¹ Ekibbiibi kya Yuda kyawandiikiibwe n'ekalaamu ey'e kyoma eibbaale erya alimasi eisongoli: kyayoleibwe ku kipande eky'omwoyo gwabwe, n'o ku maziga g'ebyoto byanyu; ² abaana baabwe nga bwe baijukiire ebyoto byabwe n'a baasera baabwe awali emisaale egimera ku nsozi empanvu. ³ Ai olusozi lwange oluli mu nimiro, ndigabula ebintu byo n'obugaiga bwo bwonabwona okubba omunyago, n'ebifo byo ebigulumivu olw'okwonoona, mu nsalo gyo gyonagyona. ⁴ Wena olivaamu ku bubwo wenka mu busika bwo bwe nakuwaire; era ndikuweereresya abalabe bo mu nsi gy'otomaite: kubanga mukumire omusyo mu busungu bwange obwabuubuukanga emirembe gyonagyona. ⁵ Ati bw'atumula Mukama nti Alaamiibwe omusaiza oyo eyeesiga abantu, n'afuula omubiri okubba omukono gwe, n'omwoyo gwe guva ku Mukama. ⁶ Kubanga alifaanana omwoloola oguli mu idungu, so talibona ebisa bwe biriiza; naye alibba mu biwalakate mu idungu, ensi ey'omuunyu so ebulamu bantu. ⁷ Alina omukisa omusaiza oyo eyeesiga Mukama, era Mukama niilyo eisuubi lye. ⁸ Kubanga alibba ng'omusaale ogwasimbiibwe awali amaizi, ne gulanda emizi gyagwo awali omwiga, so tegulitya musana bwe gwaka einu, naye amalagala gaagwo galiyera; so tegulyeraliikiririra mu mwaka ogw'ekyeya, so tegulirekayo kubala bibala. ⁹ Omwoyo mubbeyi okusinga ebintu byonabyona, era gulwaire endwaire etewonyezeka: yani asobola okugumanya? ¹⁰ Nze Mukama nkebera omwoyo, nkema emeeme, okuwa buli muntu ng'amangira ge bwe gali, ng'ebibala bwe biri eby'ebikolwa bye. ¹¹ Ng'enkwale bw'ekuŋaanya obwana bw'etezaalanga, atyo bw'abba oyo afuna obugaiga so ti lwa mazima; enaku gye nga gikaali gye kitundu bulimuvaaku, n'o ku nkomerero iye alibba musirusiru. ¹² Ekifo eky'awatukuvu waisu niiyo ntebe ey'ekitiibwa eyagulumiziibwe okuva ku luberyeberye. ¹³ Ai Mukama, eisuubi lya Isiraeri, bonabona abakuviireku balikwatibwa ensoni; abansengukire baliwandiikibwa ku itakali, kubanga baviire ku Mukama, ensulo y'amaizi amalamu. ¹⁴ Mponya, ai Mukama, kale lwe naawona; ndokola, kale lwe nalokoka: kubanga iwe oli itendo lyange. ¹⁵ bona, bankoba nti ekigambo kya Mukama kiri waina? kiize. ¹⁶ Nze ku bwange tineyuna obutabba musumba enyuma wo; so tinegombanga olunaku olw'okuboneramu enaku; iwe omaite: ekyava mu munwa gwange kyabbanga mu maiso go. ¹⁷ Tobba ntiisya gye ndi: iwe oli bwirukiro bwange ku lunaku olw'okuboneramu obubbiibi. ¹⁸ Bakwatibwe ensoni abo abanjigganya, naye nze ndeke okukwatibwa ensoni; ibo bakeŋentererwe, naye nze ndeke okukeŋentererwa: baleeteku olunaku olw'okuboneramu obubbiibi, obazikirirye okuzikirira okw'emirundi ibiri. ¹⁹ Ati Mukama bwe yankobere nti yaba oyemerere mu mulyango ogw'abaana b'abantu, bakabaka ba Yuda mwe bemerera era mwe bafulumira n'o mu miryango gyonagyona egy'e Yerusaalemi; ²⁰ obakobe nti Muwulire ekigambo kya Mukama, imwe bakabaka ba Yuda, ne Yuda yenayena ne bonabona abali mu Yerusaalemi, abayingirira mu miryango gino: ²¹ ati bw'atumula Mukama nti Mwekume muleke okusituliranga ku lunaku lwa sabbiiti omugugu gwonagwona, so temwegeresyanga mu miryango egy'e Yerusaalemi; ²² so temutoolanga mugugu mu nyumba gyanyu ku lunaku olwa sabbiiti, so temukolanga mulimu gwonagwona : naye mutukulyanga olunaku olwa sabbiiti nga bwe nalagiire bazeiza banyu; ²³ naye ne batawulira so tebaategere kitu kyabwe, naye ne bakakanyalya eikoti lyabwe baleke okuwulira era baleke okwikirirya okwegeresebwa. ²⁴ Awo olulituuka, bwe mwanyiikiranga okumpulira, bw'atumula Mukama, obutaleetanga mugugu gwonagwona okugubisya mu miryango gy'ekibuga kino ku lunaku olwa sabbiiti, naye bwe mwatukulyanga olunaku olwa sabbiiti obutalukolerangaku mulimu gwonagwona; ²⁵ kale mu miryango gy'ekibuga kino mwayingirangamu bakabaka n'abalangira abatyaime ku ntebe ya Dawudi, nga bali ku magaali era nga beebagaire embalaasi, ibo n'abakungu baabwe, abasaiza ba Yuda n'abalibba mu Yerusaalemi: n'ekibuga kino kyabbanga kyo lubeerera. ²⁶ Era baliiza nga baviire mu bibuga bye Yuda n'o mu bifo ebyetooloire Yerusaalemi n'o mu nsi y'e Benyamini n'o mu nsi ey'ensenyu n'o ku nsozi n'o mu bukiika obulyo, nga baleeta ebiweebwayo ebyokyebwa ne sadaaka n'ebitone n'omusita, era nga baleeta sadaaka egy'okwebalya mu nyumba ya Mukama. ²⁷ Naye bwe mutampulirenga okutukulya olunaku olwa sabbiiti, obutatwalanga mugugu waire okuyingiriranga mu miryango gy'e Yerusaalemi ku lunaku olwa sabbiiti; kale ndikumira omusyo mu miryango gyakyo, era gulyokya amayumba ag'e Yerusaalemi, so tegulizikizibwa.