¹ Abatu bangi bamalire okhukesakho okhutekekha wulayi mu khuwandiika ebitu ebitukholekhiremo, ² wusa nga lu byesewa assi khwifwe nende abo abatusokha okhwewonera abene khandi nga bakhosi bemboosi. ³ Nolwesyo, esse sessi samwene nga nimalire wunanu okhwekhalirisa wulayi nawuli situ okhutula khunjaka, syawonekhana sirayi sessi yindi okhuwandiika emboosi mu wulungifu eyiri enywe, omwolerefu Teefiro, ⁴ khuwemewo omanye amasima kebitu biwasomesewa. Okhwiwulwa Khwa Yokana Omubatiisi khulakulwakho. ⁵ Mundaalo cha Kerode Omwenengo wa wuYudaaya aliwo khawona erita lyaye kali Sakaliya, owali owo mu Lulyo lwa bakhawona ba Abbiya; omukhasi waye Erisabeti yesi kali owolulyo lwa Alooni. ⁶ Manu bombi bali balawota mu moni cha Weere, bakenderanga mu malako koosi nende ebidakhiwa byoMwami, nga bolerefu mu ngira chosi choosi. ⁷ Ne sibalikho nabaana, khulwokhuba Erisabeti kali mukumba; khandi bombi bali bayesise emyaka. ⁸ Awo olwola Sakaliya, nikali nakhola omulimo kwowakhawona mu moni wa Weere, ⁹ kangaliwa mu khalulu, okhulondana nensambo cha ba khawona bakhulutu, okhucha mu nyumba yOMwami okhuniyokhesa owubbani. ¹⁰ Ne mu bikha byokhuniyokhesa owubbani nibyali byolire, abasabi abali ni bewusise boosi bali basabira erwanyi. ¹¹ Awo malayika woMwami kamuwonekhera, nikemire oluwande lwomukhono mulungi kwo khuwolutali eyiri owubbani. ¹² Ne Sakaliya nikamuwona, kesindukha khandi amatichasi kamudiira. ¹³ Ne Malayika kamuwolera ati: otatya, Sakaliya; khu lwokhuba okhusaba khwawo khuwuliiywe. Omukhasi wawo Elisabeeti anakhakhwiwulire omwana musyani, onakhamukulikhe erita Yokana. ¹⁴ Aliba esangaalo nokhwekhoya yuli, ne bangi abalisangalira okhwiwulwa khwaye, ¹⁵ khuba aliba omukali mu moni choMwami. Ne syalinywa malwa oba esinywewa sibbakhe, khandi anakhechusiwe nende omwoyo mwolerefu okhutulira mu khwiwulwa khwaye. ¹⁶ Bangi khu batu ba Yisirayiri balikowosa eyiri Omwami Weere wawe. ¹⁷ Khandi alichanakana mu moni choMwami, mu mwoyo nowunyala wEriya, okhukalukhaniya emyoyo cha basaawe okhukowola khu baana baawe nende banantakerakwa okhukowoola khu ngira yamakesi kowolerefu__ acha okhukhola abatu babe nga betekekhera Omwami ¹⁸ Ne Sakaliya kateeba malayika oyo ati, Sino ese na khasimanye ntye? Ese ndi mukofu nomukhasi wange yeesi achiririye mumyaka. ¹⁹ Ne malayika kamukowoolamo ati, Nise Kawudyeri. Owemanga mu moni cha Weere khandi natumiwa okhulomaloma nawe nokhukhuwolera emboosi ndayi chino. ²⁰ Wunanu wona ocha okhuwulera khandi sucha khunyala okhulomaloma okhwolera erala khu ludaalo lu bitu bino lubiryekhola, khulwokhuba syofukiriye emboosi change, echicha okhwolerera mundaalo chabyo. ²¹ Ne abatu abali nibalindiriye Sakaliya erwanyi bawuka khu lwasi akhindire mu nyumba ya Weere. ²² Ne nikatula erwanyi, sikanyala okhulomaloma nabo. Ne bamanya baati afunire okhuwonekherwa mu nyumba ya Weere, kasikala nakhosesa owuwonero yibali kasikala natanyala okhulomaloma. ²³ Endaalo chaye echokhuweresa nichawa, kakowolayo engo. ²⁴ Bino nibiweye, omukhasi waye Erisabeesi kayera enda kamala embaka yemyesi chitanu kamenya mu wekisi. Kawola ati, ²⁵ Omwami kankholera sino', mu ndaalo chino kantusisekho ensoni mu moni chabatu. Okhulakula Khwokhwiwulwa Khwa Yesu. ²⁶ Mu mwesi kwo mukaaga, Weere katuma Malayika Kawudyeri okhucha e Nasalesi mu siko sye Garilaaya, ²⁷ khu mukhaana otamanyire musaacha owali nafukirisanisye okhudekhera omusaacha yibalanga Yosefu, owomusikha sya Dawudi. Erita lyomukhaana otamanyire musaacha Malyamu. ²⁸ Malayika kacha yali kamuwoola ati, Yokakho ewe eweywe enkhabi! Omwami ali nawe. ²⁹ Malyamu kesindukha lukali khu lwemboosi chaye khandi kawuka okhukhesa okhwo sikhwekesa. ³⁰ Ne Malayika kamukowolamo ati, Otatya Malyamu olwokhuba Weere akhuweye enkhabi. ³¹ Manu wona ocha okhuwera enda wiwule omwana we sisyani, onakhamukulikhe erita oti Yesu. ³² Oyo aliba mukali balimulanga baati omwana woyo oli amukulu lukali. Khandi Omwami Weere alimuwa esisala syowutuki esya simwana Dawudi. ³³ Khandi alifuka enyumba ya Yakobo endaalo choosi nolwesyo owenengo waye siwuliwawo. ³⁴ Malyamu kateeba malayika ati, Siriba siitye sino ngese otamanyire musaacha? ³⁵ Ne malayika kakowolamo nawoola ati,Omwoyo mulafu acha okhukhwikhakho khandi amaani koyo oli amukulu lukali kacha okhukhuwutawutira. Manu nomwana yocha okhwiwula acha okhulangiwa omwolerefu, omwana wa Weere. ³⁶ Ata nende omukhaana wenywe Elisabeeti ali nenda yomwana mu syani mu wukofu waye. Kuno nikwo omwesi kwaye kwo mukaaga, owalangiwanga omukumba. ³⁷ Khulwokhuba yiwuma esitanyalikha eyiri Weere. ³⁸ Malyamu kakowolamo ati, wona ese ndi omukhosi Womwami lekha simbekho nga lwowoye. Awo Malayika namala amulekha. Malyamu Akeniya Erisabeti ³⁹ Mu ndaalo echo malyamu kasingira kaacha mangu musyalo syengulu mu siko sya Yuda. ⁴⁰ Kengira mu mako ka Sakaliya kakheesa Erisabeti. ⁴¹ Ne Erisabeti nikawulira enkheesa ya Malyamu, omwana kachaka okhutumakala munda, manu Erisabeti kechusiwa nomwoyo mulafu. ⁴² khandi kalomalomera mu kono lyamukulu ngawoola ati: Oweresewe enkhabi mu bakhasi boosi, khandi ayeresewe enkhabi omwana yocha okwiwula! ⁴³ Ne lwasina mberesewa enkhabi, Syaba mbo Nηηina yo’Mwami wange keecha yindi? ⁴⁴ Khangu awo okhukheesa khwawo nikhwingiye mu matwi kange, omwana oli munda yange atumakaaye olwesangaalo. ⁴⁵ Ali ne’nkhabi owafukiriye ati Omwami bikamuwoolera biryolerera!” Olwembo Lwa Malyamu: ⁴⁶ Ne Malyamu kakowolamo nawola ati: Ebibaso byange bifumya Omwami ⁴⁷ Nomwoyo kwange kusangalira mu Weere Omuwoniya wange, ⁴⁸ Khulwokhuba kechulisise embeera yowulonga yomukhosi waye. Okhutula wunanu nokhwemeedayo ese nebikha byosi byoosi birinanga owenkhabi, ⁴⁹ Khulwokhuba omwene wunyala kankholeye ebikhulutu__ omulungifu nje erita lyaye. ⁵⁰ Nesisa syaye sicha syola khu abo abamutya, okhutula mu lusse okhucha khulundi. ⁵¹ Akholire ebyowunyala nomukhono kwaye; asalanisye abo abepakha mu bibaaso byawe ebyomukati. ⁵² Kerusisye abatuki khu bisaala byawe, akhusise abalonga. ⁵³ Abali nenjala abekusise nebitu birayi Ne abanyali aberusisye nibali makhono wusa. ⁵⁴ Ayeedire omukhosi waye Yisirayiri, nikechulisa, okhuba owesisa ⁵⁵ Eyiri Yibulayimu nende esaaye lyaye endaalo choosi, nga Iukawolera ba seefwe. ⁵⁶ Malyamu kamenya nende Erisabeti okhumala ambi emyesi Okhwiwulwa Khwa Yokana Omubatiisi. ⁵⁷ Manu endaalo cha Erisabeti okhwiwula nichola, kewula omwana omusyani. ⁵⁸ Abamusiribanire alala nende abesikha syaye nibawulira baati Weere akwiriye Erisabeti esisa singi siityo, beecha basangalira alala naye. ⁵⁹ Ne oludaalo lwo munaana nilwola becha okhukheba omwana oyo, bali badakha okhumukulikha erita lya simwana baati Sakaliya, ⁶⁰ ne ŋina kakowoleramo amukulu ati, “khaba! Acha okhulangiwa Yokana.” ⁶¹ Bamuwoolera baati, “Musikha syawo simuli mutu yibalanga erita eryo.” ⁶² Bakholera simwana sidimbe nibadakha bamanye nga lukakhamulangire. ⁶³ Naye kabasaba ekina kawandikakho ati, Erita lyaye nje Yokana. Abatu baye bawuka. ⁶⁴ Manu awene awo omunwa kwa Sakaliya kwekukha olulumi niluwololokha, Kachaka okhulomaloma, nikebasa omulongi. ⁶⁵ Owuti wecha wadiira abamusibiranire,khandi abatu boosi musyalo syengulu che wu Yudaaya beecha balomaloma khu biitu bino. ⁶⁶ Manu abo boosi ababiwulira bawuka mu myoyo chawe nibawoola baati, Naye omwana oyo kakhabe siina? Khulwokhuba omukhono kwOMwami kwali alala naye. Olwembo lwa Sakaliya. ⁶⁷ Sakaliya simwana Yokana kechusiwa omwoyo mulafu, kachaka okhutumbula ebidiira khu mwana oyo nawola ati: ⁶⁸ Akinisiwe Omwami, Weere wa Yisirayiri, khulwokhuba asyaliye khandi anunuye abatu baye. ⁶⁹ Khandi atusingisiye olwika lwowuwoniya mu nyumba yomukhosi waye Dawudi ⁷⁰ (nga lukasilomalomera okhubitira mu banabbi baye abolerefu abaliwo mundaalo enkhale, ⁷¹ okhuwonesewa mu basiku befwe nende mu mukhono kwabo boosi abatatudakha__ ⁷² Okhwekesa esisa khu ba kuuka yefwe nokhukhewulira endakaano yaye enjolereefu, ⁷³ Okhwoseresa esyechubo sikalayira eyiri kuuka yefwe Yibulayimu: ⁷⁴ okhutuwoniya efwe okhutula mu mukhono kwa basiku befwe, nokhutunyalira khu mukholere nga awuma sikhutya ⁷⁵ muwolerefu nende mu wulungifu mu moni chaye endaalo chefwe choosi. ⁷⁶ Nawe, mwana wange, onalangiwe Nnabbi woyo oli amukulu lukali; khulwokhuba olitangira emutwe woMwami okhumuteresera engira, ⁷⁷ okhuweresa abatu baye amakesi kowuwoniya Okhubita mu khubalekheramo ebibi byawe, ⁷⁸ Khu lwokhuba esisa syaye sirayi sya Weere wefwe, eryuba litutuliyeyo okhutula mwimukulu. ⁷⁹ Okhwadukhira abatu abo abekhala mu sirema nende mu sinikha syokhufwa, okhulungikha amakulu kefwe mungira ye mirembe. ⁸⁰ Manu omwana kakhula khandi kemeeda okhuba omwomifu mu mwoyo; kamenya mu sibbarara okhwoola oludaalo lukekeserwa alafu mu Yisirayiri. Okhwiwulwa Khwa Yesu.