¹ Wunanu ebidiira khu biyanwa ebyo’mwoyo, baana befwe, sindakha mube abatamanyire. ² Mumanyire muuti ni mwali abakafwiri, mungira ndala oba eyindi mwali mwakosewa ni mwayiriwa mu misambwa chitalomaloma. ³ Nolwesyo mbawolera nti, awumawo olomalomera omwoyo wa Weere kawoola ati, “Yesu akholimirwe,” khandi awumawo onyala kawola ati, “Yesu mwami,” okhutusakho nga ali no’mwoyo mwolerefu.” ⁴ Ebiyanwa biriwo bingi ebikawukhanire, naye omwoyo kuli mulala. ⁵ Aliwo owuweresa wungi owukhawukhanire, ne Weere nje mulala oyo. ⁶ Aliwo enkhola nyingi, ne Weere wusa mulala oyo nje ochikhosesa mu batu boosi. ⁷ Wunanu wuli mutu kayeresewa owunyala wo’mwoyo okhumukholeramo khu lwo’wulayi wa batu boosi. ⁸ Eyiri mulala aweresewa okhubitira mu mwoyo owubakha wa makesi, eyiri owundi kaweresewa owubakha wo’khumanya nabitira nasirala mu ngira yo’mwoyo, ⁹ eyiri owundi enfukirira no’mwoyo nasirala, ¹⁰ no wundi amaani kebya mangalima, eyiri owundi owunabbi, eyiri owundi okhukawukhaniya emyoyo, eyiri owundi okhulomalomera mu nimi, nende eyiri khandi owundi okhukalukhaniya enimi bichilomalomire. ¹¹ Bino byoosi nje ebikholewa mulala khandi no’mwoyo omwene oyo,khandi kabawa nawuli otula, nga lwaba nakhengirewo. Omubiri Mulala, ne’bitundu Bingi ¹² Omubiri kuli mulala, nende kwakholewa mu bitundu bingi; nende siri mbo ebitundu byakwo bingi, bikhola omubiri mulala. Nje lusiri nende Kurisito. ¹³ Khuba effwe feesi khwabatisiwa no’mwoyo mulala okhwingisiwa mu mubiri mulala__ sibe khu ba Yudaaya oba aba Yonaani, abawambe oba abalekhule__ ne’fwe feesi khwaweresewa omwoyo mulala oyo okhunywa. ¹⁴ Wunanu omubiri sikwakholewa esitundu sirala naye ebitundu bingi. ¹⁵ Nisiba mbo okhukulu khunyala okhuwoola khuuti, “Khulwokhuba sindi mukhono, sindi sirala khu mubiri,” sisyakhakamya olwembosi eyo esitundu sino okhuba sirala khu mubiri. ¹⁶ Singa okhutwi khunyala khwawoola khuuti, “Khuba sindi moni, sindi sirala khu bitundu byo’mubiri,” sino si syakhakamya okhutwi okhuba sirala khu bitundu byo’mubiri. ¹⁷ Singa omubiri kwoosi kwali moni, esitundu syokhuwulira syakhabeye yena? Singa omubiri kwoosi kwali khutwi, esitundu syokhuwunyirisa syakhabeye yena? ¹⁸ Ne mu masima Weere kapanga ebitundu mu mubiri, wuli situndu assiri khu mubiri nje akadakha sibe. ¹⁹ Nisyakhabeye mbo byoosi situndu sirala, omubiri kwakhabeye yena? ²⁰ Nga lusiri, aliwo ebitundu bingi, naye omubiri mulala. ²¹ Emoni siyinyala yawoola omukhono yiiti, “Sinkhudakha!” Nende omutwe sikunyala kwawoola okhukulu, “Sinkhudakha!” ²² Khu luwande lundi, ebitundu byo’mubiri ebiwonekha okhuba binafu, sibyakhalekhekha nawutono, ²³ nende ebitundu bindi bikhubasa khuuti sibiri no’luyaali nawutono, khubiyira no’khwegenderesa khwamaani nge’syadikha. Ne’bitundu bitakhoya biyiriwa nolukoosi lukhiramo, ²⁴ nebyo ebitundu bikhoyera khubidira atali khwegenderesa khwa’maani. Ne Weere kagatta ebitundu byo’mubiri khandi kabiwa oluyaali lukhiramo khu ebyo bitundu ebitali nalwo, ²⁵ khu akhaye okhuba engawukhana mu mubiri, ne nawuli situndu sibe syesigama khu situndu sindi. ²⁶ Ni aba mbo aliwo esitundu syo’mubiri esisaanda, wuli situndu sidoηηire syosi siba sisanda; ni aba esitundu siweresiwire oluyaali, wuli situndu siba sidoηηire sisangalira alala nasyo. ²⁷ Wunanu muli mubiri kwa Kurisito, ni nawuli mulala khwinywe ali situndu sirala khu syo. ²⁸ Nende mukanisa Weere kadoola okhusokha abatume, abokhubiri ba Nabbi, abokhudatu abasomesa, kalosakho abakhosi be byamangalima, na bebiyanwa byo’khuwoniya, nende abo abanyala okhuyeeda abasyawe, abo abali ne’biyanwa byo wutangirisi, nabo abalomaloma mu nimi echikawukhanire. ²⁹ Boosi batume? Boosi banabbi? Boosi basomesa? Boosi bakhola ebya’mangalima? ³⁰ Boosi bayeresewa ebiwanwa byo’wuwoniya, boosi balomaloma mu nimi? Boosi bakalukhaniya? ³¹ Ne mulubirire okhwekomba ebiwanwa bikali.