¹ Mu biseera ebyo, bw'atumula Mukama, balitoola amagumba ga bakabaka ba Yuda n'amagumba g'abakungu be n'amagumba ga bakabona n'amagumba ga banabbi n'amagumba g'abo abali mu Yerusaalemi mu malaalo gaabwe. ² Kale baligaaliira mu maiso g'eisana n'omwezi n'eigye lyonalyona ery'omu igulu, bye batakanga, era bye baweerezanga, era bye basengereryanga mu kutambula kwabwe, era bye basagiranga, era bye baasinzanga: tegalikuŋaanyizibwa so tegaliziikibwa; galibba busa ku maiso g'ettaka. ³ Era okufa kulitskibwa okusinga obulamu eri bonabona abafiikirewo abasigairewo ku kika kino ekibbiibi, abasigairewo mu bifo byonabona gye nababbingiire, bw'atumula Mukama w'eigye. ⁴ Era ate obakobanga nti Atyo bw'atumula Mukama nti Abantu baligwa ne batayimuka ate? omuntu alikyama n'ataira? ⁵ Kale abantu bano ab'omu Yerusaalemi kiki ekibairirye enyuma nga baseeseetuka obutayosa? banywezerye obubbeyi, bagaine okwira. ⁶ Nawulisisya ne mpulira, naye tebatumwire bye nsonga: wabula muntu eyeenenya obubiibi bwe ng'atumula nti Nkolere ki? buli muntu akyukira mu lugendo lwe ng'embalaasi efubutukira mu lutalo. ⁷ Niiwo awo, kasida ow'omu igulu amaite ebiseera bye ebyalagiirwe; no kaamukuukulu n'emiini no lugaaga girabirira ekiseera mwe giizira; naye abantu bange tebamaite kiragiro kya Mukama. ⁸ Mutumula mutya nti Tulina amagezi, n'amateeka ga Mukama gali naife? Naye, bona, ekalaamu ey'obubbeyi ey'abawandiiki ewandiikire ebitali bya mazima. ⁹ Abagezigezi bakwatiibwe ensoni, bakeŋentereirwe, bawambiibwe: bona, bagaine ekigambo kya Mukama; era magezi ki agali mu ibo? ¹⁰ Kyendiva mbawa abandi abakali baabwe n'enimiro gyabwe eri abo abaligirya: kubanga buli muntu, omutomuto era n'omukulu, w'omuwudu, nabbi era no kabona, buli muntu alyazaamaanya. ¹¹ Era bawonyerye ekiwundu eky'omuwala w'abantu bange kungulu kwonka nga batumula nti Mirembe, mirembe; so nga emirembe wabula. ¹² Baakwatibwa ensoni bwe baamala okukola eky'omuzizo? Bbe, tebaakwatibwa nsoni n'akatono, so tebasonola kumyusya amaiso: kyebaliva bagwa mu abo abagwa: mu biseera mwe baliizirwa mwe balimegerwa, bw'atumula Mukama. ¹³ Ndibamalirawo dala, bw'atumula Mukama: ku muzabbibu tekulibba izabbibu, waire eitiini ku mutiini, n'amakoola galiwotoka; n'ebintu bye nabawaire biribavaaku. ¹⁴ Kiki ekitutyamisya obutyamisi? mukuŋaane, tuyingire mu bibuga ebiriku enkomera, tusirikire eyo: kubanga Mukama Katonda waisu atusirikirye, era atunywisirye amaizi ag'omususa, kubanga twayonoonere Mukama. Twasuubiire emirembe, naye ne watabba bisa ebyaizire; twasuubiire ebiseera eby'okuwonyezebwamu, era, bona, okukeŋentererwa! ¹⁵ Twasuubiire emirembe, naye ne watabba bisa ebyaizire; twasuubiire ebiseera eby'okuwonyezebwamu, era, bona, okukeŋentererwa! ¹⁶ Okufugula kw'embalaasi gye kuwuliirwe ng'oyema e Daani: olw'eidoboozi ery'okukunga kw'ensolo gye egy'amaani ensi yonayona etengera; kubanga giizire, era giriire ensi ne byonabona ebigirimu; ekibuga n'abo abakityamamu. ¹⁷ Kubanga, bona, ndisindika emisota, enfulugundu, egitalogeka; era giribaluma, bw'atumula Mukama. ¹⁸ Woowe, singa nsobola okwesanyusa mu buyinike! omwoyo gwange guweiremu amaani munda yange. ¹⁹ Bona, eidoboozi ery'okutumulira waigulu okw'omuwala w'abantu bange eriva mu nsi eri ewala einu nti Mukama tali mu Sayuuni? Kabaka waakyo tali mu ikyo? Lwaki ibo okunsunguwalyanga n'ebifaananyi byabwe ebyole n'ebirerya ebiyaaka? ²⁰ Ebikungulwa biweire, ekyeya kibitire, naife tetulokokere. ²¹ Kubanga omuwala w'abantu bange asumitiibwe ekiwundu, nzeena nfumitiibwe ekiwundu: ngirugaire; okusamaalirira kunkwaite. ²² Wabula bulezi mu Gireyaadi? Ebula musawo eyo? kale kiki ekirobeire omuwala w'abantu bange okuwona?