¹ Emboosi yomwami yechera Yona omusyani wa Amitayi niyiwola yiiti: ² "chamusiko esikali esye Nineve owulire owubi wasyo, olwokhuba owubi wasyo wichire waniima wola yindi." ³ Naye Yona kerukha okhutula khu Mwami kacha eTalusisi. Kekhirira kaacha eYopa, yikawukana emeeri niyicha eTalusisi. Kasasula esende cholukendo, kanina emeeri kaacha eTalusisi okhwirukha okhutula khumwami. ⁴ Manu Omwami kaleeta embuunga eyamani khu kuyanja, manu enfinda yamani yasingira manu emeeri yatikhilisa nga eyinakhalikhe. ⁵ Abali mu meeri boosi batya khandi syamulala kalirira Weere waye. Manu basukuna emikuku mu kuyanja kho emeeri yinyale okhwanguwa. Naye Yona kali kekhire assi musisenge syemeeri nga endoolo chimuyirire. ⁶ Omufuki wemeer kacha yaali kamuwoola atti, "obeye si okhukona? singira osabe Weere wawo! lwaana kakhatwichulisa khwokhaya okhufukiira erala khwawaawo." ⁷ Manu abali mumeeri bawoolana abene khubeene baati, "mwiiche, khukhubbe owululu khumanye naanu okira akhabi khano nikhatubakho." Bakhubba akhalulu manu khadiira Yona. ⁸ Manu bamuteba baati, "Tuwolere, naanu okira owudinyu wuno woosi niwutwichira? okhola mirimosi? otula yena? oliwa gwa si? otula mu baatu si?" ⁹ kakowolamo atti, "Ndi omuwebbulaniya khandi ninamira Omwami Weere wekulu, owakhola okuyanja nende esyaalo." ¹⁰ Sina syabatiisa manu bamuteeba baati, Okholire si?" (Bamanya baati kali kerukha okhutula khu Mwami, olwokhuba kali amalire okhubawoolera atyo.) ¹¹ Okuyanja kwachanakana nokhunyasikha, manu beecha bamuteeba baati, khukhukholele si kho Okuyanja kutukwalaalire? ¹² "kabakowolamo atti, "mumbukule manu munsukune mu kuyanja," manu Okuyanja kunakwalaale. Manyile nti esidinyu siri khwise embbunga yamaani yino okhubechakho." ¹³ Musifwo syesyo, abaatu bakhola esinyalikha okhukowola khu syaalo. Naye sibanyala, olwokhuba Okuyanja kwemeda okhunyaasikha, okhukhilakho nga nikubeeye olwamberi. ¹⁴ Manu beecha balirira Omwami baati, "Ooo OMWAMI otakira khwaffa olwokhuyira owulamu womusaacha ono. Otatusibalira olwokwita omuutu owumakho omusango, olwokhuba ewe Ooo OMWAMI okholire nga lwodakha." ¹⁵ Manu bawukula Yona bamusukuna mu kuyanja, manu embbunga yali khu nyanja yawunjeera. ¹⁶ Khusino abaatu batya lukali Omwami, manu bawayo ebiwewayo eyiri OMWAMI khandi bamukholera oweyamo. ¹⁷ Naye OMWAMI katekekha okunggeeni kwamaani okhumira Yona, manu Yona kamala munda yo kunggeeni endaalo chidatu esidete nesiro.