¹ Zedekiya yabbaire yakamala emyaka abiri na gumu bwe yaliire obwakabaka; n'afugira emyaka ikumi na gumu mu Yerusaalemi: n'o maye eriina lye yabbaire Kamutali muwala wa Yeremiya ow'e Libuna. ² N'akolanga ebyo ebyabbaire mu maiso ga Mukama ebibbiibi, nga byonabyona bwe byabbaire Yekoyakimu bye yabbaire akolere. ³ Kubanga kyatuukiriire olw'obusungu bwa Mukama mu Yerusaalemi ne Yuda okutuusya lwe yamalire okubasuula okuva mu maiso ge: era Zedekiya n'ajeemera kabaka w'e Babulooni. ⁴ Awo olwatuukire mu mwaka ogw'omwenda ogw'okufuga kwe mu mwezi ogw'eikumi ku lunaku olw'omwezi olw'eikumi Nebukaduneeza kabaka w'e Babulooni n'aiza, iye n'eigye lye lyonalyona, okutabaala Yerusaalemi n'asiisira okukyolekera; ne bakizimbaku ebigo enjuyi gyonagyona. ⁵ Awo ekibuga ne kizingizibwa okutuuka ku mwaka ogw'eikumi n'ogumu ogwa kabaka Zedekiya. ⁶ Mu mwezi ogw'okuna ku lunaku olw'omwenda olw'omwezi enjala n'ebba nyingi mu kibuga, ne watabbaawo mere eri abantu ab'omu nsi. ⁷ Awo ne bawagula ekituli mu kibuga, abasaiza bonabona abalwani ne bairuka ne bafuluma mu kibuga obwire mu ngira ey'omulyango wakati mu babugwe ababiri, ogwaliraine olusuku lwa kabaka; (era Abakaludaaya babbaire bazingizirye ekibuga) enjuyi gyonagyona ne babiita mu ngira eya Alaba. ⁸ Naye eigye ery'Abakaludaaya ne basengererya kabaka Zedekiya ne bamubitirya mu nsenyu egy'e Yeriko; eigye lyonalyona ne lisaansaana okumuvaaku. ⁹ Awo ne bawamba kabaka, ne bamwambukya eri kabaka w'e Babulooni e Libula mu nsi ey'e Kamasi; n'amusalira omusango. ¹⁰ Awo kabaka w'e Babulooni n'aita bataane ba Zedekiya iye ng'abona: era n'aitira n'abakungu bonabona aba Yuda e Libula. ¹¹ Zedekiya n'amutoolamu amaiso; kabaka w'e Babulooni n'amusiba mu masamba n'amutwala e Babulooni, n'amuteeka mu ikomera okutuusya ku lunaku kwe yafiire. ¹² Awo mu mwezi ogw'okutaanu ku lunaku olw’eikumi olw'omwezi, niigwo mwaka ogw'eikumi n'omwenda ogwa kabaka Nebukadduneeza kabaka w'e Babulooni, Nebuzaladaani mukulu w'abambowa, eyayemereranga mu maiso ga kabaka w’e Babulooni, n'aiza mu Yerusaalemi: ¹³ n'ayokya enyumba ya Mukama n'e nyumba ya kabaka; n'enyumba gyonagyona egy'omu Yeusaalemi, buli nyumba enene n'agyokya omusyo. ¹⁴ N'eigye lyonalyona ery'Abakaludaaya ababbaire wamu n'omukulu w'abambowa ne bamenya bugwe yenayena ow'e Yerusaalemi enjuyi gyonagyona. ¹⁵ Awo Nebuzaladaani omukulu w'abambowa nga basibe ku abo abasinga obwavu ku bantu n'ekitundu ekifiikirewo ku bantu ekyabbaire kisigaire mu kibuga n'abo ababbaire basengukire, abasengere kabaka w’e Babulooni, n'ekitundu ekyabbaire kisigairewo eky'abakopi. ¹⁶ Naye Nebuzaladaani omukulu w'abambowa n'aleka ku abo abasinga obwavu mu nsi okulongoosyanga emizabbibu n'okulimanga. ¹⁷ N'empango egy'ebikomo egyabbaire mu nyumba ya Mukama n'entebe n'enyanza ey'ekikomo ebyabbaire mu nyumba ya Mukama Abakaludaaya ne babimenyaamenya, ne batwala e Babulooni ebikomo byabyo byonabyona. ¹⁸ Era n'entamu n'ebisena n'ebisalaku ebisiriirya n'ebibya n'ebijiiko n'ebintu byonabyona eby'ebikomo bye baaweereryanga nabyo ne babitwala. ¹⁹ N'ebikompe n'emumbiro n'ebibya n'entamu n'ebikondo n'ebijiiko n'obibya; ebyabbaire ebye zaabu, mu zaabu, n'ebyo ebyabbaire ebye feeza, mu feeza, omukulu w'abambowa bwe yabitwaire atyo. ²⁰ Empango gyombiri, enyanza eimu, n'ente enume egy'ebikomo eikumi n'eibbiri egyabbaire wansi w'entebe, kabaka Sulemaani bye yakoleire enyumba ya Mukama: ebikomo eby'ebintu ebyo byonabyona tebyapimikire. ²¹ N'empango, obuwanvu bw'empango eimu emikono ikumi na munaana; n'omuguwa ogw'emikono ikumi n'eibiri gwagyetoolooire; n'obugazi bwayo bwabbaire engalo ina: yabbairemu omuwulukwa. ²² Era yabbaireku omutwe ogw'ekikomo; n'omutwe gumu obuwanvu bwagwo emikono itaanu, omutwe nga guliku ebitimba n'amakomamawanga enjuyi gyonagyona, byonabyona bye bikomo: n'empango ey'okubiri yoona yabbaireku ebifaanana ebyo n'amakomamawanga. ²³ Era ku mpete kwabbaireku amakomamawanga kyenda mu mukaaga; amakomamawanga gonagona gabbaire kikumi ku bitimba enjuyi gyonagyona. ²⁴ Awo omukulu w'abambowa n'atwala Seraaya kabona asinga obukulu ne Sefaniya kabona ow'okubiri n'abaigali abasatu: ²⁵ n'atoola mu kibuga omwami eyatwalanga abasaiza abalwani; n'abasaiza musanvu ku abo ababonanga amaiso ga kabaka, ababobekere mu kibuga; n'omuwandiiki ow'omukulu w'eigye eyayolesyanga abantu ab'omu nsi; n'abasaiza nkaaga ab'oku bantu ab'omu nsi ababonekere mu kibuga wakati. ²⁶ Awo Nebuzaladaani omukulu w'abambowa n'abatwala n'abaleeta eri kabaka w'e Babulooni e Libula. ²⁷ Kabaka w'e Babulooni n'abasumita n'abaitira e Libula mu nsi ey'e Kamasi. Awo Yuda n'atwalibwa nga musibe okuva mu nsi ye. ²⁸ Bano niibo bantu Nebukaduneeza be yatwaire nga basibe: mu mwaka ogw'omusanvu Abayudaaya enkumi isatu mu abiri mu basatu: ²⁹ mu mwaka gwa Nebukaduneeza ogw'eikumi n'omunaana n'atwala nga basibe okubatoola e Yerusaalemi abantu lunaana mu asatu mu babiri: ³⁰ mu mwaka gwa Nebukadduneeza ogw'abiri n'eisatu Nebuzaladaani omukulu w'abambowa n'atwala nga basibe ku Bayudaaya abantu lusanvu mu ana mu bataano: abantu bonabona babbaire enkumi ina mu lukaaga. ³¹ Awo olwatuukire mu mwaka ogw'asatu mu musanvu ogw'okusibibwa kwa Yekoyakini kabaka we Yuda, mu mwezi ogw'eikumi n'eibiri ku lunaku olw'abiri ne itaanu Evirumerodaaki kabaka w'e Babulooni mu mwaka ogw'oluberyeberye ogw'okufuga kwe n'ayimusya omutwe gwa Yekoyakini kabaka wa Yuda, n'amutoola mu ikomera; ³² n'atumula naye eby'ekisa, n'agulumirya entebe ye okusinga entebe gya bakabaka ababbaire awamu naye mu Babulooni. ³³ N'awaanyisya ebivaalo bye eby'omu ikomera, n'aliiranga emere buliijo mu maiso ge enaku gyonagyona egy'obulamu bwe. ³⁴ Era okumuliisyanga kabaka w'e Babulooni n'amusalira ebyenkalakalira, omugabo ogw'oku buli lunaku okutuusya ku lunaku kwe yafiire, enaku gyonagyona egy'obulamu bwe. ukama.