¹ Awo ne wasembera bawala ba Zerofekadi, mutaane wa Keferi, mutaane wa Gireyaadi, mutaane wa Makiri, mutaane wa Manase, ab'o ku nda gya Manase mutaane wa Yusufu ne gano niigo maina ga bawala be; Maala, Noowa n'o Kogula n'o Mirika n'o Tiruza. ² Ne bemerera mu maiso ga Musa n'o mu maiso ga Eriyazaali kabona n'o mu maiso g'a bakulu ne kibiina kyonakyona, ku mulyango gw'e weema ey'o kusisinkanirangamu, nga batumula nti ³ Itawaisu yafiriire mu idungu, so wabula mu kibiina ky'abo abekuŋaanyirya ku Mukama mu kibiina kya Koola naye yafiiriire mu kibbiibi kye iye; so ti yazaire baana bo bwisuka. ⁴ Ekyabba kitolesyawo ki eriina lya Itawaisu ku nda ye, kubanga ti yazaire mwana w'o bwisuka? Mutuwe obutaka mu bagande ba Itawaisu. ⁵ Musa n'a twala ensonga yaabwe mu maiso ga Mukama. ⁶ Mukama n'a koba Musa nti ⁷ Bawala ba Zerofekadi batumula bye nsonga tolireka kubawa butaka bwo busika mu bagande ba itawabwe; era olibasikisya obusika bwa itawabwe. ⁸ Era wakoba abaana ba Isiraeri nti omusaiza bweyafanga nga tazaire mwana w'o bwisuka, kale muwala we mwamusikisyanga obusika bwe. ⁹ Era bweyabbanga abula mwana wo buwala, kale mwawanga bagande be obusika bwe. ¹⁰ Era bweyabbanga abula b'o luganda, kale mwawanga bagande ba itaaye obusika. ¹¹ Era itaaye bweyabbanga abula b'o luganda, kale mwawanga obutaka bwe oyo amuli okumpi mu luganda ku nda ye, naye yabulyanga era lyabbanga eri abaana ba Isiraeri iteeka ly'o musango, nga Mukama bwe yalagiire Musa. ¹² Awo Mukama n'a koba Musa nti niina ku lusozi luno Abalimu, olengere ensi gye mpaire abaana ba Isiraeri. ¹³ Kale bwe wamala okugirengera, weena olikuŋaanyiribwa eri abantu bo, nga Alooni Mugande wo bwe yakuŋaanyiriibwe ¹⁴ kubanga mwajeemeire ekigambo kyange mu idungu Zini, mu kuwakana kw'e kibiina, okuntukulirya ku maizi mu maiso gaabwe. (Ago niigo maizi ag'e Meriba e Kadesi mu idungu Zini.) ¹⁵ Musa n'akoba Mukama nti ¹⁶ Mukama, Katonda w'emyoyo gya bonabona abalina emibiri, alonde Omusaiza okufuga ekibiina, ¹⁷ yafulumanga mu maiso gaabwe, era yayingiranga mu maiso gaabwe, era yabafulumyanga, era yabegeresyanga; ekibiina kya Mukama kireke okubba ng'e ntama egibula musumba. ¹⁸ Mukama n'a koba Musa nti twala Yoswa mutaane wa Nuni, Omusaiza alina omwoyo, Omuteekeku omukono gwo; ¹⁹ omwemererye mu maiso ga Eriyazaali kabona n'o mu maiso g'e kibiina kyonakyona; omukuutirire mu maiso gabwe. ²⁰ Era wamuteekaku ku kitiibwa kyo, ekibiina kyonakyona eky'a baana ba Isiraeri bawulirenga. ²¹ Era yayemereranga mu maiso ga Eriyazaali kabona, yamubuuliryanga olw'o musango gwa Ulimu mu maiso ga Mukama bafulumanga lw'e kigambo kye, era bayingiranga lw'e kigambo kye, iye n'a baana ba Isiraeri bonabona wamu naye, ekibiina kyonakyona. ²² Musa n'akola nga Mukama bwe yamulagiire n'a twala Yoswa, n'a mwemererya mu maiso ga Eriyazaali kabona, n'o mu maiso g'e kibiina kyonakyona ²³ n'a muteekaku emikono, n'a mukuutira, nga Mukama bwe yatumwire n'o mukono gwa Musa. Essuula