¹ Eby'abaana ba Amoni. Ati bw'atumula Mukama nti Isiraeri abula baana b'o bwisuka? Abula musika? kale Malukamu kiki ekimuliisisirye Gaadi, n'abantu be batyama mu bibuga byayo? ² Kale, bona, enaku giiza, bw'atumula Mukama, lwe ndiwulisisya embuutu nga bagirayirya bona eky'abaana ba Amoni; era kirifuuka kifunvu ekyalekebwawo, na bawala baamu balyokyebwa omusyo: kale Isirareri lw'alirya abo abaamulyanga, bw'atumula Mukama. ³ Wowogana, igwe Kesubootu, kubanga Ayi kinyagiibwe; mukunge, imwe abawala ba Labba, mwesibe ebinyakinyaki, mukungubage, mwiruke nga mubuna emiwabo mu bisaakaati; kubanga Malukamu alyaba mu busibe, bakabona be n'abakungu be wamu. ⁴ Lwaki iwe okwenyumiririrya ebiwonvu, ekiwonvu kyo ekikulukuta, ai omuwala aira enyuma? eyeesiganga eby'obugaiga bwo ng'atumula nti yani aliiza gye ndi? ⁵ Bona, ndikuleetaku entiisya, bw'atumula Mukama, Mukama w'eigye okuva eri abo bonabona abakwetooloire; era mulibbingibwamu buli muntu okuviiramu dala, so tewalibba wo kuluŋamya oyo awaba. ⁶ Naye oluvanyuma ndiiryawo obusibe bw'abaana ba Amoni, bw'atumula Mukama. ⁷ Ebya Edomu. Ati bw'atumula Mukama w'eigye nti amagezi tigakaali gali mu Temani? okuteesya kugotere abakabakaba? amagezi gaabwe gaabire? ⁸ Mwiruke mukyuke okwira enyuma, mwegise wansi, imwe abatyama mu Dedani; kubanga ndimuleetaku obwinike bwa Esawu, ebiseera lwe ndimwizira. ⁹ Abanogi b'eizabbibu singa baizire gy'oli, tibandiretere izabbibu egimu egy'okwerebwa? ababbiibi singa baizire bwire, tebandizikiriirye okutuusya lwe bandiikutire? ¹⁰ Naye nze mwambwiire Esawu, mbikwiire ku bifo bye eby'ekyama, so talisobola kwegisa: eizaire lyo linyagiibwe na bagande be na baliraanwa be, so iye abulawo. ¹¹ Leka abaana bo ababula itawabwe, nze ndibakuuma okubba abalamu; na banamwandu bo baneesige nze. ¹² Kubanga ati bw'atumula Mukama nti bona, abo ababbaire batagwaniire kunywa ku kikompe tebalireka kunywa; weena iwe oyo aliwonera dala okubonerezebwa toliwona obutabonerezebwa, naye tolireka kunywa. ¹³ Kubanga neerayiriire nzenka, bw'atumula Mukama, nga Bozula kirifuuka kyewuunyo n'ekivumi n'amatongo n'ekiraamo; n'ebibuga byayo byonabyona byabbanga matongo agataliwaawo. ¹⁴ Mpuliire ebigambo ebiviire eri Mukama, n'omubaka atumiibwe mu mawanga, ng'atumula nti Mwekuŋaanye mukitabaale mugolokoke mulwane. ¹⁵ Kubanga, bona, nkufiire mutono mu mawanga, era anyoomebwa mu bantu. ¹⁶ Eby'okutiisya kwo, amalala ag'omu mumwoyo gwo gakubbeyere, ai iwe atyama mu njatika egy'omu lwazi, eyeekwata entiiko y'olusozi: ne bw'ewazimbire ekisu kyo awagulumivu, okwekankana n'eikookooma, era ndikwikaikanya nga nkutoolayo, bw'atumula Mukama. ¹⁷ Kale Edomu alifuuka kyewuunyo: buli eyabitangawo yewuunyanga era yanionsolanga ebibonyobonyo byonabyona ebyayo. ¹⁸ Nga Sodomu ne Gomola bwe byasuuliibwe n'ebibuga ebyalirainewo, bw'atumula Mukama, wabula muntu alibba eyo, so tewalibba mwana w'o muntu alityama omwo. ¹⁹ bona, alyambuka ng'empologoma eva mu malala ga Yoludaani okulumba ekifo eky'okubbamu eky'amaani; naye ndikimwirukya mangu ago; era buli alirondebwa oyo gwe ndikulya ku ikyo: kubanga yani afaanana nze? era yani eyanteekerawo ekiseera? era omusumba aliwaina eyayemerera mu maiso gange? ²⁰ Kale muwulire okuteesya kwa Mukama kw'ateeserye eri Edomu; n'ebyo by'amaliriire eri abo abatyama mu Temani: mazima balibakulula, era n'abaana abatobato ab'omu kisibo mazima alizikya ekifo kye babbamu wamu nabo. ²¹ Ensi etengera olw'eidoboozi ery'okugwa kwabwe; waliwo okuleekaana, eidoboozi lyakwo ne liwulirwa mu Nyanza Emyofu. ²² Bona, aliniina n'abuuka ng'eikookoma n'ayanjululya ebiwawa bye okulwanisya Bozula: n'omwoyo gw'abasaiza ab'amaani aba Edomu ku lunaku ludi gulibba ng'o mwoyo gw'omukali alumwa okuzaala. ²³ Eby'e Damasiko. Kamasi akwatiibwe ensoni ne Alupadi; kubanga bawuliire ebigambo ebibbiibi, basaanuukire: ku nyanza kuliku obuyinike; tebasobola kuteeka. ²⁴ Damasiko ayongobeire, akyuka okwiruka, n'okutengera kumukwaite: obubalagali n'obwinike bimunywezerye ng'omukali alumwa okuzaala. ²⁵ Ekibuga eky'okutendereza kiki ekirobeire okukirekayo, ekibuga eky'eisanyu lyange? ²⁶ Abaisuka baakyo kyebaliva bagwira mu nguudo gyakyo, n'abasaiza bonabona abalwani balisirikibwa ku lunaku olwo, bw'atumula Mukama w'eigye. ²⁷ Era ndikuma omusyo mu bugwe w’e Damasiko, era gulyokya amayumba ga Benukadaadi. ²⁸ Ebya Kedali n'eby'obwakabaka bwa Kazoli Nebukaduneeza kabaka w'e Babulooni bwe yakubbire. Ati bw'atumula Mukama nti Mugolokoke mwambuke e Kedali, munyage abaana ab'ebuvaisana. ²⁹ Eweema gyabwe n'embuli gyabwe baligitwala; balyetwalira ibo beene amagigi gaabwe n'ebintu byabwe byonabyona n'eŋamira gyabwe: era balibalangira nti entiisya eri ku njuyi gyonagyona. ³⁰ Mwiruke mutambuletambule wala mwegise wansi, imwe ababba e Kazoli, bw'atumula Mukama; kubanga Nebukaduneeza kabaka w'e Babulooni abateesereirye ebigambo, era abasaliire amagezi. ³¹ Mugolokoke mwambuke eri egwanga eryegolola, eribbeerera awo nga tirifaayo, bw'atumula Mukama; ababula njigi waire ebisiba, abatyama bonka. ³² N'eŋamira gyabwe giribba munyago, n'olufulube lw'ensolo gyabwe luliba lw'o kugereka: era ndisaansaanirye awali empewo gyonagyona abo abamwa oluge; era ndireeta obwinike bwabwe okubafuluma enjuyi gyonagyona, bw'atumula Mukama. ³³ Era Kazoli kyabbanga kifo ky'e bibbe eky'okubbangamu, matongo ag'olubeerera: tiwaabbenga muntu alibba eyo, so tuwaabbenga mwana wo muntu alityama omwo. ³⁴ Ekigambo kya Mukama ekyaiziire Yeremiya nabbi ekya Eramu, Zedekiya kabaka we Yuda nga yakaiza alye obwakabaka, nga kitumula nti ³⁵ Ati bw'atumula Mukama w'eigye nti bona, ndimenya omutego gwa Eramu, niibwo bwesige obw'amaani gaabwe. ³⁶ Era ndireeta ku Eramu empewo eina okuva mu njuyi gyonagyona egy'eigulu, era ndibasaansaanirya eri empewo egyo gyonagyona; so tiwaliba igwanga ababbingiibwe aba Eramu gye batalituuka. ³⁷ Era nditiisya Eramu mu maiso g'abalabe baabwe n'o mu maiso g'abo abasagira obulamu bwabwe: era ndibaleetaku obubbiibi, ekiruyi kyange, bw'atumula Mukama; era ndisindika ekitala okubasengererya okutuusya lwe ndibamalawo: ³⁸ era nditeeka entebe yange mu Eramu, ni malamu omwo kabaka n'abakungu, bw'atumula Mukama. ³⁹ Naye olulituuka mu naku egy'oluvanyuma ndiiryawo ate obusibe bwa Edomu, bw'atumula Mukama.