¹ Ati bw'atumula Mukama nti bona, ndireeta ku Babulooni n'o ku abo abali mu Lebukamaayi empunga egizikirirya. ² Era nditumira Babulooni banaigwanga balikiwuja; n'ensi yaakyo baligimalamu byonabyona: kubanga balikirumbira enjuyi gyonagyona ku lunaku lw'okuboneramu enaku. ³ Omulasi aleke okunaanuula omutego gwe, so aleke okweyimusya ng'avaire ekizibawo kye eky'ebyoma; so temusonyiwa baisuka baamu; muzikiririrye dala eigye lyamu lyonalyona. ⁴ Era baligwira mu nsi ey'Abakaludaaya nga baitiibwe, era nga basumitiibwe mu nguudo gyakyo. ⁵ Kubanga Isiraeri talekeibweyo Katonda we, Mukama w'eigye, newaire Yuda; ensi yaabwe ng'eizwire omusango gwe bakolere eri omutukuvu wa Isiraeri. ⁶ Mwiruke muve mu Babulooni wakati, muwonye buli muntu obulamu bwe; temuzikirizibwa mu butali butuukirivu bwakyo: kubanga niibyo biseera Mukama mw'awalanira eigwanga; likisasula empeera. ⁷ Babulooni kyabanga kikompe kye zaabu mu mukono gwa Mukama, ekyatamiirye ensi gyonagyona: amawanga ganywire ku mwenge gwakyo; amawanga kyegaviire galaluka. ⁸ Babulooni kigwiire mangu ago, era kizikiriire: mukiwowowoganire; mwirire obulezi olw'obulumi bwakyo, oba nga koizi kyasoboka okuwonyezebwa. ⁹ Twandiwonyerye Babulooni, naye tikiwonere: mukireke, twire buli muntu mu nsi y'ewaabwe iye; kubanga omusango gwakyo gutuukire mu igulu, era gugulumiziibwe okutuuka n'o mu ibbanga. ¹⁰ Mukama ayoleserye obutuukirivu bwaisu: mwize tubuulire mu Sayuuni omulimu gwa Mukama Katonda waisu. ¹¹ Muzigule obusaale, munywezye engabo: Mukama akubbiriirye omwoyo gwa bakabaka b'Abameedi; kubanga okuteesya kwe kuli eri Babulooni okukizikirirya: kubanga niilyo eigwanga Mukama ly'awalana, ly'awalana olwa yeekaalu ye. ¹² Musimbe ebbendera okwolekera bugwe w'e Babulooni, munyweze abakuumi, muteekeewo abakuuma, mutegeke abateegi: kubanga Mukama ateeserye n'okukola akolere ebyo bye yatumwire ku abo abali mu Babulooni. ¹³ Ai iwe atyama ku maizi amangi, alina eby'obugaiga ebingi einu dala, enkomerero yo etuukire, ekigera ky'omuwudu gwo. ¹⁴ Mukama w'eigye yeerayiriire yenka ng'atumula nti Mazima ndikwizulya abasaiza nga bulusejera; era balikukubba neidoboozi lyobuwanguzi ku iwe. ¹⁵ Yakolere ensi n'obuyinza bwe, yanywezerye ebintu byonabyona n'amagezi ge, era yabambire eigulu n'okutegeera kwe: ¹⁶ bw'aleeta eidoboozi lye, wabbaawo oluyoogaanu olw'amaizi mu igulu, era aniinisya emyoka okuva ku nkomerero gy'ensi; akolera amaizi enjota, era atoola empunga mu mawanika ge. ¹⁷ Buli muntu afuukire ng'ensolo, so babula kumanya; buli muweesi we zaabu ekifaananyi kye ekyole kimukwatisya ensoni: kubanga ekifaananyi kye ekisaanuukye bubbeeyi, so mu ebyo mubula mwoka, ¹⁸ Nfeera, mulimu gw'o bubbeeyi: mu biseera mwe biriizirirwa birizikirira. ¹⁹ Omugabo gwa Yakobo tegufaanana ebyo: kubanga oyo niiye mubbumbi we byonabyona; era Isiraeri niikyo kika eky'obusika bwe: Mukama w'eigye niilyo liina lye. ²⁰ Niiwe mpasa yange erwana, era eby'okulwanisya byange: era niiwe gwe ndimenyesyamenyesya amawanga; era niiwe gwe ndizikiririsya obwakabaka; ²¹ era gwe ndimenyesyamenyesya embalaasi n'oyo agyebagaire; ²² era gwe ndimenyesyamenyesya ekigaali n'oyo akitambuliramu; era gwe ndimenyesyamenyesya omusaiza n'omukali; era gwe ndimenyesyamenyesya omukaire n'omwisuka; era gwe ndimenyesyamenyesya omwisuka n'omuwala; ²³ era gwe ndimenyesyamenyesya omusumba n'ekisibo kye; era gwe ndimenyesyamenyesya omulimi n'omugogo gwe ogw'ente; era gwe ndimenyesyamenyesya abafuga n'abasigire. ²⁴ Era ndisasula Babulooni n'abo bonabona abali mu Bukaludaaya obubbiibi bwabwe bwonabwona bwe baakakola mu Sayuuni imwe nga mubona, bw'atumula Mukama: ²⁵ Bona, ndi mulabe wo, ai olusozi oluzikirirya, bw'atumula Mukama, oluzikirirya ensi gyonagyona: era ndikugololeraku omukono gwange, ne nkuyiringisya okuva ku mabbaale, era ndikufuula olusozi olwayire. ²⁶ So tebalikutoolaku ibbaale okubba ensonda, waire eibbaale ery'emisingi; naye wabbanga matongo emirembe gyonagyona, bw'atumula Mukama. ²⁷ Musimbe ebbendera mu nsi, mufuuwe eikondeere mu mawanga, mutegeke amawanga okulwana nakyo, mwete obwakabaka obwa Alalati ne Mini ne Asukenaazi, okukikuŋaaniraku: mukigabire omugabe; muniinisye embalaasi ng'obuwuka obuliku obwoya. ²⁸ Mutegeke amawanga okulwana nakyo, bakabaka b'Abameedi, abaamasaza baamu, n'abasigire bonabona abaamu, n'ensi yonayona gy'atwala. ²⁹ Era ensi etengera, erumwa: kubanga ebyo Mukama bye yamaliriire eri Babulooni binywera, okufuula ensi y'e Babulooni amatongo, nga wabula abbamu. ³⁰ Abasaiza ab'amaani ab'e Babulooni baletereyo okulwana, basigaire mu bifo byabwe eby'amaani; amaani gaabwe gaweirewo; bafuukire ng'abakali: enyumba gyakyo gyokyeibwe; ebisiba byakyo bimenyekere. ³¹ Matalisi omumu aliruka okusisinkana no mwinaye, n'omubaka omumu okusisinkana no mwinaye, okunyonyola kabaka w'e Babulooni ng'ekibuga kye kimenyeibwe enjuyi gyonagyona: ³² era basoonookereirye amawungukiro n'endago bagyokyerye omusyo, n'abasaiza abalwani batiire. ³³ Kubanga ati bw'atumula Mukama w'eigye, Katonda wa Isiraeri, nti omuwala we Babulooni ali sooti iguuliro mu biseera lwe balisambiramu; ekaali esigaireyo ekiseera kidiidiiri ebiseera eby'okukunguliramu birikituukira. ³⁴ Nebukadduneeza kabaka w'e Babulooni andiire, ambetentere, anfiire ekibya ekyereere, amizye ng'ogusota, aizwirye ekida kye eby'okuliira byange ebisa; answire. ³⁵ Ekyeju ekyagiriirwe nze n'omubiri gwange kibbe ku Babulooni, ali mu Sayuuni bw'alitumula; era omusaayi gwange gubbe ku abo abali mu Bakaludaaya, Yerusaalemi bw'alitumula. ³⁶ Mukama kyava atumula ati nti bona, ndiwozya ensonga yo, ne nkuwalanira eigwanga: era ndikalirya enyanza yaakyo, era ndimalawo ensulo yaakyo. ³⁷ Kale Babulooni kirifuuka bifunvu, ekifo eky'ebibbe eky'okubbamu, ekyewuunyo, n'okunionsolebwa, nga wabula akibbamu. ³⁸ Baliwulugumira wamu ng'empologoma entonto; balivuumira wamu ng'abaana b'empologoma. ³⁹ Bwe balibuguumirira, lwe ndifumba embaga yaabwe, era ndibatamiirya, basanyuke, era bagone endoolo egitaliwaawo, so baleke okuzuuka, bw'atumula Mukama. ⁴⁰ Ndibaserengetya ng'abaana b'entama okwitibwa, ng'entama enume wamu n'embuli emandwa. ⁴¹ Sesaki nga kimenyeibwe! n'eitendo ery'ensi gyonagyona nga balisonookererya! Babulooni nga kifuukire amatongo mu mawanga! ⁴² Enyanza eniinire ku Babulooni: olufulube lw'amayengo gaayo lukibiikireku. ⁴³ Ebibuga byakyo bifuukire matongo, ensi enkalu n'eidungu, ensi omubula muntu so wabula mwana wo muntu abitawo. ⁴⁴ Era ndireeta omusango ku Beri mu Babulooni, era nditoola mu munwa gwe ekyo kye yamirire; so n'amawanga nga tigakaali gakulukutira wamu gy'ali ate: niilwo awo, bugwe w'e Babulooni aligwa. ⁴⁵ Imwe abantu bange, muve wakati mu ikyo, mwerokole buli muntu ekiruyi kya Mukama. ⁴⁶ So n'omwoyo gwanyu guleke okuzirika, so temutyanga olw'ekigambo ekiriwulirwa mu nsi; kubanga ekigambo kiriizira mu mwaka gumu, era oluvanyuma mu mwaka ogundi ekigambo kiriiza n'ekyeju mu nsi, oweisaza ng'alwana n'oweisaza. ⁴⁷ Kale, bona, enaku giiza lwe ndireeta omusango ku bifaananyi ebyole ebye Babulooni, n'ensi yaayo yonayona erikwatibwa ensoni; n'abaayo bonabona abaitiibwe baligwira wakati mu ikyo. ⁴⁸ Kale eigulu n'ensi ne byonabyona ebibirimu biryemba n'eisanyu olwa Babulooni; kubanga abanyagi baliiza gye kiri okuva obukiika obugooda, bw'atumula Mukama. ⁴⁹ Nga Babulooni bwe kyagwisirye aba Isiraeri abaitibwe, batyo e Babulooni ab'ensi yonayona abaitiibwe gye baligwira. ⁵⁰ Imwe abawonere ekitala, mwabe, temwemerera bwemereri; mwijukire Mukama nga mwema wala, era Yerusaalemi kiyingire mu mwoyo gwanyu. ⁵¹ Tukwatiibwe ensoni, kubanga tuwuliire ebivumi; amaiso gaisu gaswaire: kubanga banaigwanga bayingiire mu bifo ebitukuvu eby'omu nyumba ya Mukama. ⁵² Kale, bona, enaku giiza, bw'atumula Mukama, lwe ndireeta omusango ku bifaananyi byakyo ebyole; n'o mu nsi yaakyo yonayona abaliku ebiwundu balisinda. ⁵³ Babulooni waire nga kiniinire okutuusya mu igulu, era waire nga kinywezerye entiiko ey'amaani gaakyo, era naye abanyagi baliiza gye kiri okuva we ndi, bw'atumula Mukama. ⁵⁴ Eidoboozi ery'okukunga eriviire mu Babulooni n'ery'okuzikirira okunene eriviire mu nsi ey'Abakaludaaya! ⁵⁵ kubanga Mukama anyaga Babulooni, era azikirirya oluyoogaanu olunene okuva mu kyo; n'amayengo gaabwe gawuuma ng'amaizi amangi, era baleeta okuyoogaana kw'eidoboozi lyabwe: ⁵⁶ kubanga omunyagi akituukireku, ku Babulooni, n'abasaiza baamu ab'amaani bawambiibwe, emitego gyabwe gimenyekeremenyekere: kubanga Mukama niiye Katonda asasula, talireka kuwa mpeera. ⁵⁷ Era nditaamiirya abakungu baamu n'abagezigezi baamu, abaamasaza baamu n'abasigire baamu n'abasaiza baamu ab'amaani; era baligona endoolo egitaliwaawo so tebalizuuka, bw'atumula Kabaka, eriina lye Mukama w'eigye. ⁵⁸ Ati bw'atumula Mukama w'eigye nti Babugwe abaigali b'e Babulooni balisuulirwa dala, n'emiryango gyakyo emiwanvu giryokyebwa omusyo; n'amawanga galiteganira obutaliimu, n'ebika biriteganira omusyo; era balikoowa. ⁵⁹ Ekigambo Yeremiya nabbi kye yalagiire Seraya mutaane wa Neriya mutaane wa Maseya, bwe yaabire e Babulooni wamu n'o Zedekiya kabaka wa Yuda mu mwaka ogw'okufuga kwe ogw'okuna. Era Seraya yabbaire saabakaaki omukulu. ⁶⁰ Awo Yeremiya n'awandiika mu kitabo obubbiibi bwonabwona obwabbaire bwaba okwiza ku Babulooni, niibyo bigambo ebyo byonabyona ebiwandiikiibwe ku Babulooni. ⁶¹ Awo Yeremiya n'akoba Seraya nti bw'olituuka mu Babulooni, kale tolekanga kusoma, ebigambo bino byonabyona, ⁶² otumule nti Ai Mukama, watumwire eby'ekifo kino okukizikirirya omuntu yenayena aleke okutyama omwo, omuntu waire ensolo, naye kirekeibwewo enaku gyonagyona. ⁶³ Awo olulituuka bw'olimala okusoma ekitabo kino, kaisi okisibaku eibbaale n'okisuula mu Fulaati wakati: ⁶⁴ era olitumula nti Babulooni bwe kiriika kityo, so tekiriibbulukuka ate, olw'obubiibbi bwe ndikireetaku: era balikoowa. Ebigambo bya Yeremiya we bikoma wano.