¹ Mu ndaalo echo elako lyatula eyiri Kayisali Agusito eryabatu boosi okhubaliwa muwutuki woosi owa ba Roma. ( ² Khuno nje okhwali okhubala abatu okhwasookha okhubawo Kuleniyo ni kali nafuka Busuli. ) ³ . Boosi bacha okhubaliwa nawuli mutu musiko syewawe. ⁴ Nende Yosefu yesi katula e Galiraaya musiko sye Nasalesi, kanina e Wuyudaaya, okhucha mu siko sya Daudi sibalanga baati Beserekemu, khulwokhuba kali wo munyumba khandi nga wo musiikha sya Daudi. ⁵ Kachaayo keyandikise nende Malyamu, yikali nasubisise naye okhudekhya, nali nenda. ⁶ Nibali nibali eyo, endaalo chaye chokhwiwula choola, ⁷ kewula omwana waye owamberi, omusyani. Kamuwikha mu nguwo echabaana badoto kamukoniya mu sidwooli khu lwokhuba mu nyumba ya bakeni simwalimo sifwo. Abaayi Nende Bamalayika. ⁸ Aliwo abaayi abekhalanga khu ttale ni balinda amakoondi kawe esiro mu wuleeka. ⁹ Awo Malayika womwami kabawonekhera, noluyaali lwOmwami lwadukha lwabewodokhaniya, manu baatya. ¹⁰ Ne Malayika kabawoola ati mutatya, Khulwokhuba wona ndikhubaletera emboosi ndayi echesangalo eririba eyiri abatu boosi. ¹¹ Leero mu siko sya Dawudi kewuywe yimuli omuwoniya; nje Kurisito Omwami. ¹² Khano nje akhawonero yimuli: munawone omwana mudoto nibamuwoyire munguwo chabaana badoto niba mukonisye mu sidwooli. ¹³ Ne amangu ako aliwo nende esinawungi sya ba Malayika abe eye lwo mukulu, nibakiniya Weere baati, ¹⁴ Oluyali lube eyiri Weere amukulu lukali, nende mu syalo emirembe chibe eyiri abatu basimiiwa. ¹⁵ Awo olwola bamalayika batula yibali okhukowola mukulu, abaayi bawoolanira baati manu khuche eBeserekemu khuwone esitu sino esyekholekhire, Omwami syatuwoleye. ¹⁶ Nibasingira nibacha wangu nibawona Malyamu nende Yosefu, nomwana mudoto, nibamukonisye musidwooli. ¹⁷ Nibamala okhumuwona, bawunusa emboosi chibabawoolera khu mwana ono, ¹⁸ boosi abawulira bawuka ebyabaayi bi babawoolera. ¹⁹ Ne Malyamu kabiikha emboosi echo choosi nga achibasangakho mu mwoyo kwaye. ²⁰ Nabaayi bakowolayo ewawe, nibakiniya khandi nga baweresa Weere oluyaali khu lwebyo byoosi bibawona khandi nende bibawulira khulwokhuba byali wusa nga lu babawooleye. Yesu Ayiriwa Mu Nyumba Ya Weere. ²¹ Ne oludaalo lwomunana nilwola, nga nje ebikha ebyo’khumukheberamo, bamukulikha erita Yesu, lira malayika likali namuweeye nataba munda yanηina. ²² Ne’ndaalo nichola ech’okhulabisiwamo, babe abolerefu ng’amalako ka Musa lukali, Yosefu nende Malyamu batula awo bamwambusa e Yerusaalemi okhumwekesa eyiri Omwami ²³ (Nga lu syawandikiwa mu lako lyo’Mwami liiti wuli mwana musyani omwikulanda wa nηηina acha okhuwewangayo eyiri Omwami)”, ²⁴ nende okhuwayo okhwebasanga elako lyo Omwami nga lu liwoola liiti; “amawusi kabiri oba tu nawuruku tudoto tubiri. ²⁵ Wunanu mu Yerusaalemi mwalimo omusaacha nga bamulanga Simyoni, kali mulungifu khandi nga atya Weere. Ngalindirira okhusangasiwa khwa Yisirayiri khandi omwoyo mulafu kamulikho. ²⁶ Oyo omwoyo mulafu kali kamwikulirawo ati ata khaba syalifwa natawona Kurisito wOmwami. ²⁷ Manu nga kechuuye nomwoyo mulafu, kengira mu nyumba ya Weere. Wunanu abewusi ba Yesu nibali khu bali okhumwingisa mu nyumba ya Weere baati bamukholere nga amalako ka Musa kawoola, ²⁸ Simyoni kawukula Yesu kamukinga mu makhoono, kebasa Weere, kawoola ati: ²⁹ Omwami woluyaali, nga lu wasubisa, wunanu lekhula omukhosi wawo awewo mu mirembe. ³⁰ Olwokhuba emoni change chimalire okhuwona owuwoniya wawo, ³¹ wuwali wamwene watekekha mu moni cha batu boosi, ³² owulafu wokhuwikhulirwa eyiri abatende khandi owulayi eyiri abatu bawo Yisirayiri. ³³ Manu simwana nende nηηina bawuka lukali ebitu byali ni bimulomalomwakho. ³⁴ Khandi Simyoni kabasabira enkhabi manu kawolera Malyamu, nηηina ati: “Omwana ono ateywewo khu lwokhukwa n’okhusingira khw’abatu bangi mu Yisirayiri, nende okhuba akhawonero akhokhulomwalomwakho wubi, ³⁵ kho ebibaso bye myoyo mingi biwonekhe alafu. Khandi okukhande kucha okhufumita omwoyo kwawo kwosi. ³⁶ Khandi aliwo nabbi mukhasi, Ana, omukhaana wa Fanweri owomusikha sya Aseri. Kali mukofu lukali; Kaba nende wamwe emyaka musanfu okhutula adekhe, ³⁷ ne khandi kaba mufwire nga kakhamala emyaka kinaana munya. Sikatulanga mu nyumba ya Weere, naye kabanga wusa omwo nasaba khandi nawonga; alala nende okhwekalikhira Weere esiro nesideete. ³⁸ Kolerawo ebiikha byene ebyo, kebasa Weere khandi kalomalomera abo boosi abali balindiriye okhuwonesewa khwa Yerusalemi ebidiira khu mwana oyo. ³⁹ Ne Yosefu nende Malyamu nibamala okhwoseresa byosi byoosi nga amalako koMwami lukalagira, bakowolayo mu Galiraaya mu siko syawe syene esye Nasalesi. ⁴⁰ . Manu omwana oyo kakhula khandi kaba owamaani; nikechula amakesi, khandi enkhabi ya Weere ya mulikho. Omusimbukha Yesu Mu Nyumba Ya Weere. ⁴¹ Nawuli mwaka abewusi baye bachanga e Yerusaalemi khu muyumo kwa Pasaka. ⁴² Manu, Yesu nikosa emyaka ekhumi na chibiri e chowukhulutu, baniina bacha khu muyumo, nga lubakholanga. ⁴³ Ne omuyumo ni kwawa, nibali nibakowolayo engo, omusimbukha ono Yesu, kadonηηa enyuma mu Yerusalemu. Ne sino abewusi sibasimanya. ⁴⁴ Ni babaasa baati ali alala nabo, bakenda oludaalo olulamba nga sibamuwona. Manu bachaka okhumukonya mu balebe bawe nende mu becha. ⁴⁵ Nga lubatamwakaana, bakowolayo e Yerusalemi okhumumukonya. ⁴⁶ Endaalo chidatu nichabitawo bamwakaana nali mu nyumba ya Weere, nikekhaye akati mu bekesa, nga ali khubatekeresanga khandi nga’bateeba ebiteebo. ⁴⁷ Manu abo boosi abawulira bikali nawoola bawuka lukali amakesi kaye nende engeri yikali nga akowolamo ebiteebo. ⁴⁸ Naye abewusi baye nibamuwona, bawuka lukali. Manu nηηina kamuwolera ati, “Mwana wange, lwasina otubisisye oti? Ese nende latawo khu khukonyire nikhweralikhiriye.” ⁴⁹ Naye kabateeba ati; “Lwasina mubeye mungoonya?” “Mubeye simumanyire muti nkhoyera okhuba mu nyumba ya Bbabba?” ⁵⁰ Manu sibamanya sikali nabawoolera. ⁵¹ Manu kasingira kekha e Nasalesi nabo khandi kaaba omuwulise yibali. Naye nηηina kabiikha ebitu bino byoosi mu mwoyo kwaye. ⁵² Yesu kemeeda okhukhula mu makesi nende mu mubiri nga adakhiwa nende Weere na’batu. Yokana Omubatiisi Atekekha Engira.