¹ Awo Yobu n'a iramu n'a tumula nti ² Mazima dala imwe muli bantu beene, Era amagezi galifiira wamu naimwe. ³ Naye nzena nina okutegeera so ti niimwe mwenka; Imwe timunsinga: Niiwo awo, yani atamaite ebiri ng'ebyo? ⁴ Ninga omuntu asekererwa eri mwinaye, omusaiza eyakungiire Katonda n'a mwiramu: Omusaiza ow'e nsonga era eyatuukiriire asekererwa. ⁵ Mu kulowooza kw'oyo eyeikya mulimu okunyooma akabbiibi; Kweteekeireteekeire abo abatyerera n'e kigere kyabwe. ⁶ Eweema egy'a banyagi gibona omukisa, n'abo abasola Katonda babba mirembe; Katonda aleeta ebintu bingi mu mukono gwabwe. ⁷ Naye buulya ensolo, gyakwegeresya; N'e nyonyi egy'o mu ibbanga, gyakukobera: ⁸ Oba tumula n'e itakali, lyakwegeresya; n'e bye nyanza ebiri mu nyanza byakunyonyola. ⁹ Yani atamaite mu ebyo byonabona, ng'o mukono gwa Mukama niigwo guleetere ebyo? ¹⁰ Obulamu bwa buli kintu ekiramu buli mu mukono gw'oyo, n'o mwoka gw'a bantu bonabona. ¹¹ Ekitu tikikema bigambo, era ng'a matama bwe galega ku mere yaago? ¹² Amagezi gabba n'a basaiza abakaire, n'okutegeera kubba mu kuwangaala enaku nyingi. ¹³ Eri iye eriyo amagezi n'a maani; niiye alina okuteesya ebigambo n'o kutegeera. ¹⁴ Bona, amenya so tekisoboka kuzimbibwa ate; Aigalira omuntu so tiwasobola kubbaawo kwigulawo. ¹⁵ Bona, aziyizya amaizi ne gakala; Ate agasindika ni gafuundika ensi. ¹⁶ Eri ye eriyo amaani n'o kukolera dala; Abbeyebwa n'a bbeeya babe. ¹⁷ Atwala abateesya b'e bigambo nga banyagiibwe, n'abalamuzi abafuula abasirusiru. ¹⁸ Asumulula olujegere lwa bakabaka, Era asiba enkeende gyabwe n'o lukoba. ¹⁹ Atwala bakabona nga banyagiibwe, Era amega ab'a maanyi. ²⁰ Abeesigwa amalawo okutumula kwabwe, n'abakaire abatoolaku okutegeera kwabwe. ²¹ Afuka okunyoomebwa ku balangira, era asumulula olukoba olw'a b'a maani. ²² Ayolesya eby'o buliba ng'a bitoola mu ndikirirya, era ayerula ekiwolyo eky'o kufa. ²³ Ayalya amawanga, era agazikirirya: Abunisya amawanga mu nsi, era agairyawo. ²⁴ Abakulu b'a bantu ab'o mu nsi abatoolaku omwoyo, era abawabirya mu idungu awabula ngira. ²⁵ Bawamantira mu ndikirirya awabula musana, Era abatagasa ng'o mutamiivu.