¹ Nikhwamala okhwola khulukoongo, khwawukaana mbo esisinga syali sirangiwa Melita. ² Abewulanwa bo khusisinga beecha batwekesa essisa esitakaanikha. Batwakananira fweesi batuwambisirya omuliiro khulwokhuba enfula yali yikwa no’wunyifu nga wungi. ³ Paulo kawuusa otukhwi tunyerere omukanda, nikali natuta khumuliro, enjokha enkhola nhima, eyerusiwa olwo wubafu, yemwewowa khu mukhono. ⁴ Ne abokhusisinga nibawona enjokha niyirerecha khu mukhono kwaye, balomaloma wuli otula eyiri owasye baati, “Omusaacha onno atekwa okhuba omwiti; asyakhaba mbo awonire okhufwira mu Kuyanja, omusango sikwicha khumukanya abe omulamu.” ⁵ Naye Paulo kakhukhumula omukhono enjokha yakwa mu muliro awumawo esyamwolakho esyakhabi. ⁶ Abatu basuubira baati anasimbakane omubiri oba okhukwa awene awo afwe, ne nibalinda embaka endeeyi yabitawo nga awuma sibawona syoosi nisimwekholekhanirekho, bakalukhaniya ebibaaso byawe bawoola baati kali were. ⁷ Aliwo ebyo’mbakhe byo’mukhuluutu we’sisinga, esyo olangiwa Pubuliyo katuyira ewaye yikhwamala endaalo chidatu natuliisa natusangaasa. ⁸ Simwana kali muwuliri nimulwaye, nali no’muyaka kwo’khunyalala. Paulo kengirayo okhuwona, namalire okhumusabira, kamutakho amakhono, khandi kamuwoniya. ⁹ Sinno nisyakholekhana abadoηηire abali abalwaye khu sisinga beecha khandi bosi bawonesewa. ¹⁰ Batuwa oluyaali mu ngira nyingi ne nikhwali khuli ambi okhusiingira khuwewo, batuwa ebyo byoosi bikhwali khudakha mu lukendo. Okhwola e’Rooma ¹¹ Emyesi nichakhabitawo chidatu khwachaaka olukendo khu Kuyanja mu meeri eyali niyeyikamire endaalo che’ttocho khusisinga. Emeeri yali ey’Alekesandereya, nimbandikekho yiiti were khwana Kasito nende Polikisi. ¹² Khwola mu Sulakusa yikhwamala endaalo chidatu. ¹³ Nikhwatula awo khwola mu Regiyo. Oludaalo lulondakho embewo che’mwaalo chasiingira, oludaalo lulonda olwo khwola e Putiwoli. ¹⁴ Awo khwakanawo abaana befwe abatulanga okhubakeniya khwamalawo ejjuma enaamba. Manu khutyo nje lukhwolera e Rooma. ¹⁵ Abaana befwe eyo bali bawuliye baati khwali khwicha, batulira erala mu mukhuηηano kwa Apiyo, nende Enyumba echo’khukonamo chidatu chabawo echokhwakananiramo nafwe. Mukhuwonana na’basaacha banno Paulo kebasa Weere khandi kakowosewamo amaani. ¹⁶ Ne nikhwola mu Rooma, Paulo kafukiirirwa okhumenya ayeηηene, ngalindiwa no’musirikale. Paulo Awuulira e Rooma assi’wobuliindi ¹⁷ Endaalo chidatu nichibitrewo kalaanga abatangirisi babatu baba Yudaaya alala. Nibali bakhesolosa, Paulo kabawoolera ati: “Baana befwe, nende mbuma sinkholire eyiri abatu befwe oba khumidunga cha ba’kuuka yefwe. Nadiriwa mu Yerusalemi bandiisya aba Rooma. ¹⁸ Nibangonyeresakho badakha bandekhule, khulwokhuba bawona nga mbuma musango okwali kunfambya okhwitiwa. ¹⁹ Ne aba Yudaaya nibakaana, syanjulisa okhwola mumoni cha Kayisali__ si khuba mbo ndi no’musango okhuta khu batu bange. ²⁰ Sakira okhwema khu mboosi yinno nsabire okhubawona enywe nomalome ni nanywe. Siri sityo khulwe suubi eya Yisirairi okhuba mbo mboyirwe no’lujjegere luno.” ²¹ Bakowoolamo baati, “Khutafuna ebaruwa yoosi okhutula ewu'Yudaaya eyikhudiirakho, nende awuma baana beffwe abatulire eyo abatwekesise obikhufwakho oba bawoola syoosi esibi sikhudiirakho. ²² Ne khudakha khuwulire ebibaaso byawo nga lubiri, khuba khusimanyire khuuti abatu wuli awutu balomaloma ngasibadakhisa omukaanda kunno ebirayi.” ²³ Batekekha okhwakanana nende Paulo khuludaalo lundi, nende okhwicha beecha muwungi musitundu akali namenyire. Okhutula echuli okhwola engolobe kabanyonyola no’khulangirira yibali owene’ngo wa Weere khandi kakesakho no’khubakhobya khubidiira khu Yesu okhutula khu malako ka Musa nokhutula mu ba Nnabbi. ²⁴ Abandi beecha bekutta wulayi bikabawoolera, ne abandi bakhayirira okhufukiirira. ²⁵ Beecha bakaana okhufukirisaniya abene nabeene bachaaka okhuwawo Paulo namalire enomaloma yaye eyanjakamo ati: “Omwoyo mwolerefu kalomaloma amasima eyiri bakuuka yenywe nikawoola okhubitira mu nnabbi Yisaya ati: ²⁶ “’Cha eyiri abatu bano omale owoole oti, “Munawurirenge ne nga awuma simutegeera; Munawonenge ne nga awuma simwingisa.” ²⁷ . Khuba omwoyo kwa’batu banno kwamala okhwikalwa; sibakhira khuwulira na’matwi kaawe, ne balimbiriye emoni chawe. nalundi bakhanyalire okhuwona ne’moni chawe, nokhuwulira na’matwi kaawe, nokhutegera ne’myoyo chawe khandi bakalukhana, khandi noola okhubawoniya.’ ²⁸ “Nolwesyo ndakha enywe okhumanya muuti okhuwonesewa khuno khwa Weere khwatumiwa eyiri Abateende, bacha okhutekeresa!” ³⁰ Emyaka chibiri emiramba Paulo kamenya eyo mu nyumba yaye yikapangisa khandi kasangaliranga bosi boosi abechanga okhumuwona. ³¹ Atali khutya nga’wuma abamutekatekaniya kawuulira owen’engo wa Weere khandi kasomesa ebidiira khu Mwami Yesu Kurisito.