¹ (Era Yeriko kyabbaire kiigaliirwewo dala olw'a baana ba Isiraeri wabula afuluma, waire ayingira.) ² Mukama n'a koba Yoswa nti Bona, nkikuwaire mu mukono gwo Yeriko, n'o kabaka waamu, n'a bazira Ab'a maani. ³ Era mulikyetooloola ekibuga, abalwani mwenamwena, nga mukyetooloola omulundi gumu. Bwewakolanga otyo enaku omukaaga. ⁴ N'a bakabona omusanvu balisitula eŋombe omusanvu egy'a maziga ag'e ntama ensaiza nga bagitangiirye esanduuku: n'o ku lunaku olw'o musanvu mulikyetooloola ekibuga emirundi musanvu; n'a bakabona balifuuwa eŋombe. ⁵ Awo, bwe balifuuwa eŋombe egy'a maziga ag'e ntama ensaiza era bwe muliwulira eidoboozi ery'e ŋombe, abantu bonabona kaisi ni batumulira waigulu n'e idoboozi inene; bugwe ow'e kibuga kaisi n'agwira dala wansi, abantu ni baniina buli muntu mu maiso ge. ⁶ Yoswa, omwana wa Nuni, n'a yeta bakabona, n'a bakoba nti Musitule esanduuku ey'e ndagaanu, era bakabona musanvu basitule eŋombe musanvu egy'a maziga ag'e ntama ensaiza bagitangirisye esanduuku ya Mukama: ⁷ Ne bakoba abantu nti mubite, mwetooloole ekibuga, n'a balina eby'o kulwanisya batangire esanduuku ya Mukama. ⁸ Awo Yoswa bwe yamalire okutumula n'a bantu, bakabona omusanvu abaasiteire eŋombe omusanvu egy'a maziga ag'e ntama ensaiza mu maiso ga Mukama ni babita, ne bafuuwa eŋombe: esanduuku ey'e ndagaanu ya Mukama ng'e bavaaku enyuma. ⁹ Abalina eby'o kulwanisya ne batamgira bakabona abaafuuwa eŋombe, ab'e nyuma ne basengererya esanduuku, nga bafuuwa eŋombe nga batambula. ¹⁰ Yoswa n'a lagira abantu, ng'atumula nti Temutumulira waigulu, n'e idoboozi lyanyu lireke okuwulirwa, n'e kigambo kyonakyona kireke okuva mu munwa gyanyu, okutuusya ku lunaku lwe ndibalagira okutumulira waigulu; kaisi ni mutumulira waigulu. ¹¹ Atyo yagyetooloirye ekibuga esanduuku ya Mukama, nga bakyetooloirye omulundi gumu ne bayingira mu lusiisira, ne bagona mu lusiisira. ¹² Yoswa n'a wuna amakeeri n'a golokoka, na bakabona ne basitula esanduuku ya Mukama. ¹³ Ne bakabona omusanvu abaasitwire eŋombe omusanvu egy'a maziga ag'e ntama ensaiza nga bagitangiirye esanduuku ya Mukama ni baaba obutalinda, ne bafuuwa eŋombe: n'a balina eby'o kulwanisya nga babatangiire: n'a b'e nyuma ne basengererya esanduuku ya Mukama nga bafuuwa eŋombe nga batambula. ¹⁴ No ku lunaku olw'okubiri ne beetooloola ekibuga omulundi gumu, ne bairayo mu lusiisira: bwe baakolere batyo enaku mukaaga. ¹⁵ Awo ku lunaku olw'o musanvu ne bawuna amakeeri pwi, ni beetooloola ekibuga emirundi musanvu batyo: naye ku lunaku olwo beetooloire ekibuga emirundi musanvu. ¹⁶ Awo ku mulundi ogw'o musanvu, bakabona bwe bafuuwire eŋombe, Yoswa n'a koba abantu nti Muleekaane; kubanga Mukama abawaire ekibuga. ¹⁷ N'e kibuga kirigisirwa Mukama, ekibuga ne byonabyona ebirimu: Lakabu omwenzi Niiye aliwona yenka, iye ni bonabona abali awamu naye mu nyumba, kubanga yagisire abatume, be twatumire. ¹⁸ Mweena mwewalire dala mu bigisiibwe Mukama, muleke okutwala ku bigisiibwe, nga mumalire okubigisa; mutyo mwandifiire olusiisira lwa Isiraeri olukolimiirwe, era mwandirweraliikiriirye; ¹⁹ Naye efeeza yonayona n’e zaabu n'e bintu eby'e bikomo n'e by’e byoma niibyo bitukuvu eri Mukama; biriiza mu igwanika lya Mukama. ²⁰ Awo abantu ni baleekaana, ne bafuuwa eŋombe; awo, abantu bwe bawuliire eidoboozi ery'e ŋombe abantu kaisi ni batumulira waigulu n'e idoboozi inene, bugwe n'a gwira dala wansi, abantu ni baniina mu kibuga, buli muntu mu maiso ge, ni bamenya ekibuga. ²¹ Ne bazikiririrya dala ebyabbaire mu kibuga byonabyona, abasaiza n'a bakali, abatobato n'a bakulu; n'e nte, n'e ntama, n'e ndogoyi, ni babiita n'e kitala. ²² Yoswa n'a koba abasaiza ababiri abakeetere ensi nti mwabe mu nyumba ey'o mwenzi, mumufulumye omukali, ne by'alina byonabyona, nga bwe mwamulayiriire. ²³ Abavubuka abakeeti ni bayingira, ni bamufulumya Lakabu, n'o itaaye, n'o maye; n'a bagande be, ne byonabyona by'alina, era n'e kika kye kyonakyona ni babafulumya; ni babateeka ewanza ku lusiisira lwa Isiraeri: ²⁴ Ekibuga ni bakyokya omusyo, n’e byabbairemu byonabyona: naye efeeza n'e zaabu n'e bintu eby'e bikomo n'e by'e byoma byonka baabiteekere mu igwanika ery'e nyumba ya Mukama. ²⁵ Naye Lakabu omwenzi, n'a b'e nyumba ya itaaye ne byonabyona bye yabbaire nabyo, Yoswa n'a bawonya; n'abba wakati mu Isiraeri, ne watyanu; kubanga yagisire abatume, Yoswa be yatumire okukeeta Yeriko. ²⁶ Yoswa n'abalayirya ekirayiro mu biseera ebyo, ng'a tumula nti alaamibwe mu maiso ga Mukama oyo alyemerera n'a zimba ekibuga kino Yeriko: mu kufiirwa omwana we omuberyeberye mw'a liteekarawo emisingi gyakyo, era mu kufiirwa omwana we omutomuto alisimba enjigi gyakyo. ²⁷ Atyo Mukama yabbanga n'o Yoswa; n'e bigambo bye n'e byatiikirira mu nsi yonayona.