¹ Ekigambo ekyaizire Yeremiya ekyaviire eri Mukama nga kitumula nti ² Yemerera mu mulyango gw'enyumba ya Mukama, olangirire eyo ekigambo kino, otumule nti Muwulire ekigambo kya Mukama, imwe mwenamwena aba Yuda, abayingira mu miryango gino okusinza Mukama. ³ Ati bw'atumula Mukama w'eigye, Katonda wa Isiraeri, nti Mulongoosye amangira ganyu n’ebikolwa byanyu, nzeena ndibatyamisya mu kifo kino. ⁴ Temwesiganga bigambo byo bubbeyi nti Bino niiyo yeekaalu ya Mukama, niiyo yeekaalu ya Mukama, niiy yeekaalu ya Mukama. ⁵ Kubanga bwe mwalongooseryanga dala amangira ganyu n'ebikolwa byanyu; bwe mwatuukiririryanga dala emisango eri omuntu no mwinaye; ⁶ bwe mutaajoogenga mugeni n'abula itaaye no namwandu, so temwayiwenga musaayi ogubulaku musango mu kifo kino, so temwatambulenga okusengereryanga bakatonda abandi, okwerumyanga imwe beene: ⁷ kale ndibatyamisya mu kifo kino mu nsi gye nawaire bazeiza banyu obw'eira bwonabwona okutuusya emirembe gyonagyona. ⁸ Bona, mwesiga ebigambo eby'obubbeyi ebitasobola kugasa. ⁹ Mwaibbanga, ne mwita, ne mwenda, ne mulayira eby'obubbeyi, ne mwoterya obubaani eri Baali, ne mutambula okusengererya bakatonda abandi be mutamanyanga, ¹⁰ ne mwiza ne mwemerera mu maiso gange mu nyumba eno erituumibwa eriina lyange, ne mutumula nti Tuwonyezeibwe; kaisi mukole emizizo egyo gyonagyona? ¹¹ Enyumba eno etuumibwaku eriina lyange efuukire empuku y'abanyagi mu maiso ganyu? Bona, nze, nze mwene, nkiboine, bw'atumula Mukama. ¹² Naye mwabe mu kifo kyange ekyabaire mu Siiro, gye natyamisirye eriina lyange oluberyeberye, mubone kye nakikolere olw'obubbiibi bw'abantu bange Isiraeri. ¹³ Era atyanu kubanga mukolere ebikolwa ebyo byonabona, bw'atumula Mukama; ne ntumula naimwe, nga ngolokoka mu makeeri ne ntumula, naye ne mutawulira; ne mbeeta naye ne mutavugira: ¹⁴ kyendiva nkola enyumba eyetebwa eriina lyange; gye mwesiga, n'ekifo kye nawaire imwe na bazeiza banyu, nga bwe nakolere Siiro. ¹⁵ Era ndibasuula okuva mu maiso gange, nga bwe naswire bagande banyu bonabona, eizaire lyonalyona erya Efulayimu. ¹⁶ Kale tosabiranga bantu bano so tobayimusiryanga kukunga waire okusaba, so toneegayiriranga okuwozererya, kubanga tinakuwulire. ¹⁷ Toboine bye bakolere mu bibuga bya Yuda no mu nguudo egy'e Yerusaalemi? ¹⁸ Abaana batyaba enku, bakitawabwe ne bakuma omusyo, abakali ne badyokola obwita okufumbira kabaka w'eigulu omukali emigaati, n'okufukira bakatonda abandi ebiweebwayo eby'okunywa kaisi bansunguwalye. ¹⁹ Basunguwairye nze? bw'atumula Mukama tebeesunguwairye ibo beene, okuswaza amaiso gaabwe ibo? ²⁰ Mukama Katonda kyaviire atumula ati nti Bona, obusungu bwange n'ekiruyi kyange birifukibwa ku kifo kino, ku bantu no ku nsolo no ku misaale egy'omu itale no ku bibala eby'eitakali; era bulibuubuuka so te bulizikizibwa. ²¹ Ati bw'atimula Mukama w'eigye, Katonda wa Isiraeri nti Mwongere bye muwaayo ebyokyebwa ku sadaaka gyanyu, mulye enyama. ²² Kubanga tinatumwire na bazeiza banyu so tinabalagiire ku lunaku kwe nabatoleire mu nsi y'e Misiri eby'ebiweebwayo ebyokyebwa waire sadaaka: ²³ naye ekigambo kino kye nabaaagiire nti Muwulirenga eidoboozi lyange, nzeena naabbanga Katonda wanyu, nanyu mwaabbanga bantu bange: era mutambulirenga mu ngira gye mbalagira, kaisi mubbe kusa. ²⁴ Naye ne batawulira so tebaategere kitu kyabwe, naye ne batambulira mu kuteesya kwabwe ibo no mu bukakanyali bw'omwoyo gwabwe omubbiibi, ne baira enyuma so tebeeyongeire mu maiso. ²⁵ Okuva ku lunaku bazeiza baabwe kwe baaviiriire mu nsi ey'e Misiri ne watyanu, nabatumiire abaidu bange bonabona banabbi, buli lunaku nga ngolokoka mu makeeri ne mbatuma: ²⁶ era naye ne batampulira so tebaategere kitu kyabwe, naye ne bakakanyalya eikoti lyabwe: baakolere kubbiibi okusinga bazeiza babwe. ²⁷ Era obakobanga ebigambo bino byonabona; naye tebaakuwulirenga; era obakoowoolanga, naye tebaakuvugirenga. ²⁸ Era obakobanga nti Lino niilyo eigwanga eritawuliire eidoboozi lya Mukama Katonda waabwe, so tebaikirirya kwegeresebwa: amazima gafiire, gazikiriire okuva mu munwa gwabwe. ²⁹ Sala enziiri gyo iwe Yerusaalemi, ogisuule wala, otandike okukungubagira ku nsozi egy'owanza; kubanga Mukama aswire abantu ab'omu mirembe egy'obusungu bwe, abalekereyo. ³⁰ Kubanga abaana ba Yuda bakolere ebiri mu maiso gange ebibbiibi, bw'atumula Mukama: bateekere emizizo gyabwe mu nyumba eyetebwa eriina lyange, okugyonoona. ³¹ Era bazimbire ebifo ebigulumivu eby'e Tofesi ekiri mu kiwonvu ekya mutaane wa Kinomu, okwokya bataane baabwe na bawala baabwe mu musyo; kye ntalagiranga so tekyayingiire mu mwoyo gwange. ³² Kale, bona, enaku giiza, bw'atumula Mukama, lwe kitalyetebwa ate nti Tofesi waire nti Kiwonvu kyo mutaane Kinomu, wabula nti Kiwonvu kya itambiro: kubanga baliziika mu Tofesi okutuusya lwe watalibbaawo ibbanga lyo kuziikamu. ³³ N'emirambo gy'abantu bano giribba mere ye nyonyi egy'omu ibbanga n'ensolo egy'omu nsi; so tewalibba aligisagula. ³⁴ Awo kaisi ne nkomya mu bibuga bya Yuda no mu nguudo egy'e Yerusaalemi eidoboozi ery'ebinyumu n'eidoboozi ery'eisanyu, eidoboozi ly'akwa omugole n'eidoboozi ly'omugole: kubanga ensi erifuuka nsiko.