¹ Naali munda wokunggeeni, Yona kasaba OMWAMI Weere waye. ² Kawoola ati, " Mungisa change nalirira OMWAMI, manu kangowolamo okhutula assi emakoombe nalirira owuyeedi, manu watekeeresa okhulira kwange. ³ Wansukuna ewusiba, mumwooyo kwakayanja keene, manu akafiinda kanewodookhaniya emiichi chambitakho. ⁴ Nawoola ntii, "Ntusiiywewo okhutula mu mani chawo; ate nga khandi nja okhutingaala enyumba yawo enjolerefu." ⁵ Emiichi echimira chantiisa echewusiba chanewodookhaniya; Ekinyasi chokuyanja chawoyekaniya omutwe kwange. ⁶ Khumisi chengulu, neebira assi, esyaalo assi syanjikalira endaalo chosichosi. Naye watusayo owulamu wange okhutula mu liina, Oh OMWAMI Weere wange. ⁷ "Owulamu wange niwali niwuwawo, Nakhwichulisa, OMWAMI, manu okhusaba khwange khwasingira khwecha yoli, khu nyumba yawo enjolelefu. ⁸ " Abo abewakikha khumisaambwa echiwuma mugaso basukuna esisa sya Weere esyakhabeeye esyaawe. ⁹ Naye ese, nende olwembo olwokhwebasa, ndiwayo yooli. Esyo sinalayira ndisikhola wulayi okhuwonesewa khutula eyiri OMWAMI. ¹⁰ Manu OMWAMI kalagira okunggeeni, kwasesema Yona khu syaalo esibalakafu.