¹ Paulo, owalangiwa okhuba omutume wa Kurisito Yesu olwo’khudakha khwa Weere, nende nomwanawefwe Sosenesi, ² eyiri ekkanisa ya Weere mu Kkolinso, eyiri abalabisiwa mu Kurisito Yesu abalangiwa okhuba abolerefu, alala nabo abali wuli atu woosi abalaanga eriita ly’Omwami wefwe Yesu Kurisito__ Omwami wawe khandi wefwe: ³ . Essisa ne’mirembe okhutula eyiri Weere sefwe necho’Mwami Yesu Kurisito bibe nanywe. Okhwebasa ⁴ Nebasanga Weere khu lwenywe khu lwe’ssisa syabawa mu Kurisito Yesu. ⁵ Khuba okhubitira mu yee mwayiindira mungira choosi__ munomaloma yenywe yoosi nende mumakesi kenywe koosi_ ⁶ khulwokhuba owujjulisi wefwe owudiira khu Kurisito wakhakhasiwa mwinywe. ⁷ No’lwesyo awuma simutali nasyo okhubitira mu sirawo syo’Mwoyo nga lumuli okhulindiriranga na’mawoofu Omwami wefwe Yesu Kurisito okhukisuliwa. ⁸ Alibatamo amaani okhwola khu njakamo, kho munyale owutolobisiwa khu ludaalo lwo Mwami wefwe Yesu Kurisito. ⁹ Weere, owabalanga okhuba sirala mu musyani Yesu Kurisito Omwami wefwe, mwesikwa. Okhukawukhana mu Kkanisa ¹⁰ Mbekalikhira, baana befwe, mu liita lyo’mwami wefwe Yesu Kurisito, nti mufukirisaniyenge enywe abene nabeene sinyalikhe okhutabawo okhwawukhanamo mwinywe khandi mu’benge sitole mu bibaaso nende mu myoyo. ¹¹ Baana befwe, abandi okhutula mu nyumba ya Kulooye banjekesa baati aliwo emyeero mwinywe. ¹² Sintegesa nje siino: mulala khwinywe awoola ati, “Esse noonda Paulo,” owundi ati, “Esse noonda Appolo,” khandi owundi ati, “Esse noonda Kefwa,” kho no’wundi ati, “Noonda Kurisito.” ¹³ Kurisito kakawukhanamo? Paulo kakhomererwa khu lwenywe? Mwabatiisiwa mu liita lya Paulo? ¹⁴ Nebasa nti esse sinabatisa ata mulala khwinywe okhutusakho Kurisipa nende Gayasi, ¹⁵ wunaanu awuma onyala kawoola ati khwabatiisiwa mu liita lyange. ¹⁶ (Yee, ssesi nabatiisa enyumba ya Sutefwano; okhutuuma awo, sinichulisa ni nabatiisakho omutu wundi.) ¹⁷ Khuba Kurisito sikantuma okhubatiisa, ne okhuwuuliira enjiri__ sinkhosesa emboosi cha makesi ko’wutu, sitakira omusalabba kwa Kurisito okhumaliwamo amaani kaakwo. Kurisito amakesi khandi amaani ka Weere. ¹⁸ Olwokhuba owubakha wo’musalabba wo'wusirusiru eyiri abo abaddima, ne khwifwe abali okhuwonessewa nje amaani ka Weere. ¹⁹ Khuba syawandiikiwa siti: “Nja okhusikhirisa amakesi ka’bakesi; Okhumanya khwa’bakesi nja okhukhufufuyasa.” ²⁰ Omukesi ali yeena? Omusomi ali yeena? Omuyingani we’ndaalo chinno ali yeena? Khuba sinje Weere owakhola owusiru waba makesi kesyalo? ²¹ Khuba okhutula mu makesi ka Weere esyalo okhubita mu makesi kasyo si syamumanya, Weere kasangaala okhubitira muwusirusiru wubawuuliriramo okhuwoniya abo abafukiirira. ²² Abayudaaya babanja owuwonero we’byamagero nabo Abayonaani bakonya amakesi, ²³ Naye efwe khuwuulira Kurisito wakhomererwa: esyekumusa Abayudaaya no’wusirusiru eyiri abateende. ²⁴ Ne eyiri abo Weere balangire, bombi Abayudaaya na Bayonaani, Kurisito maani ka Weere khandi amakesi ka Weere. ²⁵ Khuba owusirusiru wa Weere wukesi okhukhirakho amakesi ko’mutu, khandi owukata wa Weere wukhira amaani ko’mutu. ²⁶ Baana befwe, mubasekho simwali nimulangiwa. Bangi khwinywe simwali bakesi okhwema khu mukero kwe’syalo; simwali abalomaloma abandi babatekeresa; nga khandi simutula khu lwiwulo lwa’maddala ko’luyaali lukali. ²⁷ Ne Weere kangala ebitu bisirusiru mu syalo okhuswasa abakesi; Weere kangala ebitu bitali na’maani mu syalo okhuswasa abamaani. ²⁸ Kangala abitu bya assi mu syalo muno nende abyabisiwamo emoni__ nende abitu ebitali_ okhutusawo ebitu abyakhabeye, ²⁹ kho sibe mbo awumewo onyala kamwepakhirakho. ³⁰ Siri mbo syali khulwaye kho mube mu Kurisito Yesu, owekholire amakesi kefwe okhutula eyiri Weere__ oyo nje, owulungifu wefwe, okhwolerera khwefwe nende okhununuliwa khwefwe. ³¹ No’lwesyo, nga lusyawandiikiwa siiti, “Mulekhe oyo owepakha, kepakhire mu Mwami.”