¹ Awo Erifaazi Omutemani n'a iramu n'a tumula nti ² Omuntu asobola okugasa Katonda? Mazima ow'a magezi yeegasa yenka. ³ Kiriku bwe kisanyusa Omuyinza w'e bintu byonabyona iwe okubba omutuukirivu? Oba kimugasa iwe okutuukirirya amangira go? ⁴ Kubanga omutya kyava akunenya, Kyava asala omusango gwo? ⁵ Obubbiibi bwo ti bungi? So n'o butali butuukirivu bwo bubulaku gye bukoma. ⁶ Kubanga watoire ku Mugande wo emisingo egy'o bwereere, n'oyambula ababbaire obwereere ebivaalo byabwe. ⁷ Tonywisyanga maizi omukoowu, era waama omuyala emere. ⁸ Naye ow'a maanni niiye yaliire ensi; N'ow'ekitiibwa niiye yagibbairemu. ⁹ Wasindikire banamwandu nga babula kintu, N'emikono gy'a babula itawabwe gyamenyekere. ¹⁰ Obukuniryyo kyebuva bukwetooloola, n'e ntiisya gy'otomanyiriire ekweraliikirirya, ¹¹ Oba endikirirya n'o tosobola kubona, Amaizi amangi ni gakubikaku. ¹² Katonda tali mu igulu awagulumizibwa? Era bona emunyeenye bwe gyekankana obugulumivu! ¹³ Weena otumula nti Katonda amaite ki? Asobola okusala omusango ng'ayema mu ndikirirya ekwaite? ¹⁴ Ebireri ebiziyivu bimubiikaku n'o kubona tabona; Era atambulira mu kwekulungirira kw'e igulu. ¹⁵ Otaka okukwata engira ey'eira abantu ababbiibi gye baniinirangamu? ¹⁶ Abaakwakulibwa entuuko gyabwe nga gikaali kibbaawo, Omusingi gwabwe ni gufukibwa ng'o mwiga: ¹⁷ Abakobanga Katonda nti Tuveeku: Era nti Omuyinza w'e bintu byonabyona asobola kutukolera ki? ¹⁸ Naye yaizwirye enyumba gyabwe ebisa: Naye okuteesya kw'a babbiibi kundi wala. ¹⁹ Abatuukirivu bakibona ni basanyuka; n'abulaku musango abasekerera inu: ²⁰ Ng'atumula nti Mazima abo abatugolokokeireku bamaliibwewo, n'abo abafiikirewo omusyo gubookyerye. ²¹ Yega obbe n'e mirembe: Otyo bwewabbanga n'ebisa. ²² Nkwegayiriire, ikirirya amateeka eri omunwa gwe, era gisa ebigambo bye mu mwoyo gwo. ²³ Bwe wairangawo eri Omuyinza w'e bintu byonabyona, wazimbibwanga; Bwe watolangawo obutali butuukirivu okubba ewala n'e weema gyo. ²⁴ N'oteeka ebibyo eby'obugaiga mu nfuufu, ne zaabu eya Ofiri mu mabbaale ag'o mu bwiga; ²⁵ Kale Omuyinza w'e bintu byonabyona niiye eyabbanga obugaiga bwo, Era yabbanga efeeza y'o muwendo mungi gy'oli. ²⁶ Kubanga lw'e wasanyukiranga Omuyinza w'e bintu byonabyona, Era wayimusanga amaiso go eri Katonda. ²⁷ Wasabanga okusaba kwo eri iye, yeena yakuwuliranga; Era wasasulanga obweyamubwo. ²⁸ Era walagiranga ekigambo ni kinywera gy'oli; n'o musana gwayakiranga amangira go. ²⁹ Bwe bakusuula, watumulanga nti Waliwo okuyimusibwa; Era yalokolanga eyeetoowaza. ³⁰ Yawonyanga n'oyo abba abulaku musango: Niiwo awo, yawonyezebwanga olw'obulongoofu bw'e ngalo gyo.