¹ Muwulire ekigambo Mukama ky'abakobere, imwe enyumba ya Isiraeri: ² Ati bw'atumula Mukama nti Timweganga ngira ya mawanga, so temweraliikiriranga bubonero bwo mu igulu; kubanga amawanga gabweraliikirira. ³ Kubanga empisa egy'amawanga gibulaku kye gigasa: kubanga wabbaawo omumu atema omusaale mu kibira, omulimu ogw'emikono gy'omukoli n'empasa. ⁴ Baguyonja n'e feeza n'e zaabu; bagukomerera n'eninga n'enyundo gulekenga okusagaasagana. ⁵ Bifaanana olukoma oluliku enjola so tebitumula: tebireka kusitulibwa kubanga tebisobola kutambula. Temubityanga; kubanga tebisobola kukola kubbiibi so n'okukola okusa tekuli mu ibyo. ⁶ Wabula afaanana iwe, Ai Mukama; niiwe mukulu, n'eriina lyo ikulu mu buyinza. ⁷ Yani atandikutiire, Ai Kabaka w'amawanga? kubanga kukugwanira iwe: kubanga mu bagezigezi bonabona ab'amawanga n'o mu kitiibwa kyabwe kyonakyona ekya bakabaka mubula akufaanana iwe. ⁸ Naye ibo bonabona wamu babbaire ng'ensolo, basirusiru: okwegeresya kw'ebifaananyi kisiki busiki. ⁹ Waliwo feeza eyaweeseibwe okubba ey'empewere eyatoleibwe e Talusiisi, n'e zaabu eyaviire e Yufazi, omulimu ogwa fundi, n'ogw'emikono gy'omuweesi we zaabu; kaniki n’olugoye olw'efulungu okubba ebivaalo byabyo; byonabyona mulimu gwa basaiza abakabakaba. ¹⁰ Naye Mukama niiye Katonda mwene ow'amazima; oyo niiye Katonda omulamu, era Kabaka atawaawo: ensi etengera olw'obusungu bwe, so n'amawanga tegasobola kugumiinkirirya kunyiiga kwe. ¹¹ Muti bwe mubba mubakoba nti Bakatonda abatakolere igulu ne nsi, abo baligota mu nsi n'okuva wansi w'eigulu. ¹² Yakolere ensi olw'obuyinza bwe, yanywezerye ebintu byonabyona olw'amagezi ge, era yabambire eigulu olw'okutegeera kwe: ¹³ bw'aleeta eidooozi lye, ne wabba oluyoogaanu alw'amaizi mu igulu, era aniinisya emiika okuva ku nkomerero gy'ensi; akolera amaizi enjota, era atoola empunga mu mawanika ge. ¹⁴ Buli muntu afuukire ng'ensolo, so abula kumanya; buli muweesi we zaabu ensoni gimukwata olw'ekifaananyi kye ekyole: kubanga ekifaananyi kye ekisaanuukye bubbeyi, so mubula mwoka mu ibyo. ¹⁵ Bibulaku kye bigasa, mulimu gw'o bubbeyi: birigotera mu biseera mwe biriizirirwa. ¹⁶ Omugabo gwa Yakobo tigufaanana ebyo; kubanga oyo niiye mubbumbi wa byonabyona; era Isiraeri niikyo kika eky'obusika bwe: Mukama w'eigye niilyo liina lye. ¹⁷ Kuŋaanya eby'obuguzi bwo obitoole mu nsi, iwe atyama mu kibuga ekizingizibwa. ¹⁸ Kubanga ati bw'atumula Mukama nti bona, ndivuumuula abatyama mu nsi okubatoolamu mu biseera bino, era ndibansaasaanya, balumibwe. ¹⁹ giinsangire olw'ekiwundu kyange! ekiwundu kyange kiinuma inu: naye ne ntumula nti Mazima buno niibwo bwinike bwange, era kiŋwanira okubugumiikirirya. ²⁰ Eweema yange enyagiibwe, n'emiguwa gyange gyonagoyna gikutukire: abaana bange banviiremu, so babulawo: tiwakaali waliwo w'o kubamba weema yange, waire ow'okusimba amagigi gange. ²¹ Kubanga abasumba bafuukire ng'ensolo, so tibabwirye Mukama: kyebaviire baleka okubona omukisa, n'embuli gyabwe gyonagyona gisaansaine. ²² Eidoboozi ery'ekigambo kye babuulira, bona, kiiza, n'okusasamala okunene okuva mu nsi ey'obukiika obugooda, okufuula ebibuga bya Yuda amatongo, ekisulo eky'ebibbe. ²³ Ai Mukama, maite ng'engira ey'omuntu teri mu niiye mwene: tikiri mu muntu atambula okuluŋamyanga ebigere bye. ²⁴ Ai Mukama, onkobere, naye mpola; ti lwo busungu bwo oleke okunzikirirya. ²⁵ Fukira dala ekiruyi kyo ku b'amawanga abatakumaite, n'o ku bika ebitakoowoola liina lyo: kubanga baliire Yakobo, niikwo awo, bamuliire, bamumalirewo, bazikirye ekifo kye mw'ababba.