¹ Ebya Mowaabu. Ati bw'atumula Mukama w'eigye, Katonda wa Isiraeri, nti gisangire Nebo! kubanga baikiririsirye; Kiriyasayimu kikwaitiibwe ensoni, kimenyeibwe: Misugabu kikwaitiibwe ensoni, kisuuliibwe. ² Eitendo lya Mowaabu tirikaali liriwo; bakigisisirye obubbiibi mu Kesubooni, nti Mwize tukimalewo obutabba eigwanga. Era naiwe, ti Madumeni, olisirikibwa; ekitala kirikucoca. ³ Eidoboozi ery'okuleekaana eriva e Kolonayimu, okunyaga n'okuzikirirya okunene! ⁴ Mowaabu azikiriire; abaana baamu abatobato bawulisirye okukukunga. ⁵ Kubanga balyambukira awaniinirwa e Lulusi nga bakunga amaliga agatalekula; awaserengeterwa e Kolonayimu bawuliire obuyinike obw’okukunga olw’okuzikirira. ⁶ Mwiruke muwonye obulamu bwanyu, mufaanane omwoloola oguli mu idungu. ⁷ Kubanga olw'okwesiga emirimu gyo n'eby'obugaiga bwo, era weena olikwatibwa: no Kemosi alivaayo alyaba mu busibe, bakabona be n'abakungu be wamu. ⁸ N'omunyagi alituuka ku buli kibuga, so tewalibba kibuga ekiriwona; era n'ekiwonvu kirigota, n'olusenyu lulizikirizibwa; nga Mukama bwe yatumwire. ⁹ Mumuwe Mowaabu ebiwawa kaisi abuuke yeyabire: n'ebibuga bye birifuuka amatongo nga wabula wo kutyamamu. ¹⁰ Alaamiibwe oyo akola omulimu gwa Mukama ng'atenguwa, era alaamiibwe oyo aziyizya ekitala kye mu musaayi. ¹¹ Mowaabu yeikirye okuva mu butobuto bwe, era teyeesengezeirye eibbonda lye, taitululirwanga mu bideku so tayabanga mu busibe: ensa ye kyeva ebba mu iye, n'akawoowo ke tekaijulukukanga. ¹² Kale, bona, enaku giiza, bw'atumula Mukama, lwe ndimutumira abo abaitulula, kale balimwitulula; era balimalamu ebintu bye, ne bamenyaamenya ensuwa gyabwe. ¹³ Kale Mowaabu alikwatirwa Kemosi ensonyi, ng'enyumba ya Isiraeri bwe baakwatirwa ensoni Beseri, obwesige bwabwe. ¹⁴ Mutumula mutya nti tuli basaiza ba maani era basaiza bazira okutwala? ¹⁵ Mowaabu bamuzikirye, era batabaire ebibuga byayo, n'abaisuka baayo abalonde baserengetere okwitibwa, bw'atumula Kabaka, eriina lya Mukama w'eigye. ¹⁶ Obwinike bwa Mowaabu buli kumpi okutuuka, n'enaku gye gyanguwa mangu. ¹⁷ imwe mwenamwena abamwetooloire mumukungubagire, mwenamwena abamani eriina lye; mutumule nti omwigo ogw'amaani nga gumenyekere, oluga olusa! ¹⁸ Ai iwe omuwala, atyama mu Diboni, serengeta ove ku kitiibwa kyo, otyame ng'olumiibwe enyonta; kubanga omunyagi we Mowaabu akutabaire, azikiriirye ebigo byo. ¹⁹ Ai iwe atyama mu Aloweri, yemerera ku mbali kw'engira okeete: buulya Omusaiza airuka, n'omukali awona; otumule nti Ebifaayo? ²⁰ Mowaabu akwatibwa ensoni; kubanga kimenyekeremenyekere: wowogana okunge; mukikobere mu Alunoni nga Mowaabu bakikirye. ²¹ N'omusango gutuukire ku nsi ey'ensenyu; ku Koloni n'o ku Yaza n'o ku Mefaasi; ²² n'o ku Diboni n'o ku Nebo n'o ku Besudibulasayimu; ²³ n'o ku Kiriyasayimu n'o ku Besugamuli n'o Besumyoni; ²⁴ n'o ku Keriyoosi n'o ku Bozula n'o ku bibuga byonabyona eby'omu nsi ye Mowaabu ebiri ewala n'ebiri okumpi. ²⁵ Eiziga lya Mowaabu lisaliibweku, n'omukono gwe gumenyekere, bw'atumula Mukama. ²⁶ Mumutamiirye; kubanga yeegulumizyanga eri Mukama: ne Mowaabu alyekulukuunya mu bisesemye bye, era yena alisekererwa. ²⁷ Kubanga Isiraeri teyabbaire w'o kusekererwa gy'oli? yabonekere mu babbiibi? kubanga buli lw'omutumulaku osiisikya omutwe gwo. ²⁸ Ai imwe abatyama mu Mowaabu, muleke ebibuga mutyame mu mabbaale; mufaanane kaamukuukulu akakola ekisu kye mu mpete gy'omunwa gw'obwina. ²⁹ Tuwuliire eby'amalala ga Mowaabu nga wa malala mangi inu; okwegulumirya kwe n'amalala ge n'ekitigi kye n'eisukuti ery'omumwoyo gwe. ³⁰ Maite obusungu bwe, bw'atumula Mukama, nga ti kintu; okwenyumirirya kwe kubulaku kye kukolere. ³¹ Kyenaviire mpowoganira Mowaabu; niiwo awo, naleekaaniire Mowaabu yenayena: abasaiza ab'e Kirukeresi be balinakuwalira. ³² Nakukungiire iwe amaliga, ai omuzabbibu ogw'e Sibuma, nga nsinga okukunga kwa Yazeri: amatabi go gabitire ku nyanza, gatuukire no ku nyanza ye Yazeri: omunyagi agwire ku bibala byo eby'omu kyeya n'o ku bikungulwa bye. ³³ N'eisanyu n'okujaguza bitooleibwe ku nimiro enjimu n'o ku nsi ye Mowaabu; era maliremu omwenge mu masogolero: tewalibba alisamba ng'aleekaana; okuleekaana kulibba nga ti kuleekaana. ³⁴ Okuva ku kuleekaana kwa Kesuboni okutuuka ku Ereyale, n'okutuuka ku Yakazi, baleetere eidoboozi lyabwe, okuva ku Zowaali okutuuka ku Kolonayimu, okutuuka ku Egulasuserisiya: kubanga amaizi ag'e Nimulimu nago galirekebwawo. ³⁵ Era ate ndikomya mu Mowaabu, bw'atumula Mukama, oyo aweerayo ku kifo ekigulumivu n'oyo ayotereirye bakatonda be obubaani. ³⁶ Omwoyo gwange kyeguviire guvugira Mowaabu ng'emirere abasaiza ab'e Kirukeresi: ebintu ebingi bye yafunire kyebiviire bizikirira. ³⁷ Kubanga buli mutwe guliku empata, na buli kirevu kisaliibwe: ku mikono gyonagyona kuliku ebisale, n'o mu nkeende mulimu ebibukutu. ³⁸ Ku nyumba gyonagyona egya Mowaabu waigulu n'o mu nguudo gyayo wonawona waliwo okukungubaga: kubanga menyere Mowaabu ng'ekibya ekitasanyusa, bw'atumula Mukama. ³⁹ Nga kisuuliibwe! nga bawowogana! Mowaabu ng'akyusirye enkoone n'ensoni! kale Mowaabu alifuuka wo kusekererwa era w'o kukeŋenterera eri abo bonabona abamwetooloire. ⁴⁰ Kubanga ati bw'atumula Mukama nti bona, alibuuka ng'eikookooma, era alyanjululya ebiwawa bye eri Mowaabu. ⁴¹ Keriyoosi kimenyeibwe, n'ebigo babisonookererya, n'omwoyo gw'abasaiza ab'amaani aba Mowaabu ku lunaku ludi gulibba ng'omwoyo gw'omukali bw'alumwa okuzaala. ⁴² Era Mowaabu alizikirizibwa obutabba igwanga, kubanga yeegulumiirye eri Mukama. ⁴³ Entiisya n'obwina n'ekyambika biri ku iwe, ai iwe atyama mu Mowaabu, bw'atumula Mukama. ⁴⁴ Iruka entiisya aligwa mu bwina; n'oyo ava mu bwina alikwatibwa mu kyambika: kubanga ndireeta ku iye, ku Mowaabu, omwaka ogw'okwizirwa kwabwe, bw'atumula Mukama. ⁴⁵ Abairuka bemerera nga babula maani wansi w'ekiwolyo kya Kesubooni: kubanga omusyo guviire mu Kesubooni, n'enimi gy'omusyo giiviire wakati mu Sikoni, era gwokyerye ensonda ye Mowaabu, n'obwezinge bw'abo abayoogaana. ⁴⁶ Gikusangire iwe, Mowaabu abantu ba Kemosi bagotere: kubanga bataane bo batwaliibwe nga basibe ne bawala bo batwaliibwe mu busibe. ⁴⁷ Naye ndiryawo obusibe bwa Mowaabu mu naku egy'oluvanyuma, bw'atumula Mukama. Omusango gwa Mowaabu we gukoma wano.