¹ Abaana ba Lewubeeni n'a baana ba Gaadi babbaire n'e nsolo nyingi inu nyini awo bwe baboine ensi ya Yazeri, n'e nsi y'e Gireyaadi, nga, bona, ekifo ekyo kifo kye nsolo; ² abaana ba Gaadi n’a baaaa ba Lewubeeni ni baiza ni bakoba Musa ne Eriyazaali kabona n'a bakulu ab'e kibiina nti ³ Atalisi n'o Diboni n'o Yazeri n'o Nimula n'o Kesuboni n'o Ereale n'o Sebamu n'o Nebo n'o Beoni, ⁴ ensi Mukama gye yakubbire mu maiso g'e kibiina kya Isiraeri, ensi y'e nsolo, n'a baidu bo balina ensolo. ⁵ Ni batumula nti oba nga tuboine ekisa mu maiso go, ensi eno eweebwe abaidu bo okubba obutaka; totusomokya Yoludaani. ⁶ Musa n'a koba abaana ba Gaadi n'a baana ba Lewubeeni nti bagande banyu batabaala, imwe nga mutyaime wano? ⁷ Era kiki ekibakeŋentereresya omwoyo gw'a baana ba Isiraeri obutasomoka okuyingira mu nsi Mukama gye yabawire? ⁸ Baitawanyu bwe bakolere batyo bwe nabatumire nga nyema e Kadesubanea okubona ensi. ⁹ Kubanga bwe bayambukire mu kiwonvu e Esukoli, ni babona ensi, ni bakeŋentererya omwoyo gw'a baana ba Isiraeri, baleke okuyingira mu nsi Mukama gye yabbaire abawaire. ¹⁰ Obusungu bwa Mukama ni bubuubuuka ku lunaku lufi, n'a layira ng'a koba nti ¹¹ Mazima ti walibba ku basaiza abaniinire okuva mu Misiri, abaakamala emyaka abiri n'o kusingawo, abalibona ensi gye nalayiriire Ibulayimu, Isaaka no Yakobo; kubanga tebasengereirye dala ¹² wabula Kalebu mutaane wa Yefune Omukenizi n'o Yoswa mutaane wa Nuni kubanga abo basengereirye dala Mukama. ¹³ Obusungu bwa Mukama ni bubuubuuka ku Isiraeri, n'a batambuliryatambulirya eyo n'eyo mu idungu emyaka ana, okutuusya eizaire lyonalyona ababbaire bakolere okubbiibi mu maiso ga Mukama lwe bazikiriire. ¹⁴ Era, bona, imwe mwemereire mu kifo kya baitawanyu, okwala okw'a bantu abalina ebibbiibi, okwongera ate ekiruyi kya Mukama eri Isiraeri. ¹⁵ Kubanga bwe mwakyuka obutamusengererya, yabaleka ate omulundi ogw'o kubiri mu idungu naimwe mwazikirirya abantu bano bonabona. ¹⁶ Ni bamusembererya ni bakoba nti twazimbira ensolo gyaisu ebiraalo wano, n'e bibuga olw'abaana baisu Abatobato ¹⁷ naye ife beene tulibba nga tweteekereteekere nga tukwaite eby'o kulwanisya okutangira abaana ba Isiraeri okutuusya lwe tulimala okubayingirya mu kifo kyabwe n’a baana baisu Abatobato balityama mu bibuga ebiriku enkomera olw'abo abatyama mu nsi. ¹⁸ Tetuliirawo mu nyumba gyaisu, okutuusya abaana ba Isiraeri lwe balimala okusikira buli muntu obusika bwe. ¹⁹ Kubanga ti tulisikira wamu nabo emitala wa Yoludaani n'o kweyongerayo; kubanga obusika bwaisu butugwiriire emitala w'eno ewa Yoludaani ebuvaisana. ²⁰ Musa n'a bakoba nti bwe mwakola ekigambo ekyo; mwakwata eby'o kulwanisya okutangira Mukama okutabaala, ²¹ na buli musaiza ku imwe alina eby'o kulwanisya bweyasomoka Yoludaani mu maiso ga Mukama, okutuusya lw'a libbingira dala abalabe be mu maiso ge, ²² ensi ne wangulwa mu maiso ga Mukama awo oluvanyuma kaisi ni mwirawo, ni mutabbaaku musango eri Mukama n'eri Isiraeri; n'e nsi eno yabbanga butaka gye muli mu maiso ga Mukama. ²³ Naye bwe mutaakole mutyo, bona, nga mwonoonere Mukama era mutegeerere dala ng'o kwonoona kwanyu kulibayiiga. ²⁴ Muzimbire abaana banyu abatobato ebibuga, n'e biraalo olw'e ntama gyanyu; era mukole ekyo ekifulumire mu munwa gwanyu. ²⁵ Abaana ba Gaadi n'a baana ba Lewubeeni ni bakoba Musa nti abaidu bo bakola nga mukama wange bw'alagiire. ²⁶ Abaisu abatobato, bakali baisu, embuli gyaisu, n'e nsolo gyaisu gyonagyona byabbanga eyo mu bibuga eby'e Gireyaadi ²⁷ naye abaidu bo basomoka, buli musaiza alina eby'o kulwanisya olw'e ntalo, mu maiso ga Mukama okutabaala, mukama wange bw'atumwire. ²⁸ Awo Musa n'a lagira Eriyazaali kabona ebigambo byabwe n'o Yoswa mutaane wa Nuni n'e mitwe gy'e nyumba gya baitawabwe egy'e bika by'a baana ba Isiraeri. ²⁹ Musa n'a bakoba nti Abaana ba Gaadi n'a baana ba Lewubeeni bwe balisomoka Yoludaani awamu naimwe, buli musaiza alina eby'o kulwanisya olw'e ntalo, mu maiso ga Mukama, ensi n'e wangulwa mu maiso ganyu; kale mulibawa ensi y'e Gireyaadi okubba obutaka ³⁰ naye, bwe bataliikirirya kusomoka wamu na imwe nga bakwaite eby'o kulwanisya, balibba n'o butaka mu imwe mu nsi y'e Kanani. ³¹ Abaana ba Gaadi n'a baana ba Lewubeeni ni bairamu nti nga Mukama bw'a kobere abaidu bo, tutyo bwe twakola. ³² Twasomoka nga tukwaite eby'o kulwanisya mu maiso ga Mukama okuyingira mu nsi y'e Kanani, era obutaka obw'o busika bwaisu bulibba naife emitala wa Yoludaani. ³³ Musa n'a bawa ibo, abaana ba Gaadi n’a baana ba Lewubeeni, n'e kitundu ky'e kika kya Manase mutaane wa Yusufu, obwakabaka bwa Sikoni kabaka w'Abamoli n'o bwakabaka bwa Ogi kabaka wa Basani, ensi ng'e bibuga byayo bwe byabbaire wamu n'e nsalo gyabyo, niibyo bibuga eby'o mu nsi erirainewo. ³⁴ Abaana ba Gaadi ni bazimba Diboni ne Atalosi ne Aloweri; ³⁵ ne Aterosisofani n'e Yazeri n'e Yogubeka; ³⁶ ni Besunimira ni Besukalaani ebibuga ebiriku enkomera n'e bisibo by'e ntama. ³⁷ Abaana ba Lewubeeni ni bazimba Kesuboni n'e Ereale n'e Kiriyasayimu; ³⁸ n'e Nebo n'e Baalumyoni, (nga bawaanyisirye amaina gaabyo), n'e Sibima n'e babituuma amaina agandi ebibuga bye baaziikire. ³⁹ Abaana ba Makiri mutaane wa Manase na bagende e Gireyaadi, n'o bakirya, n'o bagobamu Abamoli ababbaire omwo. ⁴⁰ Musa n'awa Makiri mutaane wa Manase Gireyaadi; n'abba omwo. ⁴¹ Yayiri mutaane wa Manase n'a yaba n'alya ebibuga byayo, n'a byeta Kavosuyayiri. ⁴² Noba n'a yaba n'alya Kenasi, n'e byalo byakyo, n'a kituuma Noba, ng'e riina lye iye bwe lyabbaire.