¹ Awo Pasukuli mutaane wa Imeri kabona, eyabbaire omwami omukulu ow'omu nyumba ya Mukama, n’awulira Yeremiya ng'alagula ebyo. ² Awo Pasukuli n'akubba Yeremiya nabbi n'amusiba mu nvuba eyabbaire mu mulyango ogw'engulu ogwa Benyamini ogwabbaire mu nyumba ya Mukama. ³ Awo olwatuukire amakeeri Pasukuli n'atoola Yeremiya mu nvuba. Awo Yeremiya n'amukoba nti Mukama takutuumiire liina lyo Pasukuli wabula Magolumisabibu. ⁴ Kubanga ati bw'atumula Mukama nti bona, ndikufuula eky'entiisya eri iwe mwene n'eri mikwanu gyo bonabona: era baligwa n'ekitala eky'abalabe baabwe, n'amaiso go galikibona: era ndiwa Yuda yenayena mu mukono gwa kabaka w'e Babulooni, yeena alibatwala e Babulooni nga basibe, era alibaita n'ekitala. ⁵ Era ate ndiwa obugaigga bwonabwona obw'omu kibuga kino n'amagoba gaamu gonagona n'ebintu byamu byonabyona eby'omuwendo omungi, niiwo awo, ebintu byonabyona ebya bakabaka ba Yuda ndibiwa mu mukono gw'abalabe baabwe, abalibanyaga ne babakwata ne babatwala e Babulooni. ⁶ Wena, Pasukuli, n'abo bonabona abali mu nyumba yo balyaba mu busibe: era olituuka e Babulooni, era olifiira eyo, era oliziikirwa eyo, iwe ne mikwanu gyo bonabona be walagulirwe eby'obubbeyi. ⁷ Ai Mukama, wambeyere nze ne mbeyebwa: onsinga nze amaani era owangwire: nfuukire ekisekererwa okuzibya obwire, buli muntu ankudaalira. ⁸ Kubanga buli lwe ntumula, ntumulira waigulu; ntumulira waigulu nti ekyeju n'okunyaga: kubanga ekigambo kya Mukama bakifuula ekivumi gye ndi n'eky'okusekererwa okuzibya obwire. ⁹ Era bwe ntumula nti timuumulaku so tinkaali ntumulira mu liina lye, kale mu mwoyo gwange mubba ng'omusyo ogubuubuuka ogusibibwa mu magumba gange, era nga nkowere okuzibiikirirya so tinsobola kubbeerera awo. ¹⁰ Kubanga mpuliire okulyolyoma kw'abangi, entiisya enjuyi gyonagoyna. Muloope, fena twamuloopa bwe batumula mikwanu gyange einu bonabona, ibo abalabirira okuwenyera kwange; koizi yasendebwasendebwa, fena twamuwangula, era tulimuwalanaku eigwanga: ¹¹ Naye Mukama ali nanze ng'ow'amaani ow'entiisya: abanjiganya kyebaliva beesitala so tebaliwangula: baliswala inu, kubanga tebakolere bya magezi, balikwatibwa ensoni egitaliwaawo egiteerabirwenga enaku gyonagyona. ¹² Naye, ai Mukama w'eigye, akema omutuukirivu, abona emeeme ey'omukati, mbone eigwanga lyo ly'oliwalana ku ibo; kubanga nkukobeire ensonga yange. ¹³ Mwembere Mukama, mutendereze Mukama: kubanga awonyerye emeeme y'oyo eyeetaaga mu mukono gw'abo abakola obubbiibi. ¹⁴ Olunaku kwe nazaaliirwe lukolimiirwe: olunaku mawange kwe yanzaaliire luleke okuweebwa omukisa. ¹⁵ Alamiibwe oyo eyamuleeteire itawange ebigambo nti ozaaliirwe mwana w'o bwisuka; ng'amusanyusya inu. ¹⁶ Era Omusaiza oyo abbe ng'ebibuga Mukama bye yaswire n'ateenenya: awulire okukunga amakeeri, n'okutumulira wa igulu mu iyangwe; ¹⁷ kubanga teyangitire bwe naviire mu kida; atyo mawange yandibbaire entaana yange, n'ekida niikyo kyandibbaire kikulu enaku gyonagyona. ¹⁸ Naviiriire ki mu kida okubona okutegana n'obwinike, enaku gyange gimalibwewo olw'ensoni?