¹ Awo Erifaazi Omutemani n’airamu n’a tumula nti ² Ow'a magezi yandiriremu n'o kumanya okubulamu, n'a izulya ekida kye n'e mpunga egy'e buvaisana? ³ Yandiwakaine n'e bigambo ebibulaku kye bigasa, oba ng'a tumula ebibulaku kye bisobola? ⁴ Niiwo awo, omalawo okutya, era oziyizya okutaka Katonda mu maiso ge. ⁵ Kubanga obutali butuukirivu bwo niibwo bwegeresya omunwa gwo, Era weerobozya olulimi lw'a bagerengetanya. ⁶ Omunwa gwo niigwo ogukusalira omusango okukusinga so ti ninze; niiwo awo, omunwa gwo niigwo mujulirwa eri iwe. ⁷ Niiwe wasookere abantu bonabona okuzaalibwa? Oba iwe baakuzaire ensozi nga gikaali kubbaawo? ⁸ Wabbaire owuliire okuteesya kwa Katonda okw'o mu kyama? Era weeyetere wa magezi wenka mumu? ⁹ Kiki ky'o maite ife kye tumaite? Kiki ky'o tegeera ekibula mu ife? ¹⁰ Abamerere envi n'a bakaire einu bali wamu naife, abasinga einu itaawo obukaire. ¹¹ Okusanyusa kwa Katonda kutono, tikukumala, n'e kigambo ekitumula naiwe empola? ¹² Omwoyo gwo gukutwalira ki? N'a maiso go gatemerya ki? ¹³ N'o kukyusya omwoyo gwo okulwana n'o Katonda, n'oleka ebigambo ebiri bityo okuva mu munwa gwo. ¹⁴ Omuntu niikyo kiki abbe omulongoofu? N'oyo azaalibwa omukali abbe omutuukirivu? ¹⁵ Bona, tiyeesiga batukuvu be; niiwo awo, eigulu ti irongoofu mu maiso ge. ¹⁶ Omugwagwa era omuvundu ti niiye asinga einu obutabba mulongoofu, omuntu anywa obutali butuukirivu ng'a maizi! ¹⁷ Nakwolesya, mpulira; n'ekyo kye mboine kye nabuuliire: ¹⁸ (Ab'amagezi kye baabuuliranga ikuva ku bazeiza babwe, ne batakigisa; ¹⁹ Abaweweibwe ensi bonka, so wabula munaigwanga eyayetere mu ibo:) ²⁰ Omubbiibi abba kida ky'o bwinike enaku gye gyonagyona, niigwo muwendo gw'e myaka egyamugisiirwe omujoogi. ²¹ Eidoboozi ery'e ntiisya libba mu matu ge; Bw'abba ng'aboine omukisa omunyagi alimugwaku: ²² Taikirirya ng'a liira okuva mu ndikirirya, Era ekitala kimulindirira: ²³ Atambuliratambulira ekyokulya ng'a tumula nti kiri waina? Amaite ng'o lunaku olw'e ndikirirya lweteekereteekere, luli ku mukono gwe. ²⁴ Okweraliikirira n'o bubalagali bimutiisya; bimuwangula nga kabaka eyeeteekereteekere okulwana: ²⁵ Kubanga agoloire omukono gwe eri Katonda, n'agirira Omuyinza w'e bintu byonabona eby'ekyeju; ²⁶ Amufubutukiraku ng'a kakanyaire eikoti lye, n'amadondo amanene ag'oku ngabo gye: ²⁷ Kubanga abiikire ku maiso ge obugeizi bwe, era aleetere ebifi by'a masavu ku mpete gye; ²⁸ Era yabbanga mu bibuga eby'a matongo, mu nyumba omubula muntu, Egyabbaire gitaka okufuuka ebifunvu. ²⁹ Tagagawalenga so n'ebintu bye tibyabbenga byo lubeerera, so n'e bibala byabwe tebyakutamenga okutuuka ku itakali. ³⁰ Taavenga mu ndikirirya; omusyo gwakalyanga amatabi ge, Era yavangawo olw'o mwoka ogw'o mu munwa gwe. ³¹ Aleke okwesiga ebibulamu nga yebbeyabbeya: Kubanga ebibulamu niibyo byabbanga empeera ye. ³² Yekomenkerezebwanga ebiseera bye nga bikaali kutuukirira, n'e itabi lye tiryagumiryenga. ³³ Yakunkumulanga eizabbibu gye egikaali kwenga ng'o muzabbibu, Era yasinsimulanga ekimuli kye ng'o muzeyituuni. ³⁴ Kubanga ekibiina ky'abatatya Katonda kyabbanga kigumba, Era omusyo gwayokyanga eweema egyalwangamu enguzi. ³⁵ Babba bida by'o bubbiibi, ni bazaala obutali butuukirivu, kida kyabwe kiteekateeka bukuusa.