebiikha. ⁴⁴ Ne oyo owamulyaamo olukhwe kali abaweye akhawonero na’bawooleye ati: “Oyo yindakwe musirifu, anabe niye; mu’mudiire, mumuyire nimumwomiisiise.” ⁴⁵ Manu nikoola, wangu weene kacha eyiri Yesu. kawoola ati, “Rabbi!” kamukwa musirifu kekesa owiicha. ⁴⁶ Badiira Yesu bamwomiisa. ⁴⁷ Naye mulala khu abo abali nibemire ambi kachowola esyooki katema omukhosi wa khawona okhira owukhulutu, kamutemakho okhutwi. ⁴⁸ Manu Yesu kakowolamo nawoola ati, “Munjichiriiye oti abechera omunyakka nebyooki nendawukhi okhundiira? ⁴⁹ Wuli ludaalo nabanga nanywe, ninsomesa mu nyumba ya Weere, nga si mwandiira. Naye sino sikholekhirwe, ebyawandiikiwa byolerere.” ⁵⁰ Manu boosi bamwanjukha berukha. ⁵¹ Khandi omusyani mulala kamuloonda owali kewikhiriiye enguwo khu mubiri, bamudiira. ⁵² Ne kabechunulakho kabalekhera enguwo kerukha sichula. Yesu mulukhiikho ⁵³ Manu bayira Yesu eyiri khawona okhira, bamwewuusirakho bakhawona bakhulutu boosi, na’bemeresi bebikha nabawandiisi bamalako. ⁵⁴ Manu Petero kamulondakho nakendera aleyi, enyuma okhwoola mukati wo’lwaanyi lwa khawona okhira owukhulutu, kali kekhaaye nabakhosi baye nikoota omuliro. ⁵⁵ Manu bakhawona bakhulutu nende abali mu lukhiikho boosi bakonyeresa khu Yesu owujjulisi owakhakira bamwiita, ne bakhaywa okhuwuwona. ⁵⁶ Olwokhuba abamuyiinga ebyo’wubacha bali bangi, no’khuyiinga khwawe sikhwadisaniya. ⁵⁷ Manu abandi basiingira nibamuyiinga nibawoola baati: ⁵⁸ “Efwe khwamuwulira nawoola ati, ‘Ndikhalaka enyumba ya Weere yino eyakholewa namakhono, ne mu ndaalo chidatu ndyombakha eyindi, eyitalikholewa na’batu.’” ⁵⁹ Nende nibaleeta bino na’biira owujulisi wawe siwadisaniya. ⁶⁰ Manu khawona okhira owukhulutu kema akati, kateeba Yesu nawoola ati, “Ewe syocha khukowoolamo? Siina syene sibakhuwoola bano?” ⁶¹ Naye Yesu kawuleera wuwuleera kakhaya okhuchiimbula nawutono. Khandi khawona okhira owukhulutu kamuteeba ati, “Niiwe Kurisito, omwana wo’yo owaweresewa enkhabi?” ⁶² Yesu kawoola ati, “Niise ono” “Mweesi muliwona omwana wo’mutu nikekhaye khu mukhono mulungi okwo’mwami, nikeecha nebiresi bye kulu.” ⁶³ Manu khawona okhira owukhuluutu katandula enguwo chaye. Kawoola ati, “Khudakhira sina owujulisi wundi?” ⁶⁴ “Muwuliiye owufwotokheresi. Mubaasa mutye?” Boosi bamukhengera baati okhoyera okhufwa. ⁶⁵ Manu abandi nibachaaka okhumufuuchakho amatte; no’khumuwiikha mumoni nokhumukhubba ebiffusi, nokhumuwoola baati, “Lakula!” abaliindi bamuyira nibamukhubba. Petero Kekaana Yesu. ⁶⁶ Manu Petero nikali assi alwanyi, mulala khu bakhana bayere aba khawona okhira owukhulutu keecha. ⁶⁷ Ne nikawona Petero nikoota omuliiro, kamwekhaliirisa. Kawoola ati, “Ewe wesi wali nende Omunasaleesi, Yesu.” ⁶⁸ Naye Petero kekaana nawoola ati, “Simanyire khandi sintegera byo’lomaloma.” Katulira mu mulyango okutula erwaanyi. ⁶⁹ Omukhana nikamuwona mu mulyango, kawolera abo abali nibemire awo ati, “Ono nje mulala khwabo.” ⁷⁰ Ne Petero kekaana. Ni abitirewo esikha sitono, abali nibemire erwaanyi bawoola Petero lundi baati, “Masima oli mulala khubo, olwokhuba oli Mugaliraaya.” ⁷¹ Naye Petero kachaaka okhwewaaba no’khwelayira ati, “Simanyire mutu ono yimulomalomakho.” ⁷² Wangu wene engokho yakholyookha ekhabi eryo’khubiri. Manu Petero kakhewulira emboosi Yesu yikali namuwooye ati; “Engokho yinaabe yitakholyookha amakhabi kabiri, onabe wunekaanire amakhabi kadatu.” Kawamo amaani katundukha okhulira.