¹ Mukama n'a koba Musa nti ² Woolera eigwanga ly'a baana ba Isiraeri ku Bamidiyaani; oluvanyuma kaisi okuŋaanyizibwe eri abantu bo. ³ Musa n'a koba abantu nti mutoole mu imwe abasaiza mubawe eby'o kulwanisya olw'e ntalo, batabaale Midiyaani, okuwoolera eigwanga lya Mukama ku Midiyaani. ⁴ Mwatoola ku buli kika lukumi okubunya ebika byonabyona ebya Isiraeri, ne mubatuma okutabaala. ⁵ Awo ni baleeta ku nkumi gya Isiraeri, ku buli kika lukumi, mutwaalo mu nkumi ibiri nga balina eby'o kulwanisya olw'e ntalo. ⁶ Musa n'a basindika okutabaala, ku buli kika lukumi, ibo n'o Finekaasi mutaane wa Eriyazaali kabona, okutabaala, awamu n'e bintu eby'o mu watukuvu n'a makondeere agalawa mu mukono gwe. ⁷ Ni balwana n'e Midiyaani, nga Mukama bwe yalagiire Musa; ni baita buli musaiza. ⁸ Ni baita bakabaka ba Midiyaani wamu n'a bandi abaitiibwe; Evi n'o Lekemu, n'o Zuuli, n'o Kuula, n'o Leeba, bakabaka ba Midiyaani abataanu n'o Balamu mutaane wa Byoli bamwitire n'e kitala. ⁹ Abaana ba Isiraeri ni banyaga abakali ba Midiyaani n'a baana babwe abatobato; n'e bisibo byabwe byonabyona, n'e mbuli gyabwe gyonagona, n'e bintu byabwe byonabyona ni babitwala okubba omunyago. ¹⁰ N'e bibuga byabwe byonabyona mu bifo mwe bagonanga, n'e nsiisira gyabwe gyonagona, ne babyokya omusyo. ¹¹ Ne batwala omunyago gwonagwona ne bye bafunire byonabyona, oba nga bantu oba nga nsolo. ¹² Ni baleeta omwandu ne bye bafunire n'o munyago eri Musa n'eri Eriyazaali kabona n'eri ekibiina ky'a baana ba Isiraeri, eri olusiisira olwabbaire mu nsenyu gya Mowaabu, egiri ku Yoludaani e Yeriko. ¹³ Awo Musa n'e Eriyazaali kabona n'a bakulu bonabona ab'e kibiina ni bafuluma okubasisinkana ewanza w'o lusiisira. ¹⁴ Musa n'a suguwalira abaami b'e igye, abaami b'e nkumi n'a baami b'e bikumi, abaaviire mu kuweererya mu lutabaalo. ¹⁵ Musa n'a bakoba nti Abakai bonabona mubawonyerye okufa? ¹⁶ Bona, bano niibo basobeserye abaana ba Isiraeri ku Mukama, olw'o kuteesya kwa Balamu, mu bigambo bya Peoli, atyo kawumpuli n'abba mu kibiina kya Mukama. ¹⁷ Kale atyanu mulekule buli musaiza ku baana Aba tobato, era mulekule buli Mukali eyamaite omusaiza ng'a gona naye. ¹⁸ Naye abaana Abatobato ab'o buwala, abatamanyanga musaiza nga bagona naye, mubeewonyerye obutafa. ¹⁹ Era musiisire ewanza w'o lusiisira enaku musanvu buli eyaitire omuntu yenayena, era buli eyakomere ku muntu yenayena eya itiibwe, mwerongoosye ku lunaku olw'o kusatu n'o ku lunaku olw'o musanvu, imwe n'o mwandu gwanyu. ²⁰ Na buli kivaalo na buli kintu eky'e kiwu, n'o mulimu gwonagwona ogw'e bikuulu by'e mbuli, n'e bintu byonabyona eby'e misaale, mwerongoosya. ²¹ Eriyazaali kabona n'a koba abasaiza abatabaali abaatabaala nti Lino niilyo eiteeka ery'e kiragiro Mukama ky'a lagiire Musa ²² naye zaabu n'e feeza, ekikomo, ekyoma, eibaati, n'erisasi, ²³ buli kintu ekisobola omusyo, mwakibitya mu musyo, ni kibba kirongoofu; naye kyalongooseibwe n'a maizi ag'o kwawula n'ebyo byonabona ebitasobola musyo mwabibitya mu maizi. ²⁴ Era mulyoza engoye gyanyu ku lunaku olw'o musanvu, ni mubba balongoofu, oluvanyuma kaisi ni muyingira mu lusiisira. ²⁵ Mukama n'a koba Musa nti ²⁶ Bala omuwendo gw'o munyago ogwanyagiibwe, abantu era n'e nsolo, iwe n'e Eriyazaali kabona n'e mitwe gy'e nyumba gya baitawabwe egy'e kibiina ²⁷ mwawulemu omunyago ebitundu bibiri; eky'a basaiza ab'a maani entalo abatabaire, n'e ky'e kibiina kyonakyona ²⁸ omusoloozerye Mukama omusolo ku basaiza abatabaali abatabatabaire buli bitaano obulamu bumu, ku bantu n'o ku nte n'o ku ndogoyi n'o ku mbuli ²⁹ gwize ku kitundu kyabwe, oguwe Eriyazaali kabona, okubba ekiweebwayo ekisitulibwa ekya Mukama. ³⁰ N'o ku kitundu eky'a baana ba Isiraeri watoolaku obumu obutoolebwa ku buli ataanu, ku bantu, ku nte, ku ndogoyi, n'o ku mbuli, ku nsolo gyonagona, n'o buwa Abaleevi, abakuuma enyumba ya Mukama gye bagisisibwa. ³¹ Musa n'e Eriyazaali kabona ni bakola nga Mukama bwe yalagiire Musa. ³² N'e by'o kugereka ebyafiikirewo ku munyago abasaiza abatabaali gwe banyagire, byabbaire entama obusiriivu mukaaga mu emitwaalo musanvu mu nkumi itaano, ³³ n'e nte emitwaalo musanvu mu nkumi ibiri, ³⁴ n'e ndogoyi emitwaalo mukaaga mu lukumi, ³⁵ n'a bantu emitwaalo isatu mu nkumi ibiri okugaita bonabona, ku bakaali abatamanyanga musaiza nga bagona naye. ³⁶ N'e kitundu ekyabbaire eky'abo abatabaire, omuwendo gwakyo kyabbaire entama obusiriivu busatu mu emitwaalo isatu mu kasanvu mu bitaano ³⁷ n'o musolo gwa Mukama ogw'o ku ntama gwabbaire lukaaga mu nsanvu na itaanu. ³⁸ N'e nte gyabbaire emitwaalo isatu mu kakaaga; ku egyo omusolo gwa Mukama gwabbaire nsanvu na ibiri. ³⁹ N'e ndogoyi gyabbaire emitwaalo isatu mu bitaano; ku egyo omusolo gwa Mukama gwabbaire nkaaga na imu. ⁴⁰ N'a bantu babbaire mutwaalo mu kakaaga; ku abo omusolo gwa Mukama gwabbaire abantu asatu na babiri. ⁴¹ Musa n'awa Eriyazaali kabona omusolo, niikyo kyabbaire ekiweebwayo ekisitulibwa ekya Mukama, nga Mukama bwe yalagiire Musa. ⁴² Musa n'atoola ku kitundu eky'a baana ba Isiraeri, Musa kye yayawire ng'a kitoola ku basaiza abatabaire, ⁴³ (era ekitundu eky'e kibiina kyabbaire entama obusiriivu busatu mu mitwaalo isatu mu kasanvu mu bitaanu, ⁴⁴ n'e nte emitwaalo isatu mu kakaaga, ⁴⁵ n'e ndogoyi emitwaalo isatu mu bitaano, ⁴⁶ n'a bantu omutwalo mu kakaaga;) ⁴⁷ ku kitundu eky'a baana ba Isiraeri Musa n'a toola obulamu bumu obutoolebwa ku buli ataanu, ku bantu era n'o ku nsolo, n'a biwa Abaleevi abakuumanga enyumba ya Mukama gye bagisisiibwe; nga Mukama bwe yalagiire Musa. ⁴⁸ N'a baami abaatwaire enkumi egy'o mu igye, abaami b'e nkumi n'a baami b'e bikumi, ni basemberera Musa ⁴⁹ ni bakoba Musa nti Abaidu bo babalire omuwendo gw'a basaiza abatabaali be tutwala, so ti kugotereku muntu n'o mumu ku ife. ⁵⁰ Era tuleetere ekirabo kya Mukama, buli muntu ky'a funire, eby'o buyonjo eby'e zaabu, emikuufu egy'o ku magulu, n'e misaaga, empeta egiriku obubonero n'e gy'o mu matu, n'e bikomo, okutangirira obulamu bwaisu mu maiso ga Mukama ⁵¹ Musa n'e Eriyazaali kabona ni babatoolaku ezaabu, eby'o buyonjo byonabyona ebiweesye. ⁵² Ne zaabu yonayona ey'e kiweebwayo ekisitulibwa kye bawaireyo eri Mukama; nga bagitoola ku baami b'e nkumi n'o ku baami b'e bikumi, yabbaire sekeri mutwaalo mu kakaaga mu lusanvu mu ataanu. ⁵³ (Kubanga abasaiza abatabaali; babbaire beenyagiire ebintu, buli muntu ebibye.) ⁵⁴ Musa n'e Eriyazaali kabona ne batwala ezaabu ey'a baami b'e nkumi n'a b'e bikumi, ni bagireeta mu wema ey'o kusisinkanirangamu, okubba nga ekiijukiryo eri abaana ba Isiraeri mu maiso ga Mukama. Ensuula