¹ Awo Yobu n'a iramu n'a tumula nti mpulisisya bingi ebiri bityo: ² Mwenamwena muli basanyusya abatagasa. ³ Ebigambo ebibulamu byakomere? Oba kiki ekikusosonkererya n'o kwiramu n'o iramu? ⁴ Era nzena nandisoboire okutumula nga imwe bwe mutumula; Emeeme yanyu singa ebbaire mu kifo ky'e meeme yange, Nandisoboire okutunga ebigambo okubanenya, n'o kubasiisikirya omutwe gwange. ⁵ Naye nandibawaire amaani n'o munwa gwange, n'o kusanyusya kw'o mumwa gwange kwandiikaikanirye obwinike bwanyu. ⁶ Waire nga ntumula, obwinike bwange tukaali kwikaikana: Era waire nga nzibiikirirya, mpumulibwa ntya? ⁷ Naye atyanu ankoowerye: N'e kibiina kyange kyonakyona okizikirye. ⁸ Era onkwatiire dala, niiye mujulirizi gye ndi: N'obuyondi bwange bungolokokeraku, bunumirirya mu maiso gange. ⁹ Antaagwiire n'e kiruyi kye, anjiiganyirye; era anumirye obujugu: Omulabe wange anfundulira amaiso. ¹⁰ Banjasamiire omuwa gwabwe; Bankubbire empi nga banswaza: Bankuŋaaniraku. ¹¹ Katonda angabula eri atatya Katonda, Era ansuula mu mikono gy'a babbiibi. ¹² Nabbaire mpeeraweera n'a njasyaamu wakati; niiwo awo, yankwaite mu ikoti n'a ntandaagira okumenyamenya: Era ansimbire okubba sabbaawa ye. ¹³ Abalasi be banzingizirye enjuyi gyonagyona, Ayasyaamu eikoti lyange so tasonyiwa; afuka omususa gwange ku itakali. ¹⁴ Ayaba yeeyongera okumenyamenya; Anfubutukiraku ng'o muzira. ¹⁵ Ntungire ebinyakinyaki ku luwu lwange, Era ntaire eiziga lyange mu nfuufu. ¹⁶ Amaiso gange goonoonekere olw'o kukumga amaliga, n'o ku biweero byange kuliku ekiwolyo ky'o kufa; ¹⁷ Waire nga mubula kyeju mu ngalo gyange, n'o kusaba kwange kulongoofu. ¹⁸ Ai ensi, tobiika ku musaayi gwange, n'o kukunga kwange kuleke okubbaaku we kuliwumulira. ¹⁹ Ne watyanu, bona, omujulizi wange ali mu igulu, n'omwema wange ali waigulu. ²⁰ Mikwanu gyange banyooma: Naye eriiso lyange lifuka amaliga eri Katonda; ²¹ Azibire ensonga y'o muntu eri Katonda, n'e y'o mwana w'o muntu eri mwinaye. ²² Kubanga emyaka ti mingi bwe giriwaaku, nditambula olugendo gye ntaliva okwirawo.