¹ Na buno niibwo busika abaana ba Isiraeri bwe balire mu nsi y'e Kanani, Eriyazaali kabona, n'o Yoswa, omwana wa Nuni, n'e mitwe gy'e nyumba egya baitawabwe egy'e bika eby'a baana ba Isiraeri bwe babagabiire, ² mu kalulu ak'o busika bwabwe, nga Mukama bwe yalagiire mu mukono gwa Musa, eri ebika omwenda n'e kitundu eky'e kika. ³ Kubanga Musa yabbaire ng'a gabire obusika obw'e bika bibiri n'e kitundu eky'e kika emitala wa Yoludaani: naye Abaleevi teyabagabiire busika mu ibo. ⁴ Kubanga abaana ba Yusufu babbaire ebika bibiri, Manase n'o Efulayimu: ni batabawa mugabo mu nsi Abaleevi, wabula ebibuga eby'o kutyamamu, n'e byalo ebyabbaire biriraine, eitale ery'o kulundiramu ente gyabwe n'e bintu byabwe. ⁵ Nga Mukama bwe yalagiire Musa, abaana ba Isiraeri bwe bakolere batyo, ne bagabana ensi. ⁶ Abaana ba Yuda kaisi ni baiza eri Yoswa mu Girugaali: n'o Kalebu, omwana wa Yefune Omukenizi, n'a mukoba nti Omaite ekigambo Mukama kye yakobere Musa ku nze ne ku iwe mu Kadesubanea. ⁷ Nabbaire naakamala emyaka ana. Musa omuweererya wa Mukama bwe yantumire okuva mu Kadesubanea okukeeta ensi; ni muleetera ebigambo nga bwe kyabbaire mu mwoyo gwange. ⁸ Naye bagande bange abaniinire nanze ni basaanuukya omwoyo gw'a bantu: naye nze nasengereirye dala Mukama Katonda wange: ⁹ Musa n'a layira ku lunaku ludi, ng'a tumula nti Mazima ensi gy'o niniremu ekigere kyo eribba busika eri iwe n'eri abaana bo emirembe gyonagyona, kubanga osengereirye dala Mukama Katonda wange. ¹⁰ Ne watyanu, bona, Mukama ampangairye, nga bwe yatumwire, emyaka gino ana n'e itaanu, okuva ku biseera bidi Mukama lwe yakikobere Musa ekigambo ekyo, Isiraeri bwe yatambuliranga mu idungu: ne watyanu, bona, watyanu naakamala emyaka kinaana na itaanu. ¹¹ Okutuusya watyanu nina amaani watyanu nga bwe nabbaire ku lunaku ludi Musa lwe yantumire: ng'a maani gange bwe gabbaire mu biseera bidi, amaani gange bwe gabbaire atyanu gatyo, okulwana n'o kufuluma n'o kuyingira. ¹² Kale watyanu mpa olusozi luno, Mukama lwe yatumwireku ku lunaku ludi; kubanga wawuliire ku lunaku ludi nga Abanaki mwe babbaire, n'e bibuga ebinene ebiriku ebigo: Koizi Mukama alibba nanze, nzena ndibabbinga, nga Mukama bwe yatumwire. ¹³ Yoswa n'a musabira omukisa; n'a muwa Kalebu omwana wa Yefune Kebbulooni okuba obusika. ¹⁴ Kebbulooni kye lwaviire lubba obusika bwa Kalebu omwana wa Yefune Omukenizi, ne atyanu; kubanga yasengereirye dala Mukama Katonda wa Isiraeri. ¹⁵ N'e riina lya Kebbulooni eira lyabbaire Kiriasualuba; Aluba oyo yabbaire mukulu mu Banaki. Ensi n'e wumula okulwana.