¹ Ekigambo ekyaiziire Yeremiya ekyaviire eri Mukama nti ² Muwulire ebigambo eby'endagaanu eno, era mukobe abasaiza ba Yuda n'abo abali mu Yerusaalemi; ³ obakobe nti Ati bw'atumula Mukama, Katonda wa Isiraeri, nti omusaiza alaamibwe atawulira bigambo bye ndagaanu eno, ⁴ gye nalagiriire bazeiza banyu ku lunaku kwe nabatoleire mu nsi y'e Misiri, mu kikoomi eky'ekyoma, nga ntumula nti Mugonderenga eidoboozi lyange mubikolenga nga byonabyona bwe biri bye mbalagiire: mutyo bwe mwabbanga abantu bange, nzena naabbanga Katonda wanyu: ⁵ Kaisi nywezyenga ekirayiro kye nalayiriire bazeiza banyu, okubawa ensi ekulukuta amata n'omubisi gw'enjoki nga watyanu. Awo kaisi ne ngiramu ne ntumula nti Amiina, ai Mukama. ⁶ Awo Mukama n'ankoba nti langirira ebigambo bino byonabyona mu bibuga bye Yuda n'o mu nguudo egy'e Yerusaalemi ng'otumula nti Muwulire ebigambo eby'endagaanu eno mubikole. ⁷ Kubanga nategeerezerye dala bazeiza banyu ku lunaku kwe nabatoleire mu nsi y'e Misiri ne watyanu, nga ngolokoka mu makeeri era nga ntegeeza, nga ntumula nti Mugondere eidoboozi lyange. ⁸ Naye ne batagonda so tebaategere kitu kyabwe, naye ne batambulira buli muntu mu bukakanyali bw'omwoyo gwabwe omubbiibi: kyenaviire mbaleetaku ebigambo byonabyona eby'endagaanu eno, gye nabalagiire okukolanga, naye ne batabikola. ⁹ Awo Mukama n'ankoba nti okwekobaana kubonekere mu basaiza ba Yuda ne mu abo abali mu Yerusaalemi. ¹⁰ Bakyukire okwira mu butali butuukirivu bwa bazeiza babwe abaagaine okuwulira ebigambo byange; era basengereirye bakatonda abandi okubaweereryanga: enyumba ya Isiraeri n'enyumba ya Yuda bamenyere endagaanu yange gye nalagaine n'a bazeiza babwe. ¹¹ Mukama kyava atumula ati nti bona, ndibaleetaku obubbiibi bwe batalisobola kuwona; era balinkungirira, naye tindibawulisisya. ¹² Awo ebibuga bya Yuda n'abo abali mu Yerusaalemi balyaba ne bakungiirira bakatonda be bootereirye obubaani: naye tebalibalokolera n'akamu mu biseera mwe baboneire enaku. ¹³ Kubanga ebibuga byanyu bwe byekankana obusa, na bakatonda bo bwe bekankana batyo, ai Yuda; era ng'enguudo egy'e Yerusaalemi bwe gyekankana obungi, bwe musimbiire mutyo ebyoto ekintu ekikwatisya ensoni, ebyoto eby'okwotereryangaku obubaani eri Baali. ¹⁴ Kale iwe tosabiranga bantu bano, so tobayimusiryanga kukunga waire okusaba: kubanga tindibawulirira mu biseera mwe balingirira olw'enaku gye baboine. ¹⁵ Muganzi wange afaayo ki mu nyumba yange, kubanga akolere eby'obukaba n'abangi, n'omubiri omutukuvu gukuviireku? bw'okola okubbiibi lw'osanyuka. ¹⁶ Mukama yakutuumire eriina nti omuzeyituuni ogwera, omusa nga guliku ebibala ebisa: n'eidoboozi ery'oluyoogaanu olunene agukumireku omusyo, n'amaani gaagwo gamenyekere. ¹⁷ Kubanga Mukama w'eigye eyakusimbire akwongeireku obubbiibi, olw'obubbiibi obw'enyumba ya Isiraeri n'obw'enyumba ya Yuda bwe beekoleire nga bansunguwairye olw'okwotererya Baali obubaani. ¹⁸ Awo Mukama n'akimanyisya ne nkimanya: kale kaisi n'ondaga ebikolwa byabwe. ¹⁹ Naye nabbaire ng'omwana gw'entama omuwombeefu ogutwalibwa okwiitibwa; so tinamaite nga bansaliire enkwe, nga batumula nti tuzikirirye omusaale wamu n'ebibala byagwo, tumuzikirirye mu nsi ey'abalamu, eriina lye baleke okuliijukira ate. ²⁰ Naye, ai Mukama w'eigye, asala emisango egy'ensonga, akema emeeme n'omwoyo mbone eigwanga ly'oliwalana ku ibo: kubanga iwe ntegeezerye ensonga yange. ²¹ Mukama kyava atumula ati eby'abasaiza aba Anasosi abasaagira obulamu bwo nga batumula nti tolaguliranga mu liina lya Mukama, omukono gwaisu guleke okukwita: ²² Mukama w'eigye kyava atumula ati nti Bona, ndibabonererya: abavubuka balifa kitala; bataane baabwe na bawala baabwe balifa njala; ²³ so tebalibba na balifiikawo: kubanga ndireeta obubbiibi ku basaiza aba Anasosi, niigwo mwaka mwe baliizirirwa.