¹ Ebigambo bya Yeremiya mutaane wa Kirukiya ow'oku bakabona ababbaire mu Anasosi mu nsi ya Benjamini: ² eyaizirwe ekigambo kya Mukama mu mirembe gya Yosiya mutaane wa Amoni, kabaka wa Yuda, mu mwaka ogw'eikumi n'eisatu ogw'okufuga kwe. ³ Era kyaizire no mu mirembe gya Yekoyakimu mutaane wa Yosiya kabaka wa Yuda, okutuusya ku nkomerero y'omwaka ogw'eikumi no gumu ogwa Zedekiya mutaane wa Yosiya kabaka wa Yuda: okutuusya ab'e Yerusaalemi lwe baatwaliibwe nga basibe mu mwezi ogw'okutaanu. ⁴ Awo ekigambo kya Mukama ne kingizira nti ⁵ Bwe nabbaire nga nkaali kukubbumba mu kida nakumaite, era nga okaali kuva mu kida nakutukwirye; nkutekerewo okubba nabbi eri amawanga. ⁶ Awo nze kaisi ne ntumula nti Woowe, Mukama Katonda! bona, tinsobola kutumula: kubanga ndi mwana mutomuto. ⁷ Naye Mukama n'ankoba nti Totumula nti Ndi mwana mutomuto: kubanga eri bonabona gye naakutumanga gy'ewayabanga, era kyonakyona kye nakulagiranga ky'ewatumulanga. ⁸ Tobatyanga: kubanga nze ndi wamu naiwe okukuwonya, bw'atumula Mukama. ⁹ Awo Mukama n'agolola omukono gwe n'akoma ku munwa gwange; Mukama n'ankoba nti Bona, ntekere ebigambo byange mu munwa gwo: ¹⁰ bona, Watyanu nkutekerewo okubba omukulu w'amawanga era ow'amatwale ga bakabaka, okusimbula n'okumenya n'okuzikirirya n'okusuula; okuzimba n'okusimba. ¹¹ Era ate ekigambo kya Mukama ne kingizira nga kitumula nti Yeremiya, obona ki? Ne ntumula nti Mbona omwigo ogw'omulogi. ¹² Awo Mukama n'ankoba nti Oboine kusa: kubanga ndabirira ekigambo kyange okukituukirirya. ¹³ Awo ekigambo kya Mukama ne kingizira omulundi ogw'okubiri nga kitumula nti Obona ki? Ne ntumula nti mbona entamu eyeesera; n'amaiso gaayo geema obukiika obulyo. ¹⁴ Awo Mukama n'ankoba nti Okwema obukiika obulyo obubbiibi bulifubutukira ku bonabona abali mu nsi. ¹⁵ Kubanga, bona, ndyeta ebika byonabyona eby'amatwale ga bakabaka b'obukiika obugooda, bw'atumula Mukama; era baliiza ne basimba buli muntu entebe ye awayingirirwa mu miryango gya Yerusaalemi n'okwolekera bugwe waayo yenayena enjuyi gyonagyona n'okwolekera ebibuga byonabyona ebya Yuda. ¹⁶ Era ndyatula emisango gyange eri bo olw'obubbiibi bwabwe bwonabwona; kubanga bandetere ne booterya obubaani eri bakatonda abandi, ne basinza emirimu egy'engalo gyabwe ibo. ¹⁷ Kale weesibe ekimyu oyimuke obakobe byonabyona bye nkulagira: tokeŋentererwanga eri ibo, ndeke okukukeŋenterera mu maiso gaabwe. ¹⁸ Kubanga, bona, nkufiire watyanu ekibuga ekiriku enkomera, era empagi ey'ekyoma, era bugwe ow'ekikomo eri ensi yonayona, eri bakabaka ba Yuda, eri abakulu baayo, eri bakabona baayo, n'eri abantu ab'omu nsi. ¹⁹ Era balirwana naiwe; naye tebalikuwangula: kubanga nze ndi wamu naiwe, bw'atumula Mukama, okukuwonya.