¹ Ati bw'atumula Mukama nti yaba ogule ensumbi ey'eibbumba ey'omubbumbi, otwale ku bakaire b'abantu n'o ku bakaire ba bakabona; ² ofulume okwaba mu kiwonvu kya mutaane wa Kinomu ekiri awayingirirwa mu mulyango Kalusiisi, olangirire eyo ebigambo bye nakukobere: ³ otumule nti muwulire ekigambo kya Mukama, imwe bakabaka ba Yuda naimwe abali mu Yerusaalemi; atyo bw'atumula Mukama w'eigye, Katonda wa Isiraeri nti bona, ndireeta obubbiibi ku kifo kino, obulyanamirirya amatu ga buli muntu alibuwulira. ⁴ Kubanga bandekerewo ne bakaafuwalya ekifo kino, ne bootererya omwo bakatonda abandi obubaani, be batamanyanga ibo n'a bazaiza babwe n'a bakabaka ba Yuda; era baizulya ekifo kino omusaayi ogubulaku musango; ⁵ era bazimbire ebifo ebigulumivu ebya Baali okwokya bataane baabwe mu musyo okubba ebiweebwayo ebyokyebwa eri Baali; kye ntalagiranga so tinakitumwiire so tekyayingiire mu mwoyo gwange: ⁶ kale, bona enaku giiza, bw'atumula Mukama ekifo kino lwe kitakaali kyetebwa nti Tofesi waire nti Kiwonvu kya mutaane wa Kinomu, naye nti kiwonvu eky'okwitirwamu. ⁷ Era ndiita okuteesya kwa Yuda ne Yerusaalemi mu kifo kino; era ndibagwisya n'ekitala mu maiso g'abalabe baabwe, era n'omukono gw'abo abasagira obulamu bwabwe: n'emirambo gyabwe ndigigabula okubba eby'okulya eri enyonyi egy'omu ibbanga n'eri ensolo egy'omu nsi. ⁸ Era ndifuula ekibuga kino ekyewuunyo era okunionsolebwanga; buli alibitawo alyewuunya n'anionsola olw'ebibonyoobonyo byakyo byonabyona ⁹ Era ndibaliisya omubiri gwa bataane baabwe, n'omubiri gw'abawala baabwe, era balirya buli muntu omubiri gwa mukwanu gwe mu kuzingizibwa n'o mu kwegeresebwa abalabe baabwe, n'abo abasaagira obulamu bwabwe kwe balibegeresya. ¹⁰ Awo kaisi n'omenya ensumbi eyo, abasaiza abayabira naiwe nga babona, ¹¹ n'obakoba nti ati bw'atumula Mukama w'eigye nti era ntyo bwe ndimenya abantu bano n'ekibuga kino ng'omuntu bw'amenya ekintu ky'omubbumbi ekitasoboka kuyungibwa ate: era baliziikira mu Tofesi okutuusya lwe watalibbaawo ibbanga lyo kuziikamu. ¹² Ntyo bwe ndikola ekifo kino, bw'atumula Mukama, n'abakityamamu, nga nfuula ekibuga kino okubba nga Tofesi: ¹³ n'enyumba egy'e Yerusaalemi n'enyumba gya bakabaka ba Yuda egyonoonekere giribba ng'ekifo Tofesi, enyumba gyonagyona gye bayoterereryangaku waigulu obubaani eigye lyonalyona ery'eigulu, ne bafukira bakatonda abandi ebiweebwayo ebyokunywa. ¹⁴ Awo Yeremiya n'aiza ng'ava e Tofesi Mukama gye yabbaire amutumire okulagula; n'ayemerera mu luya olw'enyumba ya Mukama, n'akoba abantu bonabona nti ¹⁵ Ati bw'atumula Mukama w'eigye, Katonda wa Isiraeri nti bona, ndireeta ku kibuga kino n'o ku mbuga gyakyo gyonagyona obubbiibi bwonabwona bwe nakitumwireku; kubanga bakakanyairye eikoti lyabwe baleke okuwulira ebigambo byange.