¹ Bona, eriiso lyange lyaboine ebyo byonabyona, ekitu kyange kyabiwuliire ni kibitegeera. ² Bye mumaite era nzena mbimaite: Imwe timunsinga. ³ Mazima natumwire n'Omuyinza w'e bintu byonabyona, Era ntaka kuteesya n'o Katonda. ⁴ Naye imwe mugunja eby'o bubbeyi, Mwenamwena muli basawo ababulaku kye bagasa. ⁵ Singa musirikiire dala! Lwe mwandibbaire n'a magezi. ⁶ Muwulire ensonga yange, Mutege okitu eri okuwozya kw'o munwa gwange. ⁷ Mwawozererya Katonda nga mutumula ebitali by'e songa, Era nga muleeta eby’o bubbeyi? ⁸ Mwamutya kitiibwa? Mwamutonganira Katonda? ⁹ Kisa iye okubakebera? Oba ng'o muntu bw'abbeya mwinaye mwamubbeya iye? ¹⁰ Talireka kubanenya, bwe mwatya ekitiibwa mu kyama. ¹¹ Obukulu bwe obusinga tibulibatiisya n'entiisya ye teribagwaku? ¹² Ebigambo byanyu ebiijukirwa ngero gy'e ikoke, enkomera gyanyu nkomera gye itakali. ¹³ Musirike mundeke ntumule, ebyataka okwiza bingizire. ¹⁴ Kiki ekyabba kintwalisya omubiri gwange mu mainu gange, ne nteeka obulamu bwange mu mukono gwange? ¹⁵ Newaire ng'a ngita era naye namulindiriranga: Era naye naakakasyanga amangira gange mu maiso ge. ¹⁶ Era ekyo niikyo ekyabbanga obulokozi bwange; Kubanga omusaiza atatya Katonda taatuukenga mu maiso ge. ¹⁷ Muwulire inu ebigambo byange, N'ebyo bye njatula bibbe mu matu ganyu. ¹⁸ Bona , ndiraanyirya ensonga yange; Maite nga ndi mutuukirivu. ¹⁹ Yani eyawakana nanze? Kubanga atyanu nasirika ni ndekula omwoka. ²⁰ Kyooka tonkola bigambo bibiri, Kale ni ntegisa amaiso go: ²¹ Ntoolaku omukono gwo gumbe wala; So n'e ntiisya yo ereke okunkanga. ²² Kale koowoola iwe Nzena navugira; Oba leka ntumule weena ongiremu. ²³ Obutali butuukirivu bwange n'e bibbiibi byange byekankana waina obungi? Ntegeeza okusobya kwange n'o kwonoona kwange. ²⁴ Ongisira ki amaiso go, n'o njeta omulabe wo? ²⁵ Wacoca eisubi eritwalibwa empewo? Era wayiganya ebisasiro ebikalire? ²⁶ Kubanga ompandiikira ebigambo eby'eikabyo, era onsikisya obutali butuukirivu obw'o mu butobuto bwange: ²⁷ N'e bigere byange obisiba mu nvuba, era obona amangira gange gonagona; okolobolya olukolobozye okwetooloola ebigere byange: ²⁸ Waire nga nfaanana ekintu ekivundu ekiwaawo, ekivaalo ekiriiriibwe enyenje.